မဲခေါင်၊ ဖေဖော်ဝါရီ ၂၇
တရုတ်နိုင်ငံမှ ကျားဖြန့်နှိမ်နင်းရေးအတွက် ‘ဇင်ယော်’ စီမံချက်ဖြင့် ဒုတိယပိုင်းဆက်လက်လုပ်ကိုင်နေသည့်အတွက် တာချီလိတ်မြို့တွင် ကျားဖြန့်လုပ်ငန်းများနှင့် အွန်လိုင်းဂိမ်းများ ပိတ်ထားရသော်လည်း လောင်းကစားရုံအချို့မှာ ဆက်လက်ဖွင့်လှစ်နေဆဲဖြစ်ကြောင်း မြို့ခံများထံမှ သိရသည်။
တာချီလိတ်မြို့၊ အာခါဈေးအနီးရှိ Singha 99 စားသောက်ဆိုင်အရှေ့ရှိ လောင်းကစားရုံမှာ ဂိမ်းခုံ ၁၅ ခုံခန့်ဖြင့် ဆက်လက်ဖွင့်လှစ်နေဆဲဖြစ်ပြီး ဝိန်းကျောက်ရပ်ကွက်အတွင်း၌လည်း လောင်ကစားရုံအချို့ ဖွင့်လှစ်နေဆဲဖြစ်ကြောင်း မြို့ခံတစ်ဦးက ပြောသည်။
“အခုက ကျားဖြန့်တွေလိုက်ဖမ်းတော့ အကုန်လန့်ဖြန့်ပြီး ပိတ်ထားကြတယ်။ ဒါပေမယ့် လောင်းကစားရုံတချို့ကတော့ ဖွင့်နေတုန်းပဲ။ ပိုက်ကြူး၊ ဖဲ၊ ဂုံဂင်းခုံတွေနဲ့” ဟု ၎င်းကပြောသည်။
ကျားဖြန့်နှိမ်နင်းရန်အတွက် ထိုင်းနိုင်ငံဘက်မှ လောင်စာဆီနှင့် လျှပ်စစ်မီး ရောင်းချမှုကို ဖြတ်တောက်လိုက်ပြီးနောက်ပိုင်း တာချီလိတ်မြို့နယ်အတွင်း၌ ရဲနှင့် စစ်တပ်များမှ ကျားဖြန့်နှင့် အွန်လိုင်းဂိမ်းများကို လိုက်လံစစ်ဆေးနေသော်လည်း အများစုမှာ သတင်းကြိုတင်ရရှိသည့်အတွက် ပိတ်ထားပြီး တိမ်းရှောင်နေကြောင်း ဒေသခံများက ပြောသည်။
ယင်းမတိုင်မီက တာချီတ်မြို့ ဆန်ဆိုင်း(က)ရပ်ကွက်အတွင်းက ဂေါက်ကွင်းနားတွင်ရှိသည့် Royal Hotel အနီးမှ ခြံဝင်းအကျယ်ကြီးအတွင်း၌ လုပ်ကိုင်နေသည့် ကျားဖြန့်လုပ်ငန်းများရှိနေပြီး ကျားဖြန့်လုပ်ငန်းများဖမ်းဆီးသည်ဟု ဆိုသော်လည်း ဖမ်းဆီးခံရသည့် စာရင်းတွင် ယင်းခြံဝန်းအတွင်းမှ လုပ်ငန်းများ မတွေ့ရကြောင်း၊ ယင်းခြံဝန်းမှာ ပြည်သူ့စစ်ခေါင်းဆောင်တစ်ဦး ပိုင်ဆိုင်သည့် ခြံဖြစ်ကြောင်း သတင်းရင်းမြစ်တစ်ဦးက ပြောသည်။
တာချီလိတ်မြို့တွင် ကျားဖြန့်ငွေလိမ်ဂိုဏ်များမှာ သက်ဆိုင်ရာ အုပ်ချုပ်ရေးမှစပြီး စစ်ဗျူဟာနှင့်ရဲတပ်ဖွဲ့များကို တစ်ဖွဲ့လျင် လစဉ်ကြေး ထိုင်းဘတ် ၂ သိန်းကစပြီး လိုင်းကြေးပေး လုပ်ဆောင်နေကြခြင်းဖြစ်ကြောင်း ရဲတပ်ဖွဲ့အသိုင်းအဝိုင်းနှင့် နီးစပ်သူတစ်ဦးကပြောသည်။
တာချီလိတ်မြို့တွင် ကျားဖြန့်လုပ်ငန်းနှင့် အွန်လိုင်းလောင်းကစားလုပ်ငန်းအများအပြားရှိသော်လည်း ရှာဖွေဖမ်းဆီးမှုများ ပြုလုပ်ချိန်တွင် အနည်းအကျဉ်းသာဖမ်းဆီးရမိကြောင်း၊ ဖမ်းမည့်သူများကိုယ်တိုင်က သတင်းပေးရှောင်ရှားခိုင်းသည့်အတွက် လွတ်မြောက်သွားခြင်းဖြစ်ကြောင်း ယင်းနီးစပ်သူက ပြောသည်။
ကျားဖြန့်လုပ်ငန်းများနှိမ်နင်းရန် အကြောင်းပြချက်ဖြင့် ထိုင်းနိုင်ငံဘက်မှ လောင်စာဆီနှင့် လျှပ်စစ်မီး တင်ပို့မှုကို ဖြတ်တောက်လိုက်ရာ ပြည်သူများ လျှပ်စစ်မီး ပြတ်တောက်မှုနှင့် လောင်စာဆီဈေးနှုန်းကြီးမြင့်မှုဒဏ်ကို ခံနေရပြီး ကျားဖြန့်လုပ်ငန်းများကိုမှု ထိထိရောက်ရောက်ဖမ်းဆီးရမိခြင်း မတွေ့ရပေ။
ဇော်မြင့်
#MeKongNews
#ရှမ်းအရှေ့
#တာချီလိတ်
#လောင်းကစားဝိုင်း
#ကျားဖြန့်
