မဲခေါင်၊ ဇွန် ၂၅
အင်အားအလုံးအရင်းဖြင့် စစ်ကောင်းထိုးနေသည့် စစ်ကောင်စီနှင့် PNO ပြည်သူ့စစ် ပူးပေါင်းတပ်ဖွဲ့က ရှမ်း-ကရင်နီနယ်စပ်၊ ဖယ်ခုံအင်းအရှေ့ခြမ်းရှိ ဆောင်နန်းခဲတစ်ရွာလုံးကို မီးရှို့နေကြောင်း စစ်ရေးသတင်းအရင်းမြစ်များက မဲခေါင်သို့ ပြောသည်။
စစ်ကောင်စီနှင့် PNO ပြည်သူ့စစ်တို့သည် ဇွန်လ ၂၃ ရက်နေ့မှစ၍ ဖယ်ခုံအင်းအရှေ့ခြမ်းကို အင်အားအလုံးအရင်းဖြင့် စစ်ကြောင်းထိုးလာသည့်အတွက် တော်လှန်ရေးတပ်ဖွဲ့များနှင့် တိုက်ပွဲများ ပြင်းထန်ခဲ့ရာက ဆောင်နန်းခဲတစ်ရွာလုံးရှိ အိမ်ခြေ ၄၀ ကျော်ကို စစ်တပ်နှင့် PNO ပြည်သူ့စစ်တို့က မီးတင်ရှို့ခဲ့သည်ဟု အင်းလေးတော်လှန်ရေးတပ် အမှတ် ၁၀၀၉ (IPDF) ထံမှ သိရသည်။
“၂၀၂၂ တုန်းကလည်း တစ်ခါမီးရှို့ခံထားရပြီးပြီ။ အဲဒီတုန်းကတော့ အိမ်ခြေ ၅၀ကျော် ရှိတယ်။ ဒီတစ်ခါက နှစ်ကြိမ်မြောက် မီးရှို့ခံရတာပါ။ ကျနော်တို့ကတော့ စစ်ရေးအရ နယ်မြေတွေ လက်လွှတ်ပေးရတယ်” ဟု IPDF တပ်ရေးမှူး အင်းသွေးနီက မဲခေါင်ကို ယနေ့ဇွန် ၂၅ ရက်တွင် ပြောသည်။
ဆောင်နန်းခဲရွာဒေသခံများကတော့ ဇွန်လ ၂၃ ရက်ကတည်းက ဘေးလွတ်ရာများသို့ ထွက်ပြေးတိမ်းရှောင်နေကြရကြောင်း သိရသည်။
ဖယ်ခုံအင်းအရှေ့ဘက်ခြမ်း ကျေးရွာများကို စစ်ကောင်စီနှင့် PNO ပြည်သူ့စစ်တို့က အင်အား ၁၀၀၀ ကျော်ဖြင့် စစ်ကြောင်းထိုးလာသည့်အပြင် လေယာဥ်၊ လက်နက်ကြီးတို့ဖြင့် အပြင်းအထန် တိုက်ခိုက်နေမှုကြောင့် တော်လှန်ရေးဘက်က နေရာ ၃ ခုထက်မနည်း လက်လွှတ်ခဲ့ရကြောင်း သိရသည်။
ထိုသို့ တိုက်ပွဲများပြင်းထန်နေမှုကြောင့် ဖယ်ခုံအင်းအရှေ့ခြမ်းရှိ ဆောင်နန်းခဲ၊ လွယ်ပေါ၊ နမ့်ပေါ်လုံံ၊ လဟယ်၊ ပိန္နဲကုန်း၊ ကုန်းပေါ အပါအဝင် ကျေးရွာ ၁၅ ရွာက ဒေသခံ ထောင်ချီ စစ်ဘေးတိမ်းရှောင်နေရသည်။
မဟာ
#MeKongNews
#ဆောင်နန်းခဲကျေးရွာ
#စစ်ကောင်စီ
#PNO
#မီးရှို့
#ဖယ်ခုံအင်း
