မဲခေါင်၊ မေ ၄
TNLA ထိန်းချုပ်ထားသည့် နယ်မြေများအတွင်း အတူတကွယှဉ်တွဲနေထိုင်သည့် တိုင်းရင်းသားများကြား ဖြစ်ပွားသည့် ပြဿနာများကို မိတ်ဖက်ပြဿနာဟု သဘောထားဖြေရှင်းသွားမည်ဖြစ်ကြောင်း TNLA က မေလ ၄ ရက် သတင်းစာရှင်းလင်းပွဲတွင် ပြောသည်။
သတင်းစာရှင်းလင်းပွဲ၌ မဲခေါင်သတင်းဌာနက မေးမြန်းသည့် ဒေသတွင်းမှာ အတူတကွနေထိုင်သည့် တိုင်းရင်းသားများကြား နယ်မြေအငြင်းပွားမှုများကို မည်သည့်မူဝါဒဖြင့် ဖြေရှင်းသွားမည်နည်း ဆိုသည့် မေးခွန်းကို TNLA တွဲဖက်အထွေထွေအတွင်းရေးမှူး – ၂ ဗိုလ်မှူးကြီးတားပန်လက ပြန်လည်ဖြေကြားရာတွင် ထည့်သွင်းပြောဆိုခြင်း ဖြစ်သည်။
TNLA အနေဖြင့် အတူယှဉ်တွဲနေထိုင်သည့် တိုင်းရင်းသားများကြား ဖြစ်ပွားနေသည့် ပြဿနာများကို နယ်မြေအငြင်းပွားမှုဟု မသတ်မှတ်ကြောင်း၊ TNLA က တာဝန်ယူအုပ်ချုပ်ရသည့် ရပ်ရွာများတွင် ယခင်က ပြောက်ကျားအုပ်ချုပ်ရေးစနစ်ဖြင့်သာ အုပ်ချုပ်နိုင်ခဲ့သော်လည်း ၁၀၂၇ စစ်ဆင်ရေးနောက်ပိုင်း လူထုကိစ္စများကို အပြည့်အဝ တာဝန်ယူအုပ်ချုပ်လာရကြောင်း၊ ယင်းတာဝန်မှာ ကြီးမားပြီး ဒေသတစ်ခုအတွင်း လက်နက်ကိုင်အဖွဲ့အစည်းများစွာရှိခြင်းက လူထုလုံခြုံမှုအတွက် စိန်ခေါ်မှုဖြစ်ရကြောင်း၊ ထို့ကြောင့် တတ်နိုင်သမျှ လက်နက်များမပွားများအောင် ဆောင်ရွက်နေကြောင်း ဗိုလ်မှူးကြီးတားပန်လက ပြောသည်။
“စကစအဖွဲ့အစည်းနဲ့ စကစအောက်မှာရှိတဲ့ အဖွဲ့အစည်းတွေကလွဲရင် အကုန်လုံးသော ညီအကိုတိုင်းရင်းသားအဖွဲ့အစည်းတွေကို မဟာမိတ်လို့ပဲ သတ်မှတ်ထားပါတယ်။ တချို့ဆိုရင်တော့ ကျနော်တို့ စာချုပ်စာတမ်းနဲ့ ရေးထိုးပြီးမှ သဘောတူထားတာရှိတယ်။ တချို့နဲ့က စာချုပ်စာတမ်းမရှိပေမယ့် ကျနော်တို့က ဘဝတူတိုင်းရင်းသားတွေ၊ ဘဝတူ မဟာမိတ်တွေလို့ နားလည်ပါတယ်။ အဲဒီလိုပဲသတ်မှတ်ထားပါတယ်။ ပြီးတော့ ဖြစ်ပေါ်လာတဲ့ ပြဿနာအားလုံးကိုလည်း မိတ်ဖက်ရေးရာ ပြဿနာလို့ သတ်မှတ်ပြီးမှ ဖြေရှင်းနေပါတယ်” ဟု ၎င်းက ပြောသည်။
ယခုကဲ့သို့ ပြဿနာများ ဖြစ်ပွားရခြင်းသည် မြန်မာနိုင်ငံတွင် ဒီမိုကရေစီဆိတ်သုဉ်းကာ နိုင်ငံရေးယဉ်ကျေးမှု ပျောက်ဆုံးသွားခြင်းကြောင့်ဖြစ်ကြောင်း၊ နိုင်ငံရေးအရဖြေရှင်းနိုင်သည့် နေရာကျဉ်းမြောင်းကာ အခြားနည်းလမ်းများကို ရွေးချယ်ရသည့်အတွက် ပြဿနာပေါ် ပြဿနာ ဆင့်လာခြင်းဖြစ်ကြောင်း၊ ဒီမိုကရေစီပြန်လည်ရရှိကာ လူထုဆန္ဒဖြင့်အုပ်ချုပ်နိုင်မှသာလျှင် ယခုပြဿနာများပြေလည်သွားမည်ဟု နားလည်ကြောင်း ဗိုလ်မှူးကြီး တားပန်လက ပြောသည်။
TNLA အနေဖြင့် ၁၀၂၇ စစ်ဆင်ရေး ၂ အပြီး ရှမ်းပြည်မြောက်ပိုင်းရှိ နမ္မတူ၊ နမ့်ဆန်၊ နမ့်ခမ်း၊ ကွတ်ခိုင်၊ မန်တုံ၊ မိုင်းလုံ၊ မိုင်းငေါ့၊ နောင်ချို၊ မိုးကုတ်၊ မိုးမိတ်၊ ကျောက်မဲနှင့် သီပေါမြို့နယ်များကို ထိန်းချုပ်ထားနိုင်ခဲ့ပြီး အုပ်ချုပ်ရေးလုပ်ငန်းများ လုပ်ကိုင်လျက်ရှိသည်။
ယင်းမြို့နယ်များတွင် ကချင်တပ် KIA ၊ ရှမ်းတပ် SSPP ၊ ကိုးကန့်တပ်ဖွဲ့ MNDAA တို့ ရှိနေပြီး မဟာမိတ်တပ်ဖွဲ့များကြား ထိတွေ့မှုများ ဖြစ်ပွားလေ့ရှိသည်။ ပြီးခဲ့သည့် မတ်လအတွင်းက ကွတ်ခိုင်မြို့တွင် TNLA နှင့် KIA တပ်ဖွဲ့တို့ကြား အငြင်းပွားမှုများ ဖြစ်ပွားခဲ့ပြီး နမ့်ခမ်း၊ မိုင်းတုံနှင့် ကွတ်ခိုင်မြို့နယ်တို့တွင်လည်း ဇန်နဝါရီလမှ စတင်ကာ TNLA နှင့် KIA တို့ကြား အငြင်းပွားမှုများ ဖြစ်ပွားခဲ့သည်။
KIA နှင့် TNLA တို့ကြား ဖြစ်ပွားနေသည့် ပြဿနာများကို အဖြေရှာရန်အတွက် TNLA နှင့်သာမက ရှမ်းမြောက်ရှိ ပြည်သူလူထုနှင့်ပါ တွေ့ဆုံရန် ပြင်ဆင်နေကြောင်း KIA က မတ်လအတွင်း၌ ထုတ်ဖော်ပြောဆိုထားသည်။
#MeKongNews
#TNLA
#KIA
#ရှမ်းမြောက်
#မိတ်ဖက်ပြဿနာ
