မဲခေါင်၊ ဖေဖေါ်ဝါရီ ၁
အာဏာသိမ်းစတင်တဲ့ ၂၀၂၁ ခုနှစ် ၊ဖေဖော်ဝါရီလ ၁ ရက် ကနေ ၄ နှစ်ပြည့်တဲ့ ဒီနေ့ (ဖေဖေါ်ဝါရီ ၁ ) အထိ စစ်ကောင်စီလက်ချက်ကြောင့် ကရင်နီပြည်နဲ့ ကယန်းဒေသမှာ အရပ်သားနဲ့ စစ်ဘေးရှောင်ပြည်သူ ၇၁၈ ဦးအထိ သေဆုံးခဲ့တယ်လို့ တိုးတက်သောကရင်နီပြည်သူ့အင်အားစု PKPF က ဒီနေ့မှာ ထုတ်ပြန်ထားပါတယ်။
စစ်ကောင်စီက လူ့အခွင့်အရေးချိုးဖောက်မှုကြောင့် အသက်မပြည့်သေးတဲ့ကလေးငယ် ၆၅ ဦးအပါအဝင် အရပ်သားပြည်သူ ၅၄၂ ဦးသေဆုံးခဲ့ရပြီး စစ်ရှောင်ရင်း စစ်ကောင်စီ လက်နက်ကြီး၊ လေယာဉ်ဗုံးကြဲတာ နဲ့ ဒရုန်းဗုံးကြဲတာကြောင့် အသက်မပြည့်သေးတဲ့ ကလေးငယ် ၄၀ ဦးအပါအဝင် စစ်ရှောင် ၁၇၆ ဦး သေဆုံးခဲ့ရကာ ဖမ်းဆီးထိန်းသိမ်းခံရသူ ၁၄၇ ဦး ရှိနေပါတယ်။
“ကရင်နီမှာဖြစ်ပျက်နေတဲ့အရာတွေ ကျူးလွန်ထားတဲ့ စကစတာဝန်ရှိတဲ့လူတွေကို အမြန်ဆုံးအရေးယူနိုင်ဖို့ လိုအပ်တယ်လို့ပြောလိုတယ်၊ မဟုတ်ရင် စကစဘက်က ဒီထက်ပို လက်ရဲ ဇက်ရဲတဲ့ လူ့အခွင့်ရေးချိုးဖောက်မှုတွေ ဆက်ရှိနေအုံးမယ်လို့ ပြောချင်ပါတယ်” လို့ PKPF ရဲ့ ပြန်ကြားရေး တာဝန်ရှိသူကပြောပါတယ်။
ဒီအပြင် ကရင်နီပြည်နေရာအနှံ့မှာ တိုက်ပွဲပေါင်း ၁၂၈၂ ကြိမ်ဖြစ်ပွားခဲ့ကာ စစ်ကောင်စီက လေကြောင်းကနေ တိုက်ခိုက်မှုပေါင်း ၁၇၈၈ ကြိမ်အထိ ရှိခဲ့ပါတယ်။
စစ်ကောင်စီရဲ့ လေကြောင်းနဲ့ လက်နက်ကြီးကြောင့် နေအိမ် ၂၈၉၇ လုံးပျက်စီးခဲ့ပြီး ဘာသာရေးအဆောက်အအုံ ၅၄ လုံး၊ စာသင်ကျောင်း ၂၆ ကျောင်း၊ ဆေးရုံဆေးခန်း ၁၆ ခုလည်း ပျက်စီးခဲ့ရပါတယ်။
စစ်ကောင်စီတပ်နဲ့ ထိတွေ့တိုက်ပွဲတွေမှာလည်း စစ်ကောင်စီဘက်က ၃၆၆၅ ဦးသေဆုံးပြီး စစ်ကောင်စီတပ်ရဲ့ တိုက်လေယာဉ်နဲ့ ရဟတ်ယာဉ် သုံးစင်းပျက်စီးကာ ယာဉ် ၆၈ စီးပျက်စီးခဲ့ပြီး တော်လှန်ရေးအင်အားစုဘက်က ၆၈၆ ဦး ကျဆုံးခဲ့ပါတယ်။
CJ-004
#MeKongNews
#ကရင်နီပြည်
#အာဏာသိမ်း
#၇၁၈ဦးသေဆုံး
#ကလေးငယ်၄၀
