မဲခေါင်၊ စက်တင်ဘာ ၂၃
ထိုင်းနိုင်ငံ၊ ချင်းမိုင်မြို့ရဲ့ ချင်းမိုင်တက္ကသိုလ် မှာ Burma Students’ Association က ဦးဆောင်ပြီး ရှမ်းတောင်က ရေဘေးသင့်ပြည်သူတွေပို ကူညီဖို့ ရန်ပုံငွေပွဲတခုကို စက်တင်ဘာလ ၂၁ ရက်နေ့မှာ ပြုလုပ်ခဲ့တယ်လို့ တာဝန်ရှိသူတွေဆီက သိရပါတယ်။
ရန်ပုံငွေရှာဖွေပွဲကို ညနေ ၄ နာရီကနေ ၈ နာရီအထိပြုလုပ်ခဲ့ပြီး ရှမ်းတိုင်းရင်းသားအကအလှတွေ၊ မြန်မာတပင်တိုင်အကအလှတွေ၊ တီးဝိုင်းနဲ့ဖျော်ဖြေတာတွေ၊ အစားအသောက် အဝတ့အထည်နဲ့ အသုံးအဆောင်တွေ ရောင်းချတဲ့အစီအစဥ်တွေ ပါဝင်တယ်လို့ သိရပါတယ်။
“ဒီပွဲမှာ လာပါဝင်တာက မြန်မာပြည်မှာ ဒက္ခရောက်နေတဲ့သူတွေကို တဖက်တလှမ်းကနေအေ ကူညီပေးနိုင်အောင်လို့ပါ။ အမတို့က ဒီထိုင်းကိုရောက်နေပြီး အခက်အခဲဖြစ်နေတဲ့သူတွေကို ကူညီပေးတဲ့အဖွဲ့ပေါ့နော်။ ရသင့်ရထိုက်တဲ့ အခွင့်အရေးတွေအတွက် လိုက်ကူညီတဲ့အဖွဲ့ပါ။ ဒီပွဲလုပ်တော့ တခြားသူတွေလည်းသိအောင်၊ ပြည်တွင်းက ရေဘေးအတွက်လည်း ကူညီပြီးသားဖြစ်အောင် လာပါဝင်ရခြင်းဖြစ်ပါတယ်။”လို့ ပွဲအတွင်း ပါဝင်ခဲ့တဲ့ မနုက ပြောပါတယ်။
ရန်ပုံငွေပွဲက ရရှိတဲ့ အလှူငွေတွေကို ရှမ်းပြည်နယ်တောင်ပိုင်းက ရေဘေးသင့်နေတဲ့ နေရာတွေမှာ ကူညီပေးနေတဲ့ ကယ်ဆယ်ရေးအဖွဲ့အစည်းတွေဆီ တဆင့်ပြန်လည်လှူဒါန်းသွားမှာဖြစ်တယ်လို့ သိရပါတယ်။
ရန်ပုံငွေရှာဖွေပွဲအတွင်း အစားအသောက်နဲ့ အဝတ်အထည် ဝယ်ယူအားပေးသူ၊ အလှူငွေ ခည့်သူ၊ အနုပညာ အက အလှတွေ ခံစားသူတွေနဲ့ နိုင်ငံခြားသားတွေလည်း တက်ရောက်အားပေးခဲ့တယ်လို့ သိရပါတယ်။
CJ-004
