မဲခေါင်၊ ဒီဇင်ဘာ ၂၇
ရှမ်းပြည်မြောက်ပိုင်း၊ လားရှိုးမြို့နယ်ထဲက နှစ် ၅၀ ကျော်သက်တမ်းရှိ လားရှိုး-မိုင်းယော် (ဖွန်ချောင်) တံတားကို မကြာခင် ကိုးကန့်တပ် (MNDAA) ကပြန်လည်ပြုပြင်သွားမယ်လို့ သိရပါတယ်။
ဒီဇင်ဘာ ၂၅ ရက်က မိုင်းယော် (ဖွန်ချောင်) တံတားပေါ် ဘိလပ်မြေအိတ်အပြည့်တင်ထားတဲ့ကုန်ကားတစ်စီး ဖြတ်အကူးမှာ ကားကြီး ၀ိတ်အရှိန်ကို မထိန်းနိုင်တော့တာကြောင့် တံတားကျိုးကျခဲ့တယ်လို့ လားရှိုးဒေသခံက ပြောပါတယ်။
လားရှိုးမြို့ ပြန်လည်ထူထောင်ရေးမှာပါ၀င်သူ တစ်ဦးက “ရေပူစမ်းတံတားက သံဘောင်ထိုးနေတုန်းနောက် သုံးရက် ကြာရင်ပြီးမယ်။ အဲဒါပြီးသွာမှ မိုင်းယော်တံတားဘက် ပရောဂျက်ကိုပြန်စဖို့ရှိတယ်ဗျ။ သူတို့က ရှင်းလင်းရေး အရင်လုပ်ရ မှာပေါ့။ အခုကကျိုးကျထားတဲ့ ကားတွေဘာတွေလည်းမရွှေ့ရသေးဘူး” လို့ မဲခေါင်ကိုပြောပါတယ်။
လားရှိုးမြို့ အထူးဒေသ (၁) ရဲ့ ပြန်လည်ထူထောင်ရေလုပ်ငန်းတွေကို ဆောင်ရွက်ရာမှာ MNDAA က လမ်းပန်းဆက်သွယ်ရေး လွယ်ကူချောမွေ့စေဖို့အတွက် ကျိုးပျက်နေတဲ့တံတားတွေကို ဦးစားပေးပြန်လည်ပြုပြင်နေတယ်လို့ဆိုပါတယ်။
အခုလိုပြုပြင်ရာမှာ လားရှိုးမြို့သိမ်းတိုက်ပွဲအတွက် ပျက်စီးခဲ့တဲ့ နမ္မတူ-လားရှိုး ဆက်သွယ်ထားတဲ့အီနိုင်တံတားကို ဒီဇင်ဘာ ၈ ရက်က အပြီးသက်ပြင်ဆင်ပေးခဲ့ပြီး လက်ရှိမှာ လားရှိုး ရေပူစမ်းသို့သွားတဲ့ တံတားကို သံဘောင် တပ်ဆင်မှုတွေလုပ်ဆောင်နေတယ်လို့ သိရပါတယ်။
ကျိုးကျပျက်ဆီးခဲ့တဲ့ မိုင်းယော် (ဖွန်ချောင်) တံတားဟာ ကွမ်းလုံ၊ ကာမိုင်း၊ မိုင်းတင်၊ ပန်ရှော်၊ မန်ပြိန်း၊ ပန်းခမ်း၊ မိုင်း ယော်၊ မိုင်းကျက်နဲ့ တာပုံရွာတို့ကို ဆက်သွယ်သွားလာရာမှာ ဖြတ်သန်းရတဲ့တံတားတစ်စင်းဖြစ်ပါတယ်။
“လက်ရှိအနေအထားတော့ သွားလာရခက်တယ်ဗျာ။ အဲတံတားဆောက်ထားတာလည်း ကြာတော့ကြာနေပြီ၊ ကျိုးတာကတော့ရိုးရိုးခံနိုင်၀န်မရှိလို့ ကျိုးတာပါ။ လက်တလော သွားလို့တော့မရသေးဘူး” လို့ မိုင်းယော် ဒေသခံတစ်ဦးကပြောပါတယ်။
လားရှိုး-မိုင်းယော် လမ်းကြောင်းဟာ ၁၀၂၇ စစ်ဆင်ရေးပထမလှိုင်းက MNDAA ၊ TNLA ၊ AA နဲ့ အခြားတော်လှန်ရေး အင်အားစုတွေစုပေါင်းပြီး ဂိတ်စခန်းထိုင်ခဲ့ရာ လမ်းကြောင်းတွေဖြစ်တယ်လို့ သိရပါတယ်။
CJ-017
#MekongNews
#လားရှိုး
#မိုင်းယော်
#တံတား
#ပြန်ပြင်မယ်
