မဲခေါင်၊ မေ ၃၁
ရှမ်းပြည်တောင်ပိုင်း၊ ပင်လောင်းနဲ့ ညောင်ရွှေမြို့နယ်တို့မှာ လာရောက်ခိုလှုံနေကြတဲ့ စစ်ဘေးရှောင်တွေဟာ ကိုယ်ထူကိုယ်ထ ရပ်တည်ဖို့ အခက်အခဲရှိနေသေးတာကြောင့် နေရပ်မပြန်နိုင်ကြသေးဘူးလို့ ဒေသတွင်း လူမှုကူညီဆောင်ရွက်နေသူ တစ်ဦးက ပြောပါတယ်။
“မိုးရာသီ ရောက်တော့မှာ ဆိုတော့ ဟိုရောက်သွားရင်လည်း အဆင်မပြေနိုင်ဘူးပေါ့။ သူတို့က မပြေလည်ကြ သူတွေဆိုတော့လေ။ ဟိုရောက်သွားလည်း သူတို့က တဲဆောက်နေရမှာ။ ရိက္ခာအခက်အခဲကလည်း ရှိသေးတယ်။ ဒီမှာ ဆိုရင်တော့ ဆွေမျိုးတွေ ဘုန်းကြီးကျောင်းတွေနား ဝေယျာဝစ္စလုပ်ရင်း မှီစားလို့ရတာပေါ့” လို့ ပြောပါတယ်။
မေလနောက်ဆုံးပတ်အတွင်း ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်နဲ့ ကရင်နီပြည်က တိန်းရှောင် လာသူအများစုဟာ နေရပ်ပြန်ကုန်ကြပေမယ့် ပင်လောင်းနဲ့ ညောင်ရွှေမြို့နယ်တို့မှာ ငွေကြေးမပြေလည်တဲ့ စစ်ဘေးရှောင် ၃၀၀၀၀ ကျော်ခန့် ကျန်ရှိနေပြီး နီးစပ်ရာဆွေမျိုးတွေနဲ့ ဘုန်းကြီးကျောင်းတွေမှာ နေထိုင် နေကြတယ်လို့ ဆိုပါတယ်။
ဆီဆိုင်မြို့ တောင်ဘက်နဲ့ အရှေ့မြောက်ရပ်ကွက်တွေကို နေ့စဥ်နဲ့အမျှ စစ်ကောင်စီက လက်နက်ကြီးပစ်ခတ်နေပြီး လွိုင်ကော်မြို့၊ နောင်ယားရပ်ကွက် အပါအဝင် ရပ်ကွက်တချို့မှာ တိုက်ပွဲဖြစ်ပွားနေသေးတာကြောင့် နေရပ် မပြန်ရဲတဲ့သူတွေလည်း ရှိနေသေးတယ်လို့ သိရပါတယ်။
ဘုန်းကြီးကျောင်းမှာ စစ်ဘေးရှောင်ဝေယျာဝစ္စလုပ်ပေးနေသူတစ်ဦးက “သူတို့က ဘုန်းကြီးကျောင်းမှာဆိုတော့ စားရသောက်ရအဆင်ပြေပေမယ့် လာလှူတဲ့သူတော့ မရှိဘူးပေါ့။ ဘုန်းကြီးဆွမ်းမကျန်တဲ့ရက်တွေဆို မစားရ တာတွေလည်း ရှိပါတယ်။ အိမ်တောင်မငှားနိုင်သေးတာ၊ ကားခဘယ်လိုလုပ် အဆင်ပြေသေးမှာလဲ။ တစ်ယောက်၊ နှစ်ယောက်လည်းမဟုတ်၊ မိသားစုလိုက်ဆိုတော့လေ” လို့ ပြောပါတယ်။
ဒါ့အပြင် ပင်လောင်းဘက် စစ်ဘေးရှောင်စခန်းတွေမှာ ခိုလှုံနေသူတွေဟာလည်း မေလ ၂၅ ရက် ဝန်းကျင်လောက်ကစပြီး ရာသီဥတုအခက်အခဲကြောင့် ညောင်ရွှေမြို့နယ်ကို လူဦးရေ ၅၀၀ ခန့် ပြောင်းရွှေ့လာကြတယ်လို့ ဆိုပါတယ်။
ဆီဆိုင်နဲ့ လွိုင်ကော်မြို့ကို မေလ နောက်ဆုံးပတ်အတွင်း ပြန်လာကြတဲ့ စစ်ဘေးရှောင်တွေ ရှိပေမယ့် သက်ဆိုင်ရာ တော်လှန်ရေးတပ်ဖွဲ့တွေကတော့ ပြန်လို့ရပြီဆိုပြီး တရားဝင်စာမထုတ်ပြန်သေးတဲ့အပြင် အချိန်မရွေး လက်နက်ကြီး၊ လက်နက်ငယ်၊ မြေမြှုပ်မှိုင်းအန္တရာယ်တွေ ကြုံတွေ့နိုင်တာကြောင့် နေရပ်မပြန်ကြသေးဖို့ မေတ္တာ ရပ်ခံထားပါတယ်။
စစ်ကောင်စီဝါဒဖြန့်သူတွေဟာ လူမှုကွန်ယက်စာမျက်နှာ (Facebook) နဲ့ တယ်လီဂရမ်ချန်နယ်တွေမှာ လွိုင်ကော်နဲ့ ဆီဆိုင်မြို့ကို နေရပ်ပြန်နိုင်ပြီလို့ဆိုကာ လူစည်ကားတဲ့နေရာတွေနဲ့ ကျောင်းအပ်သူတွေရဲ့ ဓာတ်ပုံတွေအပြင် စစ်ကောင်စီတပ်ရဲ့ မိုင်းရှင်းလင်းနေတဲ့ပုံတွေနဲ့ ဝါဒဖြန့်နေကြတယ်လို့ သိရပါတယ်။
MK 014
