မဲခေါင် မေ ၁၄
ကယား(ကရင်နီ)ပြည် အခြေစိုက် အမျိုးသား ညီညွတ်ရေး အစိုးရ(NUG) လက်အောက်ခံ အင်းလေး ပြည်သူ့ကာကွယ်ရေးတပ် ၁၀၀၉ တပ်ရင်း (IPDF)က ကျဆုံးသူ တပ်ဖွဲ့ ၂ ဦးအတွက် ဧပြီလ ၁၁ ရက်နေ့က အောက်မေ့ဖွယ် အခန်းအနား ပြုလုပ်ခဲ့တယ်လို့ အဖွဲ့ရဲ့ လူမှုကွန်ယက်စာကတဆင့် ထုတ်ပြန်ထားပါတယ်။
ရှမ်းပြည်တောင်ပိုင်း၊ ဖယ်ခုံမြို့နယ်၊ စစ်ကောင်စီရဲ့ ဆောင်နန်းခဲစခန်းသိမ်း တိုက်ပွဲမှာ ၁၁၁၁ စစ်ဆင်ရေး တစ်လပြည့်တဲ့ ၂၀၂၃ ခုနှစ် ဒီဇင်ဘာလ ၁၁ ရက်နေ့က ကျဆုံးခဲ့တာ ဖြစ်ပြီး ပ နဲ့ ဒု တပ်စိတ်မှူး ၂ ဦး ဖြစ်တယ်လို့ ဆိုပါတယ်။
တပ်ရင်းမှူး အင်းဆားကူးက “တိုက်ပွဲမှာ ကျသွားတဲ့အတွက် ကျနော့်အနေနနဲ့များစွာ စိတ်မကောင်း ဖြစ်ရတယ်ပေါ့နော်။ ကျသွားတဲ့ ရဲဘော် ၂ ယောက်သည် တကယ်လည်း တော်တယ်။ တကယ်လည်း အားကိုးရတယ်။ သတ္တိကောင်းပြီး တိုက်ရဲခိုက်ရဲ ရှိတဲ့လူတွေပေါ့နော်။ သူတို့ရဲဘော်တွေလည်း သူတို့ကို တအား သတိရနေတယ်၊ တအားလွမ်းနေတယ်ပေါ့” လို့ ပြောပါတယ်။
တပ်ဖွဲ့ဝင် ၂ ဦးဟာ အင်းသားလူမျိုး ရှိုင်းထက်အောင်(ခ) အယ်မိုက်နဲ့ စစ်ကောင်စီရဲ့ လေတပ်ကနေ CDM ပြုလုပ်ထားတဲ့ ရဲဘော် ကျော်မျိုးလွင်(ခ) ဝမ်းတို့ ဖြစ်ပြီး ၂ ဦးလုံးဟာ ဦးခေါင်းနဲ့ ကျောဘက်တွေမှာ လက်နက်ကြီးစမှန် ဒဏ်ရာတွေကြောင့် ကျဆုံးခဲ့တာလို့ ဆိုပါတယ်။
“ကျဆုံးသွားတဲ့ထဲမှာ လက်နက် မလုံလောက်မှု ဆိုတာထက် ကျည်ဆံအခက်အခဲ ရှိသလို တိုက်ပွဲကလည်း ပြင်းတယ်။ စစ်ကောင်စီတွေဘက်ကလည်း အလုံးအရင်းနဲ့ ထိုးလာတဲ့အတွက် ၂ ဖက်အထိအခိုက် အကျအဆုံးမှာ သူတို့ဘက်က ပိုပြီးတော့ စစ်ကြောင်းတစ်ကြောင်းလုံး ပြုတ်တယ်ဆိုတဲ့ အနေအထားပေါ့နော်။ ဘယ်လိုမှ မေ့လို့မရတဲ့နေ့ပေါ့” လို့ တပ်ရင်းမှူး အင်းဆားကူးက ဆက်ပြောပါတယ်။
အလားတူ ၂၀၂၃ ခုနှစ် အင်းလေးဒေသ၊ ဘုရားနီတိုက်ပွဲမှာ IPDF တပ်ရင်းမှူး၊ ဒုတပ်ထောက်၊ တပ်စိပ်မှူး အပါအဝင် ၄ ဦးနဲ့ ညောင်လေးပင်တိုက်ပွဲမှာလည်း တပ်သား ၂ ဦး ကျဆုံးခဲ့ပြီး IPDF တပ်ရင်းမှာ ကျဆုံးသူ ၈ ဦး ရှိပြီလို့ တပ်ရင်းမှူး အင်းဆားကူးရဲ့ ပြောပြချက်အရ သိရပါတယ်။
အခုလို ကျဆုံးမှုတွေ ထပ်မဖြစ်စေဖို့အတွက် IPDF အနေနဲ့ ဧပြီလ ၁၅ ရက်နေ့ကစလို့ ကျည်ကာဦးထုပ် ကပ်ပိန်း ပြုနေပြီး ဦးထုပ် တစ်လုံးကို ၄ သိန်းခွဲကျပ်နဲ့ ဦးထုပ်အလုံးရေ ၁၀၀ စာအတွက် သိန်း ၄၅၀ ရရှိဖို့ အကူအညီ တောင်းခံထားပါတယ်။
တပ်ဖွဲ့ဝင်တွေအတွက် အသက်အန္တရာယ် အထောက်အကူပြု ကာကွယ်ရေး ကျည်ကာနဲ့ ကျည်ကာဦးထုပ် ရရှိဖို့အတွက် ပြည်တွင်း/ပ အလှူရှင်တွေ အနေနဲ့ ဦးထုပ်တစ်လုံးစာ ငွေကြေး မတတ်နိုင်ရင်တောင်မှ ပမာဏနည်းများမဆို ပါဝင်ပြီး ကူညီပေးကြဖို့ IPDF က တောင်းဆိုထားပါတယ်။
MK-014
