မဲခေါင်၊ ဇူလိုင် ၂၅
စစ်ကောင်စီထိန်းချုပ်ထားသည့် မူဆယ်မြိုတွင် ယမန်နေ့ညနေပိုင်းက မီးသတ်ရုံးအနီး၌ မိသားစုဝင် အမျိုးသမီး ၂ ဦးကို အမည်မသိ သေနတ်သမားများက ပစ်သတ်သွားခဲ့ကြောင်း ဒေသခံများထံမှ သိရသည်။
ယမန်နေ့ ဇူလိုင်လ ၂၄ ရက်နေ့၊ ညနေ ၃ နာရီခန့်တွင် မူဆယ်မြို့၊ ဟူမွန်ရပ်ကွက်၊ ခရိုင်တရားရုံးနှင့် မီးသတ်စခန်းအနီး ရှိ ထိုင်းစားသောက်ဆိုင်ရှေ့ဘက်နားရှိ ရပ်ထားသည့် ကားအဖြူရောင် ပေါ်မှ လူများကို Crown အနက်ရောင်ကားတစ်စီးပေါ်က လူ ၂ ယောက်က သေနတ်ဖြင့် အနီးကပ်ပစ်သတ်ပြီး မောင်းပြေးသွားကြောင်းနှင့် ပစ်ခတ်ခံရသူ ၂ ဦးမှာ ပွဲချင်းပြီး သေဆုံးကြောင်း သိရသည်။
သေဆုံးသူ အမျိုးသမီးနှစ်ဦးအနက် တစ်ဦးမှာ ကိုယ်ဝန်ဆောင်ထားရသူတစ်ဦး ဖြစ်ကြောင်း သိရသည်။
“သေတာက စာအုပ်နီပွဲစားတွေလို့ ပြောတယ်။ တရုတ်ကမ်းကူးစာအုပ်နီတွေက ယွမ် ၅ သိန်းအထိ ပေါက်နေတော့ အရှုပ်အရှင်းတွေ များတယ်” ဟု ဟူမွန်ရပ်နေသူတစ်ဦးက မဲခေါင်ကို ယနေ့ ဇူလိုင် ၂၅ ရက်မှာ ပြောသည်။
ယင်းနေရာတွင် မြို့နယ်တရားသူကြီးကို ပစ်သတ်မှု၊ ပြည်သူ့စစ်တစ်ဦးကို သေနတ်နှင့် လိုက်လံပစ်ခတ်မှုများ ယခင်ကလည်း ဖြစ်ပွားခဲ့သေးကြောင်း ၎င်းက ပြောသည်။
“မူဆယ်မှာက လုယက်၊ ပြန်ပေး၊ ဓားပြတိုက် မဟုက်ရင် လူမှုရေးနဲ့ ရန်ငြိုးရန်စပဲ၊ ငွေပေးပြီး သတ်ခိုင်းတာပေါ့။ သေနတ်က ပေါသလို၊ လူမိုက်လည်း ပေါတယ်လေ။ ခုနေရာဆို ခရိုင်တရားရုံးရော၊ မီးသတ်ရော၊ ဂေါက်ကွင်းရော လူတွေ အများကြီး ရှိနေတာ” ဟု ပြောသည်။
စစ်ကောင်စီတပ် ထိန်းချုပ်ထားသည့် မူဆယ်မြို့တွင် တရားဥပဒေ စိုးမိုးနိုင်စွမ်းမရှိဘဲ လူသတ်မှု၊ ဓားပြတိုက်မှု၊ လုယက်မှုနဲ့ ခိုးမှု ဒုစရိုက်မှုများ မကြာခဏဖြစ်ပွားနေသဖြင့် ဒေသခံများ ဘဝလုံခြုံမှုမရှိ ဖြစ်နေကြောင်း သိရသည်။
မဟာ
#MeKongNews
#မူဆယ်မြို့
#သေနတ်
#ကိုယ်ဝန်ဆောင်
#စာအုပ်နီပွဲစား
