မဲခေါင်၊ မေ ၂၀
ကျိုင်းတုံမြို့တွင် ဆိုင်ကယ်လာသူ အမျိုးသမီးကို လူ ၆ ဦးက လမ်းပိတ်ပြီး ဓားဖြင့်ခြိမ်းခြောက်ကာ ဆိုင်ကယ်၊ ဖုန်းများနှင့်ငွေများ လုယက်သွားကြောင်း သိရသည်။
ယနေ့ မေလ ၂၀ ရက်၊ မွန်းတည့် ၁၂ နာရီခန့်တွင် ကျိုင်းတုံမြို့မှ လွယ်မွေသွားလမ်း၊ နမ့်ပန်ချောင်းအဆင်း မရောက်မီ မီးသင်္ဂြိုလ်စက်အနီးတွင် အမျိုးသမီးတစ်ဦးမောင်းနှင်လာသည့် ၂၀၂၃၊ ၆ လပိုင်း မော်ဒယ်၊ ခဲပြာရောင် Honda Wave 125i ဆိုင်ကယ်အား လားဟူလူမျိုး ၆ ဦးမှ လမ်းအားပိတ်၍ ဓားဖြင့်ချိန်ရွယ်ပြီး ဆိုင်ကယ်နှင့်တကွ Redmi Note 14 pro+ နှင့် Redmi Note 13 ဖုန်း ၂ လုံးနှင့် ပိုက်ဆံ ကျပ် ၂ သိန်းခန့်အား ယူဆောင်သွားကြောင်း လုယက်ခံရသူနှင့် နီးစပ်သူက မဲခေါင်ကို ပြောသည်။
“ဆိုင်ကယ်က ၆၅ သိန်းရှိတယ်။ ဖုန်းတစ်လုံးက တစ်သိန်း၊ တစ်လုံးက ၆ သိန်းခွဲတန်တယ်။ ဓား ၂ လက်နဲ့ လားဟူ ၆ ယောက်ပါ။ ဖြစ်စဉ်ဖြစ်ပီး ၁၀ မိနစ် အတွင်း လိုက်ရှာပါတယ်။ ဓရန နဲ့ နယ်ထိန်း အကုန်လုံးပြောထားပါတယ်ဗျ။ အမှုဖွင့်ထားပါပြီ” ဟု ၎င်းကပြောသည်။
ကျိုင်းတုံတွင် ရန်ဖြစ်၊ ခိုးဆိုးလုယက်၊ သတ်ဖြတ်မှုများ နေ့စဥ်လိုဖြစ်ပွားနေသဖြင့် လုံခြုံမှုမရှိဘဲ စိုးရိမ်နေရကြောင်း ဒေသခံများက ပြောဆိုနေကြသည်။
မေလ ၁၈ ရက် နေ့လယ် ၂ နာရီခွဲခန့်ကလည်း ကျိုင်းတုံမြို့ရှောင်လမ်းအနီး ဆင်နှစ်ကောင်အနောက်ဖက်တွင် မြို့ထဲ အလုပ်လာသူတစ်ဦးကို ဓားနှင့်ခုတ်ပြီး ဖုန်း၊ ဆိုင်ကယ်လုယူသွားကာ လုယက်ခံရသူမှာ နားရွက်တစ်ဖက် ဒဏ်ရာရခဲ့သည်။
မကြာသေးမီက ကျိုင်းတုံမြို့ရှောင်လမ်းမှာပင် ပွင့်ဦးခိုင် ပန်းအလှဆင်ဆိုင်ပိုင်ရှင် စိုင်းစွမ်ဆီ အသတ်ခံရသည့်အမှုမှာလည်း ယခုထိ တရားခံမမိသေးကြောင်း သိရသည်။
ကျိုင်းတုံရှိ လူဦးရေအရ လူ ၅၀၀၀ လျင် ရဲတစ်ဦးသာ ရှိနေသလို မြို့ပြင်ဘက်တွင် အမှုဖြစ်ပါက နယ်မြေအကန့်အသတ်များရှိနေသည်ဟု ရဲစခန်းနှင့်နီးစပ်သူတစ်ဦးက မဲခေါင်သို့ ပြောသည်။
#MeKongNews
#ကျိုင်းတုံ
#ဆိုင်ကယ်လုယက်
#လွယ်မွေ
#နမ့်ပန်ချောင်း
#လုယက်မှု
