မဲခေါင်၊ ဧပြီ ၂၅
ဘိလပ်မြေကို ကျောက်မှုန့်များဖြင့် ရောစပ်ကာ ရောင်းချနေသူကို တောင်ကြီးမြို့နယ်၊ အေးသာယာတွင် ဧပြီလ ၂၃ရက်က ဖမ်းဆီးလိုက်ကြောင်း ဒေသခံများထံမှ သိရသည်။
ဧပြီလ ၂၃ ရက်နေ့က သုံးစွဲသူတိုင်ကြားမှုအရ အေးသာယာမြို့၊ ရပ်ကွက် (၅)ရှိ ပြည့်စုံအောင် အိမ်ဆောက်ပစ္စည်းအရောင်းဆိုင်၏ ဘိလပ်မြေဂိုထောင်ကို ရဲများနှင့်တာဝန်ရှိသူများ သွားရောက်စစ်ဆေးခဲ့ရာ ဘိလပ်မြေကို ကျောက်မှုန့်များရောစပ်နေသည်ကို တွေ့ရှိခဲ့ရသဖြင့် ဖမ်းဆီးထိန်းသိမ်းခဲ့ခြင်း ဖြစ်ကြောင်း အေးသာယာဒေသခံတစ်ဦးက ပြောသည်။
“တိုင်ခံရလို့သွားဖမ်းကြတာ၊ သူ့ဘိလပ်မြေအိတ်မှာ ဘိလပ်မြေကတစ်ကော်ပဲပါတာတဲ့၊ လူတွေကအဆောက်အအုံပြိုလို့ သေနေပါတယ်ဆို” ဟု ၎င်းကပြောပြသည်။
စစ်ဆေးရာတွင် CANDA တံဆိပ်ဘိလပ်မြေ ၆ဘီးကားတစ်စီး၊ ကျောက်မှုန့်ရောစပ်ပြီးသားဖြစ်သည့် Shan Yoma၊ APACHE ၊ ကြံံနှစ်ကောင် တံဆိပ်များပါသည့် ဘိလပ်မြေအိတ်ပေါင်း ၄၇၉ အိတ်၊ ကျောက်မှုန့်အိတ် ၅၃၅ အိတ်၊ တံဆိပ်မျိုးစုံပါ ဘိလပ်မြေအိတ်ခွံ ၃သောင်းကျော်နှင့် ဘိလပ်မြေရောစပ်ရာတွင် အသုံးပြုသည့်ကိရိယာများကို သိမ်းဆည်းရမိခဲ့ကြောင်းသိရသည်။
အေးသာယာနယ်မြေ ရဲစခန်းက ဆိုင်ပိုင်ရှင်ဖြစ်သူ ဦးစိုးတင့်အောင် (ခ) မောင်စိုး နှင့် အလုပ်သမား ၇ ဦးကို လိမ်လည်မှု၊ ကုန်ပစ္စည်းအတုထုတ်လုပ်မှု၊ လိမ်လည်ရန်အားပေးကူညီမှု ပုဒ်မများဖြစ်သော ရာဇသတ်ကြီးပုဒ်မ ၄၂၀၊ ၄၆၈၊ ၄၈၆၊ ၁၁၄ တို့ဖြင့် တရားစွဲဆိုထားပြီး ဆိုင်ပိုင်ရှင်ဖြစ်သူ ဦးစိုးတင့်အောင် (ခ) မောင်စိုး က ငွေပေးကာ အာမခံဖြင့်လွတ်မြောက်ရန် တရားရုံးတာဝန်ရှိသူများနှင့် ညှိနှိုင်းနေကြောင်း သိရသည်။
“တရားရုံးမှာ အာမခံယူဖို့လုပ်နေတယ်။ အခုတရားရုံးက အရမ်းဆိုးနေပြီ။ ပိုက်ဆံပေးရင် နိုင်ငံရေးအမှုကလွဲရင် အကုန်ရတယ်” လို့ တရားရုံးနှင့် နီးစပ်သူတစ်ဦးက မဲခေါင်ကိုပြောပြသည်။
တောင်ကြီးမြို့၊ အနောက်မြို့ပတ်လမ်းပေါ်တွင်လည်း ပြည့်စုံအောင် အိမ်ဆောက်ပစ္စည်းဆိုင် ဖွင့်ထားပြီး အခြား ဆိုင်ခွဲ ၃ ဆိုင်ခန့်ရှိသေးကြောင်းသိရသည်။
မတ်လကုန်ခန့်ကဖြစ်ပွားခဲ့သည့် စစ်ကိုင်းငလျင်အပြီး ဝယ်လိုအားတက်လာသော အိမ်ဆောက်ပစ္စည်းများထဲမှ ဘိလပ်မြေအိတ်များအား အမြတ်၁၀ ရာခိုင်နှုန်းအထက် ရောင်းချနေသည့် ရှမ်းတောင် မြို့နယ် ၃ ခုအတွင်းရှိ အိမ်ဆောက်ပစ္စည်းဆိုင် ၃ရာကျော်ကိုစစ်ဆေးခဲ့ရာ ၃၂ ဆိုင် တွေ့ရှိခဲ့ကြောင်းသိရသည်။
နန်းမွန်း
#MeKongNews
#တောင်ကြီး
#ဘိလပ်မြေ
#တရားရုံး
#အာမခံ
