မဲခေါင်၊ ဇွန် ၁၀
ရှမ်းပြည်တောင်ပိုင်း၊ ပအိုဝ်းဒေသ၊ ဆီဆိုင့်မြို့နယ်ရှိကျေးရွာအုပ်စု ၂ခုမှ ပြည်သူ ၆ဝဝဝ ကျော်ကို ဇွန်လ ၁၅ ရက်နေ့နောက်ဆုံးထားပြီး ကျေးရွာအတွင်းမှ ထွက်သွားရမည်ဟု စစ်ကောင်စီလက်အောက်ခံ PNO ပြည်သူ့စစ်က မောင်းထုတ်နေကြောင်း သိရသည်။
တိုက်ပွဲဖြစ်မည်ဟု အကြောင်းပြကာ PNOပြည်သူ့စစ်က မောင်းထုတ်ခဲ့သည့် ကျေးရွာများမှာ ဆီဆိုင်မြို့နယ်၊ နောင်ကျောကျေးရွာအုပ်စုမှ တပူးထိုရွာ၊ ကောင်ထိုရွာ၊ လွယ်ငွန်းရွာ၊ နောင်ဗိုရွာ၊ ပင်စက်ရွာ နှင့် တောင်ရှေ့ကျေးရွာအုပ်စုမှ နောင်ထော်၆ရွာ ၊ ကလားလမ်ရွာတို့ဖြစ်ကြောင်း သိရသည်။
ယင်းကျေးရွာရှိ ဓဒသခံများအားလုံး ဇွန်လ ၁၅ ရက်နေ့နောက်ဆုံးထားပြီး ကျေးရွာအတွင်းမှ ထွက်သွားရမည်ဖြစ်ပြီး မထွက်သွားပါက တာဝန်မယူဟု PNO က စာပေးပို့ကာ ပြောဆိုထားခြင်းဖြစ်သည်။
ထို့အပြင် ကျေးရွာအတွင်းမှ ထွက်ခွါသည့်သူများအနေဖြင့်လည်း တောင်ယာနှင့် စစ်ဘေးရှောင်စခန်းသို့ သွားရောက်နေထိုင်ခြင်း မပြုရန် နှင့် ဆီဆိုင်မြို့ ဘုရားဖြူကျေးရွာ မွေတော်ဘုရားဝန်းသို့သာ ထွက်ခွါသွားရမည်ဟု PNO က ပို့လာသည့်စာတွင်ပါရှိသည်ဟု သိရသည်။
PNLA ပြောခွင့်ရ ခွန်ရိန်းယံက “အဲရွာလူထုတွေကို တော်လှန်ရေးနဲ့ ကင်းကွာအောင်လုပ်တာ၊ PNO ဆိုတာ လူထုရဲ့ ကျွေးမွေးမှုနဲ့ ဖြစ်လာတာ၊ ဒီလုပ်ရပ်ဟာ လူမျိုးအပေါ် သစ္စာဖောက်တာပဲ” ဟုမဲခေါင်ကိုပြောသည်။
ဘုရားဖြူရွာ၊ မွေတော်ဘုရားကုန်းကလွဲပြီး ကျန်နေရာများသို့ မသွားရဆိုသည်မှာ ရွာလူထုကို ထောင်လို ချုပ်နှောင်လိုက်ခြင်းဖြစ်ပြီး လူမျိုးအကျိုးထက် ခရိုနီနေဝင်းထွန်း၏ အကျိုးကိုလုပ်ဆောင်နေသည့်အဖွဲ့ဟု PNO ကို ဝေဖန်ပြောဆိုလိုက်သည်။
“PNO စာက အဲ့ရွာတွေက စစ်ဖြစ်နိုင်တယ်ခန့်မှန်းလို့ ရှောင်ဖို့နေရာပြောပြတာ၊ အကယ်၍ ရှောင်မသွားဘူးဆိုရင် စစ်ဖြစ်ခဲ့ရင် တာဝန်မယူဘူးအန္တရာယ်ရှိနိုင်တယ်ပြောတာ” ဟု ဒေသခံတစ်ဦးက စာပါအကြောင်းအရာကို ပြောသည်။
ယင်းစာအရ အချို့သောရွာသူရွာသားများ ဆီဆိုင်မြို့ဘက်သို့ စစ်ရှောင်လာနေကြသည်ဟု သိရသည်။
ယင်းကျေးရွာများတွင် ကျေးရွာအချို့သည် တော်လှန်ရေးနယ်မြေအတွင်းမှဖြစ်ပြီး ကျေးရွာအချို့သည် စစ်ကောင်စီနှင့်PNO ပြည်သူ့စစ်က ထိန်းချုပ်ထားသည့်ကျေးရွာများဖြစ်သည်။
ယင်းသို့ ဒေသခံများကို ကျေးရွာအတွင်းမှ ထွက်သွားရန် မောင်းထုတ်သည့်စာ ပေးပို့ပြီးနောက် ကျေးရွာအချို့တွင် စစ်ကောင်စီနှင့် PNO ပြည်သူ့စစ် ဝင်ရောက်တပ်စွဲခဲ့သည်။
PNLA နှင့် စစ်ရေးပူးပေါင်းတိုက်ပွဲဝင်နေသည့် အမှတ်၁၀၀၅ PDF တပ်၏ ရင်းမှူးဖြစ်သူ MOKI ကလည်း “ကျနော်တို့ တပ်ရင်းနဲ့ PNLA ပူးပေါင်းကာကင်းယူထားတဲ့ ရွာတွေလည်းပါတယ်ဗျ။ တချို့ရွာသွားလမ်းတွေကို PNO က ပိတ်ထားတယ်။ ဆန်ကအစ အကန့်အသတ်နဲ့ပေးသယ်တာ။ ခု ရွာတွေကမရှောင်ရင် ဖြတ်လေးဖြတ်လို လုပ်မယ်သိရတယ်” ဟု ဆိုသည်။
အဆိုပါ ရွာများတွင် စစ်ရှောင်များအပါအဝင် လူဦးရေ ၁၆၀၀ဝန်းကျင်ရှိသည်ဟု ၎င်းကဆိုသည်။
စစ်ကောင်စီနှင့်၎င်း၏လက်အောက်ခံ PNO ပြည်သူ့စစ်မှပြီးခဲ့သည့် ဇွန်လ၁ရက်နေ့တွင်ဆီဆိုင်မြို့နယ် နောင်ထော် ဒေသတွင်းသို့သော်လည်းကောင်း၊ ဇွန်လ ၂ရက်နေ့တွင် မောက်မယ်မြို့နယ်၊ ကဒူးကြီးဒေသ PNLO ဌာနချုပ်ကို ဦးတည်၍ ဗန်းမတ်ဒေသတွင်း သို့တွင် လည်းကောင်း တိုက်ပွဲဖြစ်ပွါးခြင်းမရှိပဲ လက်နက်ကြီးဖြင့် ၁၀ ကြိမ်ထက်မနည်း မှန်းတမ်းပစ်ခတ်ခဲ့သေးသည်။
လက်ရှိ ဇွန် ၈ရက်တွင် စစ်ကောင်စီက ဖယ်ခုံအင်းအရှေ့နှင့် ပင်လောင်းဘက်တွင် အင်အားသုံး၍ စစ်ရေးအရှိန် တိုးမြင့်လာနေသဖြင့် ပြည်သူအများ ထွက်ပြေးတိမ်းရှောင်နေရသည်။
မဟာ
#MeKongNews
#ဆီဆိုင်မြို့နယ်
#ပြည်သူလူထု
#PNO
#PNLO
