မဲခေါင်၊ ဧပြီ ၁၈
MNDAA တပ်၏ အထူးဒေသ (၁) အဖြစ် အုပ်ချုပ်ခဲ့သော လားရှိူးမြို့အုပ်ချုပ်ရေးပိုင်းကို လွှဲပြောင်းရယူမည့် စစ်ကောင်စီ လက်အောက်ခံ ဌာနဆိုင်ရာဝန်ထမ်းများ ယနေ့ ဧပြီလ ၁၈ ရက်တွင် စတင်ဝင်ရောက်လာပြီဖြစ်ကြောင်း ဒေသခံများထံမှ သိရသည်။
စစ်ကောင်စီဌာနဆိုင်ရာ ဝန်ထမ်းအချို့ မိုင်းရယ်၊ နမ့်ပေါင်ဘက်မှ အိမ်စီးကား အစင်းရေ ၂၀ ကျော်ဖြင့် ဧပြီလ ၁၈ ရက် ယနေ့နံနက်ပိုင်းတွင် ထွက်ခွာလာခဲ့ခြင်းဖြစ်ပြီး စစ်ကောင်စီတပ်များ မပါဝင်သေးကြောင်း၊ လုံခြုံရေးကို UWSA “ဝ”တပ်ဖွဲ့ ရယူပေးထားကြောင်း ဒေသခံတဦးက မဲခေါင်ကိုပြောသည်။
“တပ်မပါဘူး၊ ဌာနစုံ ဒီနေ့မှတရားဝင် ဝင်လာတာ။ “ဝ”တပ်က ဘေးဝန်းကျင်က လုံခြုံရေးပေးတယ်။ ပေါ်ပေါ်ထင်ထင်တော့မဟုတ်၊ အိမ်စီးကား ၂၀ ကျော်တယ်” ဟု ၎င်းကဆိုသည်။
လားရှိုးမြို့အဝင်အထွက်လမ်းများ ပိတ်ထားခဲ့ခြင်းမှာ ဧပြီလ ၁၈ ရက်မတိုင်ခင် ရက်ပိုင်းတွင် စစ်ကောင်စီဘက်မှ အရပ်ဝတ်များဖြင့် ဝင်ရောက်လာမှုမရှိစေရေးအတွက် MNDAA တပ်မှ မြို့ဝင်မြို့ထွက်များကို ခေတ္တပိတ်ထားခဲ့ခြင်းဖြစ်ပြီး လက်ရှိတွင် ပြန်ဖွင့်ပြီဖြစ်ကြောင်း MNDAA စစ်ရေးသတင်းရင်းမြစ်တဦးက ပြောသည်။
“လားရှိုးက အခုတော့ စစ်တပ်တော့ ဝင်မလာသေးဘူး။ လောလောဆယ်တော့ ပြန်ဖွင့်ထားတယ်။ ဒီနေ့အဖွဲ့တစ်ဖွဲ့ရောက်မယ်လို့တော့ ကြားထားပါတယ်။ ဘယ်အဖွဲ့ဆိုတာတော့ မသိသေးဘူး” ဟု ၎င်းကပြောသည်။
စစ်ကောင်စီတပ်နှင့် လက်အောက်ခံ ဌာနဆိုင်ရာဝန်ထမ်းများ ပြန်လည်ဝင်ရောက်လာသည့်အတွက် ဒေသခံများအကြားဝေဖန်မှုများရှိနေပြီး ယခုရက်ပိုင်းအတွင်း လူငယ်အချို့နှင့်နိုင်ကျဉ်းများ CDM ဝန်ထမ်းများ လားရှိုးမြို့က ထွက်ခွာခဲ့ကြသည်။
ယခုဝင်ရောက်လာသော ဌာနဆိုင်ရာဝန်ထမ်းအဖွဲ့သည် မည်သည့်ဌာနမှဖြစ်ကြောင်း မဲခေါင်မှ အတည်ပြုနေဆဲ ဖြစ်သည်။
လားရှိုးမြို့မှ ဧပြီလ ၂၂ ရက်နေ့နောက်ဆုံးထားကာ MNDAA တပ်များ လားရှိုးမြို့ပေါ်မှ ဆုတ်ခွာရမည်ဖြစ်ပြီး မြို့ပေါ် ၁၂ ရပ်ကွက်ကို စစ်ကောင်စီအုပ်ချုပ်ရေး လည်ပတ်သွားမည်ဖြစ်ကြောင်း၊ MNDAA တပ်များကမူ မြို့ပြင်ပတ်လည်တွင်ရှိနေမည်ဖြစ်ကြောင်း မဲခေါင်သတင်းဌာနက စုံစမ်းသိထားရသည်။
လားရှိုးမြို့ကို ၁၀၂၇ စစ်ဆင်ရေးဒုတိယလှိုင်း ၂၀၂၄ သြဂုတ်လဆန်းအတွင်း MNDAA နှင့် ပြည်သူ့ကာကွယ်ရေးတပ်များ၊ ညီနောင်မဟာမိတ်တပ်များမှ သိမ်းပိုက်နိုင်ခဲ့ကာ MNDAA အုပ်ချုပ်ရေးလည်ပတ်ခဲ့ပြီး ထိန်းချုပ်ကာလ ၈ လကျော်အကြာတွင် ပြန်လည်ဆုတ်ခွာခဲ့ရခြင်း ဖြစ်သည်။
ထိုသို့ကိုးကန့်တပ်များ ပြန်လည်ဆုတ်ခွာပေးရခြင်းမှာ တရုတ်အစိုးရ၏ ဖိအားများစွာပါဝင်နေပြီး ယင်းအပေါ် ပြည်သူအများစုက နှစ်ခြိုက်ခြင်းမရှိဘဲ ဝေဖန်နေကြသည်။
လားရှိုးမြို့သည် စစ်ကောင်စီတပ်၏ တိုင်းစစ်ဌာနချုပ်အခြေစိုက်ရာ ရှမ်းပြည်မြောက်ပိုင်း၏ မြို့တော်ဖြစ်ပြီး လားရှိုးမြို့ကိုသိမ်းပိုက်ရရှိစဉ် အရှေ့မြောက်တိုင်းစစ်ဌာနချုပ်တိုင်းမှူး ဗိုလ်ချုပ်စိုးတင့်၊ အမှတ် (၁) စစ်ဆင်ရေးကွပ်ကဲမှုဌာနချုပ်မှူး ဗိုလ်မှူးချုပ်မျိုးမင်းထွေးနှင့် တိုင်းဦးစီးမှူး ဗိုလ်မှူးချုပ်သန့်ထင်စိုးတို့ကို MNDAA မှ သုံ့ပန်းအဖြစ် ဖမ်းဆီးရမိခဲ့ပြီး ဖေဖော်ဝါရီလထဲတွင် ဗိုလ်မှူးချုပ်သန့်ထင်စိုးကို ပြန်လွှတ်ပေးခဲ့သည်။
ဂနိုက်
#MeKongNews
#လားရှိုး
#MNDAA
#စစ်ကောင်စီ
#အုပ်ချုပ်ရေး
