မဲခေါင်၊ ဇွန် ၃၀
ရှမ်းပြည်တောင်ပိုင်း၊ ဟဲဟိုးမြို့၊ သရက်သုံးပင် အဆင်းကွေ့တွင် ဇွန်လ၂၄ရက် နံနက်ပိုင်းက သေနတ်ဖြင့်ပစ်ခတ် လူသတ်ပြီး ကားလုယူမောင်းပြေးသူမှာ ပင်လောင်းဘက်မှ PNOများဖြစ်သည်ဟု ယူဆထားကြောင်း ရှမ်းတောင်ရဲတပ်ဖွဲ့နှင့် နီးစပ်သူတစ်များထံမှ သိရသည်။
CCTV မှတ်တမ်းများနှင့် စုံစမ်းရရှိချက်များအရ လူသတ်မှုကျူးလွန်သည့်နေရာတွင် ကင်တာ ကားတစ်စီးမှ PNO ၃ဦးက ကားပျက်ချင်ယောင်ဆောင်ကာ ရပ်တန့်ထားပြီး လူသတ်လုယူမည့် ကားလာသည့် အချိန်တွင် ရပ်တန့်ခိုင်းပြီး သေနတ်ဖြင့်ပစ်သတ်၍ ကားကို မောင်းယူသွားခြင်းဖြစ်သည်ဟုဆိုသည်။
“ကင်တာကားက လူသတ်ပြီးမောင်းယူသွားတဲ့ လင့်ခရူဇာနောက်က တောက်လျှောက်ပါသွားတာတွေ့ရတယ်။ ပြန်တွေ့တဲ့ ကားဒက်ရှ်ဘုတ်ထဲကလည်း ကျည်ဖူးတစ်ခုရတယ်။ မှတ်တမ်းဓာတ်ပုံတွေအထက်ကို တင်ပြထားတယ်။ အောင်ပန်း PNO ရုံးကိုလည်း ပို့ထားတယ်” သတင်းရင်းမြစ်တစ်ဦးက မဲခေါင်ကိုပြောသည်။
ပစ်သတ်ခံရသူမှာ ညာဘက်နားထင် ကျည်ဖောက်ဝင်ဒဏ်ရာ တစ်ချက်၊ ဝမ်းဗိုက်ညာဘက် ကျည်ဖောက်ဝင်ဒဏ်ရာတစ်ချက်၊ ဝမ်းဗိုက်ဘယ်ဘက် ကျည်ဖောက်ဝင်ဒဏ်ရာ တစ်ချက်၊ ရင်ညွန့်တွင် ကျည်ဖောက်ဝင်ဒဏ်ရာ တစ်ချက်၊ ညာဘက်လက်ဖျံ ကျည်ဖောက်ဝင်ဒဏ်ရာ တသ်ချက်၊ ညာလက်ဖမိုး ကျည်ဖောက်ဝင် ဒဏ်ရာ တစ်ချက်၊ စုစုပေါင်း ကျည်ဖောက်ဝင်ဒဏ်ရာ၆ချက်တို့ဖြင့် သေဆုံးနေပြီး အလောင်း အနီးတွင် (7.62 x 39)ကျည် တစ်တောင့်၊ ကျည်ခွံ၃ခု၊ ကျည်ထိပ်ဖူး တစ်ခုတို့ကို တွေ့ရှိသိမ်းဆည်းရမိခဲ့သည်ဟု ရဲမှတ်တမ်းအရ သိရသည်။
“ဒီကျည်ဆံတွေက AK47 လို Type 81 လို တိုက်ပွဲဝင်ချေမှုန်းရေး ရိုင်ဖယ်တွေနဲ့မှ ပစ်လို့ရတာ၊ သေနတ်အရှည်ပေါ့။ ဒင်ခေါက်ထားလည်း ရတာတွေရှိတယ်။ တရားခံတွေ အရေးယူနိုင်ဖို့ကတော့ အထက်အကြီးအကဲတွေပဲ တတ်နိုင်မယ်” ဟု ရဲတပ်ဖွဲ့နှင့်နီးစပ်သူတစ်ဦးက ပြောသည်။
သေနတ်ဖြင့် ပစ်သတ်ခံရပြီး ကားလုယူခံရသူ လျှံမင်းသန့်၂၃နှစ်မှာ ကျောက်ပန်းတောင်းတွင် အကိုဖြစ်သူနှင့် နေထိုင်ရာမှ ဖခင်ဖြစ်သူရှိရာ အေးသာယာသို့ ခေတ္တပြန်လာစဥ် ကလောရှိ အသိဆိုင်ဖွင့်ပွဲသို့သွားရာမှ ယခုကဲ့သို့ သတ်ဖြတ်ခံရခြင်း ဖြစ်ကြောင်း သိရသည်။
PNO ပြည်သူ့စစ်သည် ယမန်နှစ်ဆီဆိုင်မြို့တိုက်ပွဲကာလအတွင်း ပြောင်းများသယ်ယူရန်မြို့ကိုပြန်သည့် ကားတစ်စီးကို ပစ်ခတ်လုယူမှု၊ မှော်ဘီတံတားဂိတ်တွင် တားဆီးသည်ကိုရပ်မပေးဟု အကြောင်းပြကာ ယာဥ်မောင်းကို ပစ်သတ်ပြီး ကားကို သိမ်းဆည်းအသုံးပြုမှုများ ရှိခဲ့သေးသည်။
လူသတ်တရားခံပေါ်ပေါက်ရေးအတွက်၊ ဟဲဟိုး၊ အောင်ပန်း၊ ကလော၊ တီကျစ်ရဲစခန်းများနှင့်အတူ အောင်ပန်းရှိ PNO ရုံးကလည်း ပူးပေါင်း လုပ်ဆောင်နေကြောင်း သိရသည်။
#MeKongNews
#ဟဲဟိုး
#လူသတ်မှု
#လျှံမင်းသန့်
#PNO
