မဲခေါင်၊ ဇွန် ၂၆

ချင်းရွှေဟော်‌မှ မန္တလေးမြို့အထိ ကုန်စည်ပို့‌ဆောင်ရာတွင် ၁၂ ဘီး ကား တစ်စီးကို ကျပ် ၉၅ သိန်း မှ ၁၂၅ သိန်းအထိ ကားခရရှိသော်လည်း မန္တလေးမြို့အဝင်တွင် ဖမ်းဆီးခံရမှု စိပ်လာသည့်အတွက် ရပ်နားသည့် ကုန်တင်ယာဉ်အချို့ရှိလာကြောင်းကုန်တင်ယာဉ်မောင်းအချို့ထံမှ သိရသည်။

စစ်ကောင်စီသည် တရားမဝင်ကုန်စည်စီးဆင်းမှု တားဆီးရေးအမည်ခံကာ ကုန်တင်ယာဉ်များကို စစ်ဆေးပြီး ဖမ်းဆီးမှုများ ပြုလုပ်နေခြင်းဖြစ်ကြောင်း၊ ရှမ်းပြည် မြောက်ပိုင်းမှ မန္တလေးမြို့သို့ ကုန်စည်သယ်ယူပို့ဆောင်မှု နှင့် သွားလာရေးလမ်းကြောင်းကို ပြန်လည် ဖွင့်လှစ်နေပြီ ဖြစ်သော်လည်း စစ်ကောင်စီသည် မန္တလေးမြို့အဝင်တွင် အခွန်ဆောင်ခြင်း ရှိ၊ မရှိ၊ တရားဝင်ကုန်စည် ဟုတ်၊ မဟုတ် စစ်ဆေးကာ အရေးယူခြင်းဖြစ်ကြောင်း ယာဉ်မောင်းများက ပြောသည်။

“ကားတွေက ဖမ်းတယ်။ အခုတော့ ရပ်ထားရတယ်။ ခရီးက တစ်လ ‌တစ်ခေါက်လောက်ပဲ” ဟု ကုန်တင်ယာဉ်မောင်းတစ်ဦးက ဆိုသည်။

ချင်းရွှေဟော်ဘက်မှ မန္တလေးမြို့အထိ ကုန်စည်ပို့ဆောင်ရာတွင် ၁၂ ဘီးယာဉ် တစ်စီးကို လမ်းတလျှောက် ပေးဆောင်ရသည့် လမ်းကြေးပါ အပြီးအစီး ကျပ် ၉၅ သိန်း မှ ၁၂၅ သိန်း အထိပေးရပြီး တွဲကားဆိုပါက သိန်း ၂၀၀ နီးပါး ကားခဈေးရှိကြောင်း၊ ကုန်စည်သယ်ယူပို့ဆောင်ရန်အတွက် ကုန်တင်ယာဉ်များလိုအပ်ကြောင်း ကုန်စည်ဒိုင်များထံမှ သိရသည်။

စစ်ကောင်စီသည် ရှမ်းမြောက်လမ်းကြောင်းမှ လာသည့် ကုန်စည်များကို လားရှိုးမြို့ ရေပူစမ်းလမ်းစုံ စစ်ဆေးရေးဂိတ်၊ မန္တလေး ရတနာပုံတံတား စစ်ဆေးရေးဂိတ်၊ မြစ်ငယ်စစ်ဆေးရေးဂိတ်၊ ပြင်ဦးလွင်ဘက်မှ အဝင် စစ်ဆေးရေးဂိတ်များ နှင့် ကျွဲတပ်ဆုံ စစ်ဆေးရေးဂိတ်များမှ စစ်ဆေးကာဖမ်းဆီးမှုများ လုပ်ဆောင်နေသည်။

တရုတ်သည် ချင်းရွှေဟော် နယ်စပ်ဂိတ်ကို စစ်လက်နက်များမှ အပ ကုန်စည်ပို့ဆောင်ခွင့် ပြုထားသည် ဖြစ်ရာ မြန်မာပြည်တွင်းကို ကုန်စည်စီးဆင်းမှု အားကောင်းလာသော်လည်း စစ်ကောင်စီက တရားမဝင်တင်သွင်းလာသည်ဟု ဆိုကာ ဖမ်းဆီးအရေးယူနေခြင်း ဖြစ်သည်။

ချင်းရွှေဟော်-မန္တလေး ကားလမ်းကြောင်းသည် အာဏာမသိမ်းခင်ကာလက ကုန်စည်ပို့ဆောင်ရာတွင် ရက်အနည်းငယ်သာ ကြာမြင့်သော်လည်း ယခုကာလတွင် တစ်လနီးပါး ကြာမြင့်ပြီး တချို့ကုန်စည်များမှာ ၆ လနီးပါးအထိ စောင့်ဆိုင်းရမှု ရှိကြောင်း ကုန်သည်တစ်ဦးက ပြောသည်။

ရှမ်းအရှေ့ကျိုင်းတုံ နှင့် တာချီလိတ်ဘက်လမ်းကြောင်းမှလည်း လိုင်စင်မဲ့ကုန်များကို အစစ်အဆေးတင်းကြပ်နေသည့်အတွက် ကုန်စည်ပို့ဆောင်မှု ရပ်တန့်လျက်ရှိသည်။

စစ်ကောင်စီသည် လိုင်စင်မဲ့သွင်းကုန်များကို တရားမဝင်ကုန်စည်အဖြစ် သတ်မှတ်ကာ တင်းတင်းကြပ်ကြပ် ဖမ်းဆီးအရေးယူနေသော်လည်း ကုန်ပစ္စည်းတင်သွင်းခွင့်လိုင်စင်ကိုမူ အနည်းငယ်သာ ချပေးလျက်ရှိကြောင်း သိရသည်။

ဖေသန်း
#MeKongNews
#ချင်းရွှေဟော်
#မန္တလေး
#ရှမ်းမြောက်
#ကုန်စည်ပို့ဆောင်ရေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)