မဲခေါင်၊ ဇွန် ၁၈
ဆိုင်ရှေ့တွင်ရှိသည့် လှေခါး ၅ ဆင့်ကို ကျော်ကာ တာချီလိတ်မြို့မရဲစခန်းမှူး၏ ဇနီးဖြစ်သူ မောင်းနှင်သည့်ကားက အထည်ဆိုင်တစ်ဆိုင်အတွင်းထဲအထိ ဝင်ရောက်တိုက်ခဲ့သည်။
ရှမ်းပြည်အရှေ့ပိုင်း၊ တာချီလိတ်မြို့၊ ဝမ်ကောင်းရပ်ကွက်တွင် ဇွန်လ ၁၆ ရက်နေ့ ညနေပိုင်းက ဝင်ရောက်တိုက်ခိုက်ခဲ့ခြင်းဖြစ်ပြီး အထည်ဆိုင်အကာအရံတချို့ ပျက်စီးသွားသော်လည်း လူထိခိုက်မှု မရှိခဲ့ကြောင်း၊ ဝင်တိုက်သည့်ကားမှာ လိုင်စင်မဲ့ကားဖြစ်ကြောင်း သိရသည်။
ဇွန်၁၆ရက်နေ့ ညနေ ၃ နာရီခန့်က တာချီလိတ်မြို့၊ မြသဟာဆေးရုံဘက်မှ မောင်းနှင်လာသော Crown အဖြူရောင်ကားတစ်စီးမှာ သင်းရနံ့လက်ဖက်ရည်ဆိုင်အကွေ့နားရှိ၊ ဘုရင့်နောင်စျေးနားမှ M အထည်ဆိုင်ကို လှေကားထစ်များကိုကျော်တက်ကာ ဆိုင်အတွင်းထိ အရှိန်မထိန်းနိုင်ဘဲ ဝင်ရောက်တိုက်ခိုက်မှု ဖြစ်ပွားခဲ့ပြီး ယင်းကားကို မောင်းနှင်သူမှာ တာချီလိတ်မြို့မရဲစခန်းမှ စခန်းမှူး၏ ဇနီးဖြစ်ကြောင်း သိရသည်။
“စခန်းမှူး မိန်းမတဲ့။ နာမည်တော့ မသိပါဘူး။ တွေ့တာတော့ ကားထဲမှာ ကြောင်ပြီးထိုင်နေတာ၊ အကြောက်လွန်တယ် ထင်တယ်။ ဘရိတ်နဲ့ လီဗာ မှားနင်းမိတယ် သိရတယ်။ ဆိုင်ကတော့ စခန်းမှူးမိန်းမနဲ့ ဘယ်လိုညှိတယ် မပြောတတ်ဘူး။ အမှုဖွင့်တယ် မကြားဘူး” ဟု နီးစပ်သူတစ်ဦးက မဲခေါင်ကို ပြောသည်။
ဖြစ်စဥ်တွင် ယင်းကားသည် အထည်ဆိုင်ထဲသို့ လှေခါး ၅ ထစ်ကျော်ကာ မှန်တံခါးများကို တိုက်ပြီး ဆိုင်အတွင်းပိုင်းထိ ဝင်ရောက်ခဲ့သော်လည်း စခန်းမှူးမိန်းမဖြစ်သည့်အတွက် အရေးယူမှု မရှိခြင်း၊ လိုင်စင်မဲ့ယာဉ် မောင်းနှင်သည့်အပေါ် အရေးယူမှု မရှိခြင်းတို့ကြောင့် ပြည်သူများက ဝေဖန်လျက်ရှိသည်။
“ခုလို ဝစ်သောက် (လိုင်စင်မဲ့ယာဉ်) တွေကို လူပါ ဖမ်းနေတဲ့အချိန် စခန်းမှူးမိန်းမ မကလို့ ဘယ်သူဖြစ်ဖြစ်၊ ဝင်သောက်မောင်းပြီး တိုက်တာကတော့ များသွားပြီ” ဟု ဒေသခံတစ်ဦးက ပြောသည်။
ဇွန်လဆန်းမှ စတင်ကာ တာချီလိတ်မြို့ အပါအဝင် နိုင်ငံတဝှမ်းတွင် လိုင်စင်မဲ့ယာဉ်များကို တင်းတင်းကြပ်ကြပ် အရေးယူနေသည့်အတွက် ပြည်သူများ အပြင်မထွက်ရဲဘဲ အလုပ်အကိုင်များ ထိခိုက်မှုရှိနေသည်။
မဲခေါင်
#MeKongNews
#တာချီလိတ်
#လိုင်စင်မဲ့ကား
#မြို့မရဲစခန်း
#ယာဉ်တိုက်မှု
