မဲခေါင်၊ မတ် ၁
ရှမ်းပြည်တောင်ပိုင်း၊ တန့်ယန်းအခြေပြု အရှေ့မြောက်ပိုင်းတိုင်းစစ်ဌာနချုပ် (ရမခ) တိုင်းမှူးနှင့် အရာရှိကြီးတချို့ ကျားဖြန့် နှင့်ပတ်သက်ပြီး စစ်ခေါင်းဆောင် မင်းအောင်လှိုင်က ဖမ်းဆီးခဲ့ကြောင်း မဲခေါင်သတင်းရင်းမြစ်များထံမှ သိရသည်။
ထိုသို့ ဖမ်းဆီးမှုသည် ဖေဖော်ဝါရီ ၂၁ ရက်က ရှမ်းပြည်တောင်ပိုင်း ဗထူးရှိ ဗိုလ်သင်တန်းအပတ်စဥ် ၁၂၈ ကျောင်းဆင်းပွဲသို့ လာသည့် စစ်ခေါင်းဆောင်မင်းအောင်လှိုင် ခရီးစဥ်အတွင်း တွေ့ဆုံပွဲပြီးနောက် ဖမ်းဆီးခဲ့ခြင်းဖြစ်သည်။
“ရပခ(အရှေ့ပိုင်းတိုင်း စစ်ဌာနချုပ်) တိုင်းမှူးက လွဲလို့ အခြားအရာရှိကြီးတွေ လက်ထိပ်ခတ် ဖမ်းခံရတာ၊ တရုတ်ဘက်က သတင်းပေးတယ်ပြောတယ်၊ သိန်းတစ်ထောင်ဆီရတဲ့ ကျားဖြန့်ကိစ္စလို့လည်း သိရတယ်” ဟု မဲခေါင်သတင်းရင်းမြစ်က ပြောသည်။
ဖမ်းဆီးခံရသူများတွင် တန့်ယန်းအခြေပြု ရမခ တိုင်းမှူး ဗိုလ်ချုပ်မြင့်ကျော်ထွန်း (OTS-94)၊ ရမခ တိုင်းဦးစီးချုပ်နှင့် မိုင်းရယ် ဗျူဟာမှူး၊ တန့်ယန်း ဗျူဟာမှူးတို့ကို ကျားဖြန့်ကိစ္စနှင့် ပက်သက်ပြီး ဖမ်းဆီးခံရခြင်းဖြစ်ကြောင်း CDM ဗိုလ်ကြီးဇင်ယော်က ပြောသည်။
“တိုင်းမှူးလို့တောင် ဘာမှ မလုပ်ရသေးဘဲနဲ့ ပြုတ်တဲ့ထဲ ပါသွားတာ” ဟု သူက ပြောသည်။.
လားရှိုးအခြေစိုက် အရှေ့မြောက်တိုင်းစစ်ဌာနချုပ်ကို ကိုးကန့်တပ် MNDAA က သိမ်းပိုက်လိုက်ချိန် ရမခ တိုင်းမှူးအဖြစ် ဗိုလ်ချုပ်မြင့်ကျော်ထွန်း အား စစ်ခေါင်းဆောင်မင်းအောင်လှိုင်က ၂၀၂၄ ခုနှစ်၊ သြဂုတ် ၁၁ ရက်တွင် ခန့်အပ်ခဲ့ခြင်းဖြစ်သည်။
ရုံးထိုင်စရာမရှိတော့သည့် ဗိုလ်ချုပ်မြင့်ကျော်ထွန်းသည် တန့်ယန်းမြို့နယ်တွင် ရမခရုံးဖွင့်ပြီးနောက် ရုံးထိုင်စဥ် စစ်ခေါင်းဆောင်မင်းအောင်လှိုင်က ထပ်မံ ဖမ်းဆီးခဲ့ခြင်းဖြစ်သည်။
ဖမ်းခံလိုက်ရသည့် ဗိုလ်ချုပ်မြင့်ကျော်ထွန်း နေရာအား ယခင် တပ်မတော်နည်းပညာတက္ကသိုလ် (DSTA) ကျောင်းအုပ်ကြီး ဗိုလ်မှူးချုပ်အေးမင်းဦး (OTS-94) အား ရမခ တိုင်းမှူးအဖြစ် ခန့်အပ်ထားသည်။
ဖေဖော်ဝါရီ ၂၁ ရက် စစ်ခေါင်းဆောင် မင်းအောင်လှိုင် တက်ရောက်ခဲ့သည့် ဗထူးတပ်နယ် ဗိုလ်သင်တန်း အပတ်စဥ် အပတ်စဥ် (၁၂၈) ဆင်းပွဲတွင် အရှေ့ပိုင်းတိုင်းစစ်ဌာနချုပ်၊ အရှေ့အလယ်ပိုင်းတိုင်းစစ်ဌာနချုပ်၊ တြိဂံဒေသတိုင်းစစ်ဌာနချုပ်တို့မှ တိုင်းမှူးများ တက်ရောက်ကြသည်ဟု စစ်တပ်ထိန်းချုပ် မီဒီယာများ၌ ဖော်ပြသည်။
သို့သော် အရှေ့မြောက်တိုင်းစစ်ဌာနချုပ် (ရမခ) တိုင်းမှူး တက်ရောက်ခြင်း ရှိ၊ မရှိ ကိုမူ ဖော်ပြထားခြင်း မရှိပါ။
ယင်းကဲ့သို့ တိုင်းမှူးနှင့်အဖွဲ့ အဖမ်းခံရမှုသည် တန့်ယန်းဘက် ကျားဖြန့်များ ဖမ်းဆီးမှုများရှိနေသည့် ကွင်းဆက်ဖြစ်နိုင်ကြောင်း စစ်တပ်နှင့် နီးစပ်သူများက သုံးသပ်ကြသည်။
မဟာ
#MeKongNews
#ရမခတိုင်းမှူး
#ကျားဖြန့်
#ဗျူဟာမှူး
#ရှမ်းတောင်ပိုင်း
#တန့်ယန်း
#ဗိုလ်ချုပ်မြင့်ကျော်ထွန်း
ပုံအညွှန်း – ဖေဖော်ဝါရီ ၂၁ ရက် ဗထူးကျောင်း ဗိုလ်သင်တန်းဆင်းပွဲတွင် တွေ့ရသည့် စစ်ခေါင်းဆောင် မင်းအောင်လှိုင်
