မဲခေါင်၊ မတ် ၃
ရခိုင်ပြည်၊ မြောက်ဦးတိုက်ပွဲမှာ သေဆုံးသွားတဲ့ ဗိုလ်မှူးကြီးမင်းမင်းထွန်းရဲ့ တာချီလိတ်မှာ တာဝန်ကျစဉ် ဝယ်ယူသွားတဲ့ အိမ်ခြံမြေတွေကို ဒီရက်ပိုင်းအတွင်း ရောင်းချဖို့ ကြော်ငြာနေတယ်လို့ တာချီိတ်ဒေသခံတွေထံကနေ သိပါတယ်။
တာချီလိတ်မြို့၊ မယ်ခေါင်ရပ်ကွက်အတွင်းမှာ ရှိတဲ့ ဗိုလ်မှူးကြီးမင်းမင်းထွန်း ပိုင်ဆိုင်တဲ့ နေအိမ်နဲ့ ခြံကို ရောင်းချဖို့အတွက် ဖေ့စ်ဘွတ်မှာ ကြေညာထားပြီး အဲဒီအိမ်နဲ့ခြံ တစ်ခုထဲတင် ဘတ် ၃၅သန်းခေါ်ဈေးရှိတယ်လို့ တာချီလိတ်မြို့ခံ အိမ်ခြံမြေအကျိုးဆောင် ၁ဦးက ပြောပါတယ်။
အဲဒီအိမ်နဲ့ခြံရှိတဲ့ မယ်ခေါင်ရပ်ကွက်ဟာ တာချီလိတ်မြို့ အမှတ် ၁တံတားနဲ့ အမှတ် ၂တံတားကြားမှာရှိပြီး နေရာကောင်းဖြစ်ကာ ဗိုလ်မှူးကြီးမင်းမင်းထွန်းပိုင်တဲ့ အိမ်နဲ့ခြံဟာ သာမန်ခြံကွက် ၇ပေါ်မှာ တည်ဆောက်ထားတာဖြစ်ရှိတယ်လို့ အဲဒီအိမ်ခြံမြေအကျိုးဆောင်က ပြောပါတယ်။
“အဲဒီရပ်ကွက်မှာ ၇ ကွက်တွဲက ရဖို့မလွယ်ဘူး။ တော်တော်ကို ခမ်းခမ်းနားနားဆောက်ထားတာ။ သူ(ဗိုလ်မှူးကြီးမင်းမင်းထွန်း) နေတောင်မနေသွားရဘူးထင်တယ်” လို့ သူက ပြောပါတယ်။
ဖေ့စ်ဘွတ်ပေါ်မှာ ကြော်ငြာထားတဲ့ပို့စ်အရ အခုရောင်းချမယ့် ၃၅သန်းတန်အိမ်ဟာ ခြံကွက် ၇ကွက်ပေါ်မှာ တည်ဆောက်ထားတဲ့ ၂ထပ်တိုက်အိမ်၊ ကား အစီး ၂၀ရပ်လို့ရတဲ့ မြေနေရာအကျယ်၊ အိမ်ခန်း ၅ခန်း၊ ဟော်ခန်း၊ ဧည့်ခန်း၊ အစည်းအဝေးခန်းတွေပါဝင်ပြီး ပါတီပွဲတွေကျင်းပဖို့ နေရာကို အထူးကောင်းမွန်အောင်ပြင်ဆင်ထားတယ်လို့ ပါရှိပါတယ်။
သေဆုံးသွားတဲ့ ဗိုလ်မှူးကြီးမင်းမင်းထွန်းဟာ တာချီလိတ််မြို့မှာ ဗျူဟာမှူးအဖြစ်တာဝန်ထမ်းဆောင်ခဲ့စဉ်က တခြားပစ္စည်းဥစ္စာတွေအပြင် နေအိမ် ၃၊ ၄ လုံးခန့် ပိုင်ဆိုင်ခဲ့တယ်လို့ အိမ်ခြံမြေတန်ဖိုးတင် ဘတ်သန်း ၁၀၀ နီးပါးတန်ကြေးရှိတယ်လို့ နောက်ထပ် သတင်းရင်းမြစ် ၁ဦးက မဲခေါင်ကို ပြောပါတယ်။
တာချီလိတ််မြို့တွင်းမှာသာမက အချက်အခြာကျတဲ့ ကျေးရွာတချို့မှာပါ အိမ်ခြံမြေတွေပိုင်ဆိုင်ခဲ့ပြီး မြို့ခံသူဌေးတွေထံကနေ တောင်းယူထားတာတွေလည်းပါဝင်တယ်လို့ သူက ပြောပါတယ်။
“မိုင်းဖုန်း (ခ)ဘက် ဝမ်ဆောက်ခုံရွာအဝင်က ဆွတ်ဆိုင်မှာလည်း သူ့မြေကွက်တွေရှိတယ်” လို့ အဲဒီသတင်းရင်းမြစ်က ပြောပါတယ်။
ဗိုလ်မှူးကြီးမင်းမင်းထွန်းရဲ့ အမျိုးသမီးဖြစ်သူဟာ ဆရာဝန် ၁ဦးဖြစ်ပြီး စစ်တပ်အာဏာသိမ်းကာစတုန်းက CDM ပြုလုပ်ကာ သူနဲ့ ကွာရှင်းခဲ့တာကြောင့် ကျန်ခဲ့တဲ့ အိမ်ခြံမြေတွေကို ဘယ်သူတွေက စီမံခန့်ခွဲတယ်ဆိုတာတော့ မသိရဘူးလို့ သူက ပြောပါတယ်။
ဗိုလ်မှူးကြီးမင်းမင်းထွန်းဟာ တာချီလိတ်ကနေ ရခိုင်ပြည်ဘက်ကို ပြောင်းရွှေ့ခဲ့ရပြီး ဖေဖော်ဝါရီလ ၇ရက်က AA က မြောက်ဦး ခမရ ၃၇၇ ကို တိုက်ခိုက်သိမ်းပိုက်စဉ် အသေဖမ်းမိခဲ့တာ ဖြစ်ပါတယ်။
MK – 004
