မဲခေါင်၊ မေ ၁၃
ရှမ်းတောင်၊ ဆီဆိုင်မြို့နယ်က နောင်ရင်းဒုံရွာသူကြီးနဲ့ ညီဖြစ်သူကို စစ်ကောင်စီလက်အောက်ခံ PNO ပြည်သူ့စစ်ဗိုလ်ကြီးလယ်နဲ့အဖွဲ့က ပြီးခဲ့တဲ့ မေလ ၉ ရက်က ဆီဆိုင်မြို့နယ် နောင်ရင်းဒုံရွာ သူကြီးညီအစ်ကို(၂)ယောက်ကို ဆွေးနွေးစရာရှိလို့ ခဏပြန်လာဖို့ လိမ်လည်ခေါ်ဆောင်ကာ ညှဉ်းပန်းနှိပ်စက်သတ်ဖြတ်လိုက်ပြီး မိသားစုပိုင် ကုန်တင်ကားကို ထပ်မံလာရောက်သိမ်းဆည်းသွားတယ်လို့ သိရပါတယ်။
မေလ ၁၁ ရက်ညမှာ အသတ်ခံရသူ သူကြီး ခွန်ဇာခွန်နဲ့ ညီ ခွန်ပလွန်တို့ရဲ့ မိသားစုပိုင် ကုန်တင်ကားကို ထပ်မံလာရောက် သိမ်းဆည်းသွားခဲ့တာပါ။
ကားကို လာသိမ်းတဲ့အချိန်မှာ ခွန်ဇာခွန်ဟာ ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO ကို ထောက်ပံ့နေတာလို့ စွပ်စွဲပြီး လာသိမ်းသွားခဲ့တာပါ။ ကားလာရောက်သိမ်းတဲ့အချိန်မှာ PNO ပြည်သူ့စစ်တွေဟာ အရက်တွေမူးရူးနေပြီး အမျိုးသမီးတွေသာရှိတဲ့ နေအိမ်ပေါ်ကို တက်ရောက်ကာ မိသားစုတွေကို ခြိမ်းခြောက်ပြီး ကားကိုသိမ်းယူသွားတာလို့ သိရပါတယ်။
ခွန်ဇာခွန်ဟာ PNLO ရဲ့ အဖွဲ့ဝင်/ တပ်ဖွဲ့ဝင်လည်း မဟုတ်သလို PNLO နဲ့လည်း ဘာမှ ပတ်သက်တာ မရှိပါဘူး။ အမှန်ကတော့ ခွန်ဇာခွန်ဟာ နောင်ရင်းကျေးရွာက အားကိုးအားထားပြုရတဲ့ လူငယ်တစ်ဦးဖြစ်လို့ ကျေးရွာက ရွာသူကြီးအဖြစ်တင်မြောက်ထားတာဖြစ်ပြီး ခွန်ဇာခွန်ဟာ ရပ်ရွာအတွင်း လူငယ်တွေ မူးယစ်ဆေးမသုံးအောင်၊ ရပ်ရွာတိုးတက်အောင်၊ စစ်ဘေးရှောင်တွေကို ကူညီနေတဲ့ ရွာခေါင်းဆောင်သူကြီး တစ်ဦးသာဖြစ်တယ်လို့ PNLO က ထုတ်ပြန်ထားပါတယ်။
စစ်အာဏာသိမ်းပြီးနောက်ပိုင်း တရားမဲ့သတ်ဖြတ်မှုတွေကို မှတ်တမ်းတင်နေတဲ့ Jusiice for Myanmar အဖွဲ့ရဲ့ ရှမ်းတောင် တာဝန်ရှိသူတစ်ဦးကတော့ အပြစ်မဲ့ပြည်သူကို ဖမ်းဆီးသတ်ဖြတ်ခဲ့တဲ့ PNO ပြည်သူ့စစ် ခွန်လယ်နဲ့ အဖွဲ့ကို စစ်ရာဇဝတ်ကောင်စာရင်းမှာ ထည့်သွင်းထားပြီး ၄င်းတို့ကိုတိုက်ပွဲအတွင်းမှာ ဖမ်းမိတာဖြစ်ဖြစ် ၊ စစ်ပွဲတွေရပ်ဆိုင်းသွားတဲ့အခါမှာပဲဖြစ်ဖြစ် ထိုက်သင့်တဲ့ တရားစီရင်ရေးနဲ့ စီစဉ်ဆောင်ရွက်သွားနိုင်ဖို့ လုပ်ဆောင်ထားတယ်လို့ မဲခေါင်သတင်းဌာနကို ပြောပါတယ်။
ရှမ်းတောင်၊ ပအိုဝ်းဒေသအတွင်း ဖြစ်ပွားနေတဲ့ တိုက်ပွဲတွေမှာ အရပ်သားသေဆုံးမှု ၆၉ ဦးနဲ့ ထိခိုက်ဒဏ်ရာရှိမှု ၉၂ ဦးရှိပြီး၊ အသက်(၁၀)နှစ်အောက်ကလေး ၁၀ ဦးနဲ့ အသက်(၁၅)နှစ်အောက် ကလေး ၁ ဦးသေဆုံးခဲ့ပြီး ကလေးသူငယ်သေဆုံးမှုတွေမှာ တိုက်ပွဲဖြစ်ပွားခြင်းမရှိတဲ့ ကျေးရွာတွေမှာ စစ်ကောင်စီက ပစ်ခတ်လို့ သေဆုံးခဲ့တာလို့ မေလ ၁၃ ရက်နေ့မှာ PYO ပအိုဝ်းလူငယ်အစည်းအရုံးက ထုတ်ပြန်ထားပါတယ်။
MK-012
