မဲခေါင်၊ ဇန်နဝါရီ ၂၂
ရှမ်းပြည်အရှေ့ပိုင်း၊ မိုင်းတုံမြို့နယ် အခြေချစစ်ကောင်စီ စစ်ဗျူဟာမှူးက မူးယစ်ဆေးဝါးသယ်သူတွေနဲ့ တရားမဝင်သတ္တုတူးဖော် သယ်ယူသူတွေကို လာဘ်ငွေရယူပြီး အကာအကွယ်ပေးနေတယ်လို့ ဒေသခံတွေပြောပါတယ်။
မိုင်းတုံမြို့နယ်အတွင်းမှာ တရားမဝင် သတ္တုတူးဖော်နေတဲ့ လုပ်ငန်းရှင်တွေထံကနေ လစဉ်ကြေးကို လွယ်ခမ်းလုံ ပြည်သူ့စစ်ခေါင်းဆေင် သားကြီး ခေါ် ကျော်ဇင်လတ်ကနေတဆင့် ဗျူဟာမှူးကျော်ထင်က ရယူနေပြီး သတ္တုသယ်တဲ့ကားတွေဟာ စစ်ဆေးရးဂိတ်မှာ အတားအဆီးမရှိသွားလာလို့ရနေတယ်လို့ ဒေသခံသတင်းရင်းမြစ်တစ်ဦးက မဲခေါင်ကို ပြောပါတယ်။
“ကားတွေနဲ့ သတ္တုအပြည့်သယ်တော့ကျတော့ တားဆီးစစ်ဆေးတဲ့သူတွေကိုတောင် စစ်ရကောင်းလားဆိုပြီးအရေးယူမလို့တဲ့” လို့ သူက ပြောပါတယ်။
လွယ်ခမ်းလုံ ပြည်သူ့စစ်ကားလာရင်လည်း တပ်ထိန်းက ရှေ့ပွိုင့်လုပ်ပြီးပို့ဆောင်ပေးရသလို ဂိတ်တွေမှာ စစ်ဆေးမိသူတွေကို ဗျူဟာမှူးက ပြသနာရှာတယ်လို့ ဒေသခံတွေထံက သိရပါတယ်။
ပြီးခဲ့တဲ့ ဒီဇင်ဘာ ၈ ရက်၊ နေ့လယ်ပိုင်းက Vigo ၃စီးနဲ့ သတ္တုတွေသယ်လာတာကို လွှတ်ပေးခဲ့သလို သတ္တုတူးနေတဲ့ ဌာနေပြည်သူ့စစ် သားကြီး ခေါ် ကျော်ဇင်လတ်ကားကို တားဆီးမိတဲ့ ဂိတ်တာဝန်ကျတွေကိုလည်း ချက်ခြင်းနေရာပြောင်းပစ်တယ်လို့ ဒေသခံတစ်ဦးက ပြောပါတယ်။
လွယ်ခမ်းလုံ ပြည်သူ့စစ်ခေါင်းဆောင် သားကြီး ခေါ် ကျော်ဇင်လတ် ဆိုသူဟာ ရွှေလားဟူ ကုမ္ပဏီပိုင်ရှင်ဖြစ်ပြီး တရားမဝင်ရွှေနဲ့ မြေရှားသတ္တုတွေကို မိုင်းဆတ်နဲ့မိုင်းတုံသွားကားလမ်းက မိုင်းတုံဘက်၁၁မိုင်မှာ တရားမဝင် ဝင်ရောက်လာတဲ့ တရုတ်လူမျိုးတွေနဲ့ အကြီအကျယ်တူးဖော်နေတာဖြစ်တယ်လို့ ဒေသတွင်း သတင်းရင်းမြစ်တွေက ပြောပါတယ်။
ဒါ့အပြင်မိုင်းဆတ်ကမိုင်းတုံမြို့အဝင် နောင်ပါရင်ဂိတ်မှာ သတ္တုပိုင်ရှင်တွေက အဲဒီ သားကြီး ခေါ် ကျော်ဇင်လတ်ကို ဗျူဟာမှူးဆီ ဝင်ခိုင်းပြီး လစဉ်ကြေးပေးကာ မြို့ပေါ်မှာ ဗြောင်ကျကျ ဝင်ထွက်ခွင့်ရနေတယ်လို့ ဆိုပါတယ်။
ပြည်သူ့စစ်ကားလာရင်လည်း တပ်ထိန်းက ရှေ့ပွိုင့်လုပ်ပြီးပို့ဆောင်ပေးရကာပြည်သူ့ စစ်ကားတွေဆို ဗျူဟာမှူးက ဂိတ်တွေမှာလုံးဝပေးအစစ်မခံ ပါဘူး၊စစ်တဲ့လူတွေကိုလည်း ဗျူဟာမှူးက ပြသာနာရှာပါတယ်၊ ဗျူဟာG2 အောင်ကျော်မြင့်က ပိုက်ဆံလက်ခံပါတယ်၊ပြည်သူ့စစ်တို့၊ဝအဖွဲ့တို့ကိုစစ်ရင် သူက ဂိတ်တာဝန်ကျ အဖွဲ့တွေကို ဆဲဆိုရုံးတင်ပါတယ်လို့ ပြောပါတယ်။
‘ဂိတ်တွေမှာ စစ်ဆေးတားဆီးရင် တားဆီးသူကို ဗျူဟာမှူးက ရုံးတင်ခေါ်တွေ့ဆူဆဲပြီး ဝကိုမျက်နှာလုပ် ရှမ်းအဖွဲ့ကျဖိနှိပ်ပြီးလုပ်ကိုင် နေပါတယ်၊ နောင်ပါရင်ဂိတ်မှာ တားဆီးဓါတ်ပုံရိုက်တဲ့လူတွေကိုလည်း ဗျူဟာမှူးဆိုတဲ့အာဏာနဲ့ ဖိနှိပ်ထားပါတယ်’လို့ မဲခေါင်ကို ပြောလာပါတယ်။
