မဲခေါင်၊ မတ် ၂၀
မတ်လ ၆ ရက်နေ့နှင့် ၇ ရက်နေ့တို့တွင် ရန်ကုန်မြို့၌ ဖမ်းဆီးရမိသော ငွေကျပ်သိန်းပေါင်း ၉၆ ဘီလီယံကျော် တန်ဖိုးရှိ မူးယစ်ဆေးဝါးများသည် အာရက္ခတပ်တော် – AA ၏ စီးပွားရေးတာဝန်ခံ ရဲဝင်း(ခ)ကျော်စိုးလင်းနှင့် ပတ်သက်နေကြောင်း စစ်ကောင်စီ ထုတ်ပြန်ချက်မှာ စွပ်စွဲမှုသာဖြစ်ပြီး ၎င်းတို့နှင့် ပတ်သက်မှု မရှိကြောင်း AA က တုံ့ပြန်လိုက်သည်။
စစ်ကောင်စီဖော်ပြချက်များသည် စွပ်စွဲချက်များနှင့်စွပ်စွဲသတင်းများသာဖြစ်ပြီး အာရက္ခတပ်တော်နှင့် ပတ်သက်ခြင်း လုံးဝ မရှိကြောင်း၊ မူးယစ်ဂိုဏ်းတစ်ခုမှ မူးယစ်ဆေးဝါးဖမ်းမိသောကိစ္စရပ်ထဲတွင် မိမိတို့အဖွဲ့အစည်းအား မဆီမဆိုင် အတင်းယိုးစွပ်သည့် စွပ်စွဲချက်သည် ယုတ္တိလုံးဝမရှိသည့်အပြင် နိုင်ငံရေးသိက္ခာချသော စွပ်စွဲချက်တစ်ခုသာဖြစ်ကြောင်း အာရက္ခတပ်တော်က မနေ့က (မတ်လ ၁၉ ရက်နေ့)တွင် ထုတ်ပြန်သည်။
၎င်းအပြင် စစ်ကောင်စီတပ်သည် မိမိတို့အဖွဲ့အစည်းအား စစ်ရေးအရ ရှုံးနိမ့်နေသည့်ကာလဖြစ်သည့်အပြင် ပြည်တွင်း၊ အိမ်နီးချင်းနိုင်ငံများနှင့် နိုင်ငံတကာအလယ်၌ အရှက်ရနေသောအချိန်လည်း ဖြစ်နေသောကြောင့် ရှက်ရမ်းရမ်းကာ မိမိတို့အဖွဲ့အစည်းအား အငြိုးအတေးကြီးစွာဖြင့် နိုင်ငံရေးအရ ထိုးနှက်တိုက်ခိုက်မှုတစ်ခုလည်း ဖြစ်သည်ဟု ထုတ်ပြန်ချက်တွင် ဖော်ပြထားသည်။
ဒုစရိုက်မှုများ၊ မူးယစ်ဆေးဝါးကိစ္စများအပြင် အွန်လိုင်းလိမ်လည်လောင်းကစား ကျားဖျန့်ကိစ္စများသည်လည်း စစ်ကောင်စီထိန်းချုပ်ထားနေရာများ (နေပြည်တော်၊ ရန်ကုန်၊ မန္တလေး)၊ စစ်ကောင်စီမှ ခေတ်အဆက်ဆက် လက်သပ် မွေးထားသော ပြည်သူ့စစ် ကြီးစိုးထိန်းချုပ်ရာ နယ်မြေများနှင့် အကျင့်ပျက် အဂတိလိုက်စား လာဘ်ပေးလာဘ်ယူ စစ်ဗိုလ်ချုပ်ကြီးများ ပိုင်ဆိုင်သောနေရာများတွင်သာ အဓိကတွေ့ရလေ့ရှိသည်ဟု AA က ဆိုသည်။
လောင်းကစား၊ မူးယစ်ဆေးဝါး ကိစ္စရပ်များအားလုံးတွင် ခြစား၊ လာဘ်စား စစ်ကောင်စီ ဗိုလ်ချုပ်ကြီးများ၏ ပါဝင်ပတ်သက်နေမှုများရှိနေပြီး ငြင်းမရသော သက်သေအထောက်အထားများမှ သက်သေခံလျက်ရှိသည်မှာ ကမ္ဘာသိပင်ဖြစ်ကြောင်း AA ၏ ထုတ်ပြန်ချက်တွင် ဖော်ပြထားသည်။
မဲခေါင်မှ စောင့်ကြည့်ထားသော စာရင်းများအရ မြန်မာနိုင်ငံဒေသအသီးသီးသို့ ဝင်ရောက်သည့် မူးယစ်ဆေးဝါးအမျိုးအစားအစုံသည် ရှမ်းပြည်အတွင်းမှအဓိကထွက်ရှိနေပြီး ရောင်းဝယ်ဖောက်ကား သုံးစွဲသူများကိုသာ စစ်ကောင်စီက ဖမ်းဆီးနေကာ ထုတ်လုပ်သူများကိုတော့ စစ်ကောင်စီဘက်မှရော တော်လှန်ရေးတပ်များကပါ ဖမ်းဆီးနိုင်ခြင်း မရှိသေးချေ။
ဂနိုက်
#MeKongNews
#AA
#မူးယစ်ဆေးဝါး
#စစ်ကောင်စီ
#အာရက္ခတပ်တော်
