မဲခေါင်၊ ဇွန် ၂၇
စစ်ကောင်စီတပ်က စစ်ဘက်သုံး အဆင့်မြင့်နည်းပညာသုံး မိုက်ခရိုကင်းထောက်ဒရုန်း (Military Micro Drone)ဖြစ်သည့် (Rotary UAV)များကို အသုံးပြုလာနေ၍ တော်လှန်ရေးတပ်များ အထူး သတိပြုရန် မြန်မာ့ စစ်ဘက်ရေးရာနှင့် လုံခြုံရေးဆိုင်ရာ လေ့လာရေးအဖွဲ့ (MDSI) က ထုတ်ပြန်ထားသည်။
ယင်းဒရုန်းများဖြင့် တပ်တည်/ တပ်လှုပ်များကို ကြိုတင်ထောက်လှန်းရယူခြင်း၊ တိုက်ခိုက်မှုများအတွက် ရှေ့ပြေးကင်းထောက်မှု အားကောင်းလာသည့်အတွက် တော်လှန်ရေးတပ်များအနေဖြင့် တပ်ဖျောက်၊ ပုံဖျက်မှုများ အထူးသတိပြုကြရန် အကြံပြုကြောင်း MDSI အဖွဲ့ဝင်တစ်ဦးက မဲခေါင်ကို ပြောသည်။
“စစ်တပ်က တပ်ကြပ်ကြီးအဆင့်နဲ့ ပညာရေးအားကောင်းသူတွေကို ရမည်းသင်း စခတ ၃ မှာ သင်တန်းပေးနေတယ်။ ခုဆို စစ်ကြောင်းတွေမှာတောင် သုံးလာပြီ သိရတယ်။ ကိုယ့်တပ်တွေဘက်ကလည်း မိုက္ကရိုဒရုန်းတွေအကြောင်းနဲ့ တန်ပြန်နိုင်ဖို့ ကြိုးပမ်းနေတယ်” ဟု ၎င်းကပြောသည်။
တိုက်ပွဲဝင်ဒရုန်းများမှာ အရွယ်အစားကြီးမား၍ အားသွင်းချိန်ကြာမြင့်ပြီး အသံဆူညံသော်လည်း ယခု မိုက္ကရိုဒရုန်းများမှာ လက်သီးဆုပ်ခန့်သာရှိပြီး အားဖြည့်မြန်ကာ သယ်ယူအသုံးချမှု ပိုမိုလွယ်ကူသဖြင့် တပ်လှုပ်ချိန်နှင့် တစ်ဖက်သို့ တန်ပြန်ခြုံခိုတိုက်ခိုက်ရန် အထူးအသုံးပြုနေသည့်အတွက် တော်လှန်ရေးတပ်များ အထူးသတိပြုနိုင်ရန် လိုအပ်ကြောင်း သိရသည်။
စစ်ကောင်စီတပ်၏ ဒရုန်းသင်တန်းများတွင် DJI ကင်းထောက်ဒရုန်းများ၊ Autel ကင်းထောက်ဒရုန်းများ၊ VTOL fixed wing UAV၊ Quadcopter နှင့် Hexacopter တိုက်ခိုက်ရေးဒရုန်းများ၊ Delta Wing Suicide ဒရုန်းများ အပါအဝင် အမျိုးအစားအများအပြားကို တရုတ်နှင့် ရုရှားမှ ဝယ်ယူပြီး နည်းပြများအပါအဝင် သင်တန်းသား ၂၀၀ ဝန်းကျင်ခန့်နှင့် နေ့စဉ်လေ့ကျင့်ပေးနေကြောင်း MDSI က ထုတ်ပြန်ထားသည်။
စစ်ကောင်စီတပ်သည် တော်လှန်ရေးတပ်များ၏ ဒရုန်းနည်းပညာ အားကောင်းထိရောက်မှုကို ကာကွယ်တုန့်ပြန်နိုင်ရန်အတွက် ဒရုန်းကိုင်တွယ်အသုံးပြုမှုသင်တန်းများ စဉ်ဆက်မပြတ်ဖွင့်လှစ်၍ ခြေလျင်တိုက်ခိုက်ရေးတပ်မများနှင့် ဒရုန်းတပ်ဖွဲ့မှ သင်တန်းသားများကို လေ့ကျင့်သင်ကြားပေးနေပြီး သင်တန်း တက်ရောက်ပြီးဆုံးသူများကို ဒရုန်းအဖွဲ့များအဖြစ် စုဖွဲ့၍ တမခ/စကခများ နှင့် တိုက်ပွဲနယ်မြေများသို့ စေလွှတ်တာဝန်ပေးနေသည်ဟု MDSI ၏ ထုတ်ပြန်ချက်တွင် ပါရှိသည်။
မဟာ
#MeKongNews
#မိုက်ခရိုကင်းထောက်ဒရုန်း
#စစ်ကောင်စီ
#တိုက်ပွဲဝင်ဒရုန်း
#ရုရှား
