မဲခေါင်၊ ဧပြီ ၁
ရှမ်းပြည်တောင်ပိုင်း အောင်ပန်းနှင့် တောင်ကြီးမြို့တို့ ငလျင်ဒဏ်သင့် အဆောက်အအုံများရှေ့မှ ရှင်လောင်းလှည့်ခြင်း၊ စီတန်းအလှူပြုလုပ်ခြင်းများအပေါ် လူအများက ဝေဖန်ကြသည်။
ယနေ့ ဧပြီ ၁ နံနက်ပိုင်းက အောင်ပန်းမြို့ရှိ ငလျင်ကြောင့်ပြိုကျထားသော ဟိုတယ်အောင်ပန်းအား ကယ်ဆယ်ရေးပြုလုပ်နေဆဲရှေ့မှ ရှင်ပြုအလှူပြုလုပ် လှည့်လည်ခဲ့ကြပြီး ယခုကဲ့သို့ လူအများသေကြပူဆွေးနေရချိန်တွင် ယင်းသို့ပြုလုပ်ခြင်းအပေါ်ဝေဖန်ကြခြင်းဖြစ်သည်။
ကိုယ်တိုင်ကြုံတွေခဲ့သည့် အောင်ပန်းဒေသခံ အမျိုးသမီးတစ်ဦးက “အထဲမှာ မိန်းကလေး ၃ ယောက်ကျန်နေသေးတယ်။ ညက အော်နေတယ်တဲ့၊ အဆောက်အဦးရှေ့မှာ မိဘတွေထိုင်စောင့်နေတာ အားနာသင့်ပါတယ်။ တခြားလမ်းက ပါတ်မသွားဘူး” ဟု မှတ်ချက်ပေးထားသည်ကို တွေ့ရသည်။
ထို့အတူ မတ်လ ၃၀ရက်နေ့ကလည်း တောင်ကြီးမြို့မိန်းလမ်းတလျှောက် ရှင်ပြုအလှူရှင်များ လှည့်လည်ခဲ့ကြပြီး ပျူစောထီးများက လုံခြုံရေးယူပေးခဲ့ကြောင်း၊ မိန်းလမ်းတလျှောက် မြို့ပတ်လှည့်လည်ခဲ့ရာ ငလျင်ကြောင့် အဆောက်အအုံ ပျက်စီးမှုရှိ၍ ယာယီပိတ်ထားရသော City Square Shopping Centre ရှေ့ထိ လှည့်လည်ခဲ့သောကြောင့် မြင်တွေ့ခဲ့သော ပြည်သူများက ဝေဖန်ခဲ့ကြသည်။
“ရှင်လောင်းလှည့်တာ ဘယ်ရပ်ကွက်ကလဲ မသိဘူး ပျုစောထီးတွေက လုံခြုံရေးယူပေးထားတယ်။ ဆင်တွေ၊ မြင်းတွေနဲ့လှည့်တာ၊ ပျူတွေက ပြောက်ကျားဝတ်စုံကို လက်မောင်းဘက်တံဆိပ်က မြန်မာနိုင်ငံမြေပုံပေါ်မှာ အလံအရောင် ၃ ခု ခြယ်ထားပြီး တောင်ကြီး -၂ လို့ တပ်ထားတယ်” ဟု ကိုယ်တိုင်မြင်တွေ့ခဲ့ရသည့် တောင်ကြီးမြို့ဒေသခံအမျိုးသမီးက ပြောသည်။
မတ်လ ၂၈ ရက်နေ့က ငလျင်လှုပ်ခတ်ခဲ့သည့် နေ့ကလည်း ထီးတော်ကျိုးကျ ပျက်စီးခဲ့ရသည့် ဟိုပုံးမြို့၊ ဟိုပုံးမွေတော်ဘုရားရှေ့ဝန်းအတွင်း အလှူပြုလုပ်ခဲ့ရာ ည၁၀နာရီကျော်အထိ အသံချဲ့စက်များဖြင့် သီချင်းဖွင့်ကာကခုန်ခဲ့ကြသဖြင့် အနီးနားရှိဒေသခံများ စိတ်အနှောင့်အယှက် ဖြစ်ခဲ့ရကြောင်း သိရသည်။
အင်အား ၇.၇ ရစ်ချ်တာစကေးရှိ စစ်ကိုင်းပြတ်ရွေ့ကြောငလျင်ကြောင့် မန္တလေးတိုင်းနှင့် စစ်ကိုင်းတိုင်းတို့အပါအဝင် ရှမ်းတောင်၊ အောင်ပန်း၊ တောင်ကြီး နှင့် ညောင်ရွှေ၊ အင်းလေးဒေသတို့မှာ ပျက်စီးဆုံးရှုံးမှုများခဲ့ကြသည်။
ထိုဒေသများ အထူးသဖြင့် လူသေဆုံးမှု ၁၀၀ နီးပါးရှိပြီး အိမ်ခြေထောင်ဂဏန်းခန့်ပျက်စီးခဲ့သည့် အင်းလေးဒေသအား နိုင်ငံအဝှမ်းမှပြည်သူများက လူသားချင်းစာနာထောက်ထားစွာဖြင့် လာရောက်ကူညီရန်ကြိုးစားနေကြစဉ် ဒေသခံပြည်သူတချို့က ယခုလို ပျော်ရွှင်စွာ လှည့်လည်ပြခြင်းအပေါ် ဝေဖန်မှုများရှိနေခြင်းဖြစ်သည်။
ပုံ ၁ – ယနေ့မနက် အောင်ပန်းရှင်ပြုပွဲ
ပုံ ၂ – မတ်လ ၃၀ ရက်က တောင်ကြီးမြို့ City Squareအဆောက်အအုံရှေ့ ရှင်လောင်းလှည့်စဉ် လုံခြုံရေးယူပေးနေသော ပျူစောထီးအား ဝတ်စုံပြည့်၊ ဘတ်တံဆိပ်အပြည့်ဖြင့် တွေ့ရစဉ်
နန်းမွန်း
#MeKongNews
#တောင်ကြီး
#အောင်ပန်း
#ညောင်ရွှေ
#အင်းလေး
#ငလျင်
#ပျူစောထီး
Photo – Credit to Owner
