မဲခေါင်၊ ဇွန် ၂၈
စစ်မှုထမ်းလူစားထိုးရန်အတွက် အကြောင်းပြကာ ရှမ်းပြည်တောင်ပိုင်း၊ မိုးနဲမြို့နယ်၊ နမ့်မော်ဆွန့်အုပ်စု၊ ဆည်မြောင်းကျေးရွာ(ကတ်နောင်)ရွာတွင် ရာအိမ်မှူးဝင်းဗိုလ်က ပြည်သူများထံမှ ငွေလိမ်လည်ကောက်ခံသွားကြောင်း ဒေသခံများထံက သိရသည်။
ငွေလိမ်ကောက်ခံသည့် ရာအိမ်မှူးမှာ ကြံ့ခိုင်ရေးပါတီမှ မြို့နယ်ကော်မတီဝင်တစ်ဦးဖြစ်ပြီး ၎င်းကို ပြည်သူများက အဂတိလိုက်စားမှုတိုက်ဖျက်ရေး ကော်မတီသို့ ဇွန်လ ၁၈ ရက်က တိုင်ကြားထားကြောင်း သိရသည်။
“အုပ်ကြီးတွေက အဲကိစ္စ မသိသလို ငွေလာအပ်တာလည်း မရှိဘူး။ ခိုင်းလည်း မခိုင်းရဘူးလို့ ပြောတယ်။ သူက ပြည်ခိုင်ဖြိုး EC ဆိုပြီး မြို့နယ်တောင် ဂရုမစိုက်ဘူး” ဟု ကတ်နောင်ရွာသားတစ်ဦးက ပြောသည်။
အဂတိသို့ တိုင်ကြားစာတွင် ပြည်သူ မိသားစု ၆ ဦးထံမှ ကျပ်ငွေ ၅ သိန်းစီဖြင့် ကျပ်သိန်း ၃၀ ကို လိမ်လည်ကောက်ခံထားပြီး အလိမ်ခံရသည့် ပြည်သူ ၃ ဦးက လက်မှတ်ရေးထိုး လက်ဗွေနှိပ်ထားသလို အသိသက်သေ ၁၄ ဦးကလည်း လက်မှတ်ရေးထိုးထားကြောင်း တွေ့ရသည်။
“မိုးနဲ တစ်မြို့လုံး ခုလို ငွေကောက်တာ ဘယ်မှာမှမရှိဘူး။ လူတွေပဲ လိုက်ကြတာ။ RC နယ်မြေဖြစ်လို့ အတင်းအကြပ်ကောက်တာလည်း မရှိခဲ့ဘူး။ ခုက စစ်မှုထမ်းအကြောင်းပြ ခြိမ်းခြောက်ပြီး လုပ်စားတာ” ဒေသခံတစ်ဦးက မဲခေါင်သို့ ဇွန်လ ၂၇ ရက်တွင် ပြောသည်။
မိုးနဲမြို့ပေါ် ရှိ ရပ်ကွက်များမှာ လွိုင်မြေ၊ နာဟောင်၊ ဥယျဥ်၊ နောင်မြိုင်း၊ နောင်ကျော့၊ ပေါ့မိုင်းတို့ ဖြစ်ပြီး ပြည်သူ့စစ်မှုထမ်းအတွက် ယခုကဲ့သို့ ငွေ သိန်းနဲ့ချီ ကောက်ခံမှု မရှိခဲ့ကြောင်း ဒေသခံများကပြောသည်။
မဟာ
#MeKongNews
#မိုးနဲမြို့နယ်
#စစ်မှုထမ်း
#ကြံ့ခိုင်ရေးပါတီ
#ရာအိမ်မှူး