၎င်းအပြင် နောင်ပါရင်ဂိတ်တာဝန်ကျ တပ်က ဗျူဟာမှူးကတော်(မယ်မယ်ကြီး)ကြေး ငါးသောင်းကို တစ်ပါတ်တစ်ခါပေးရတယ်လို့ ဆိုပါတယ်။
မိုင်းတုံဗျူဟာမှူး ကျော်ထင်ဟာ မူးယစ်ဆေးဝါး ထုတ်လုပ်သယ်ဆောင်သူတွေကို လိုင်းကြေးရယူကာ ခွင့်ပြုပေးထားပြီး တခြားနေရာတွေမှာ ဖမ်းမိရင်တောင် ပတ်သက်သူတွေကို ရှောင်ရှားခိုင်းကာ မူးယစ်ဆေးတွေကိုလည်း စစ်တပ်က ကားတွေနဲ့နေရာရွှေ့ပေးတယ်လို့ နောက်ထပ် မိုင်းတုံဒေသခံတစ်ဦးက ပြောပါတယ်။
“တာဆန်းမှာမိပြီး နောက်နေ့ ဝမ်မိုင်ရပ်ကွက်က အောင်ထွန်း (မူးယစ်ဆေးသယ်သူ) အိမ်ကိုရှာမယ်ဆိုတာသိလို့ ဖမ်းမိတဲ့ညမှာပဲ ဗျူဟာကကားတွေနဲ့ ပစ္စည်းတွေသယ်ထုတ်ပေးခဲ့တယ်။ နားကောင်းမူးမှာရှိတဲ့ အောင်ထွန်းပိုင်တဲ့အိမ်ကိုလည်းဖျောက် ပေးထားတယ်။ စစ်ဗျူဟာမှူးရဲ့ ရှယ်ယာလည်းပါတယ်လို့ကြားပါတယ်’လို့ သူက ပြောပါတယ်။
ဒါ့အပြင် နေက်ဆက်တွဲ ကွင်းဆက်တွေလိုက်လာမှာစိုးရိမ်တာကြောင့် အောင်ထွန်းရဲ့ လုပ်ငန်းဖော်ဖြစ်သူ လော့ရီတို့အဖွဲ့ကိုလည်း ရှောင်တိမ်းခိုင်းထားတယ်လို့ အဲဒီဒေသခံက ဆိုပါတယ်။
မိုင်းတုံ မြို့ဝင်ထွက်ဂိတ်တွေရောက်ရင် ဗျူဟာရဲ့ခွင့်ပြုချက်ရမှ သွားခွင့်ရတာဖြစ်ပြီး မြို့ဝင်၊ ထွက် ၄ဂိတ် နဲ့တာဆန်းသွားမှာဆို ဗျူဟာက ထောက်ခံစာလုပ်ပေးနေတာလို့ သိရပါတယ်။ အဲဒီဂိတ်တွေမှာ ဗျူဟားမှူးကတော်အတွက်လည်း လိုင်းကြေးကောက်ပေးရပြီး အဲဒါကို မယ်မယ်ကြီးကြေးလို့ခေါ်ကာ ကားတစ်စီးကို ကျပ် ၅သောင်းပေးရတယ်လို့ ခရီးသွားလာသူတွေထံက သိရပါတယ်။
“ဒီကိစ္စတွေက တော်တန်ယုံလူတွေ မသိနိုင်ဘူး။ မူးယစ်၊ သတ္တု၊ သစ်၊ သူ့အုပ်စု သူ့လိုင်းနဲ့သူရှိကြတာ။အတွင်းကျကျ သိဖို့မလွယ်ဘူး။ သိတယ်ဆိုရင်လဲ အတွင်းထဲကပဲ သိနိုင်မယ်။ အကုန်လုံးက အကျင့်ပျက်ခြစားနေကြတာ ပြောရင် အန္တရာယ်ကြီးတယ်။ အရင် ဗျူဟာမှူးအဆက်ဆက်လဲ လုပ်စားသွားကြတာပဲ၊ ခုလောက်အနံ့ မထွက်ဘူး”လို့ မိုင်းတုံဒေသခံ တစ်ဦးက ပြောပါတယ်။
ရှမ်းပြည်အရှေ့ပိုင်း မိုင်းတုံမြို့ဟာ ရွှေ၊ ခနောက်စိမ်း၊ အဖြိုက်နက် အပြင် မြေရှားသတ္တုပါထွက်ရှိနေသလို မူးယစ်ဆေးမျိုးစုံ ထွက်ရှိနေတာဖြစ်လို့ စစ်ကောင်စီရဲ့ ဒေသတာဝန်ကျ၊ စစ်ဘက်၊ အရပ်ဘက် အုပ်ချုပ်ရေးပိုင်းတွေဟာ ဌာနေပြည်သူ့စစ်တွေနဲ့ ပူးပေါင်းပြီးငွေရဖို့အတွက် လုပ်ပိုင်ခွင့်အာဏာနဲ့ မတရားစီးပွားနေကြတာလို့ ဒေသခံတွေက ပြောပါတယ်။
MK – 004, MK – 012
#MeKongNews
#မိုင်းတုံအခြေချစစ်ဗျူဟာ
#ဗျူဟာမှူး
#သတ္တု
#မူးယစ်ဆေးဝါး
#လိုင်းကြေး
