မဲခေါင်၊ ဖေဖော်ဝါရီ ၉
မန္တလေး အိုးဘိုထောင်မှာ နိုင်ငံရေး အကျဉ်းသား အမျိုးသမီး အိပ်ဆောင်တွေထဲသို့ ထောင်ဝန်ထမ်း အမျိုးသား ၁၅၀ ခန့် ဝင်ရောက်ကာ အကြမ်းဖက် ရိုက်နှက်ခဲ့တယ်လို့ တိကျခိုင်မာတဲ့ အကျဉ်းထောင် သတင်းရင်းမြစ်ထံက သိရပါတယ်။
ဖေဖော်ဝါရီ ၃ ရက် နေ့လယ် ၃ နာရီ ၅၀ မိနစ်က အမျိုးသမီး အိပ်ဆောင် (၁) မှာ အကျဉ်းသူ အချင်းချင်း ရန်ဖြစ်ရာ ပြဿနာ ဖြေရှင်းပေးတာ မရှိဘဲ ထောင်ဝန်ထမ်း အမျိုးသားတွေကို ခေါ်ယူပြီး ရိုက်နှက်ခိုင်းခဲ့တာလို့ သိရပါတယ်။
အမျိုးသမီး အိပ်ဆောင် (၁) အကျဉ်းသူတွေက ဒီကိစ္စကို လက်မခံနိုင်တာကြောင့် ထောင်ပိုင်ကို တွေ့ဆုံ တင်ပြပေးဖို့ တောင်းဆိုရာ တာဝန်ကျ အမျိုးသမီး ဝန်ထမ်းက ဖြေရှင်းပေးမယ်လို့သာ ပြောဆိုခဲ့တယ်လို့ သိရပါတယ်။
ဖေဖော်ဝါရီ ၄ ရက် မနက် ၉ နာရီမှာလည်း အမျိုးသမီး အိပ်ဆောင် (၂) မှ အမျိုးသမီးချင်း စကားများရာ ဖြေရှင်းမပေးဘဲ ထောင်ဝန်ထမ်း အမျိုးသားတွေကို ခေါ်ယူပြီး အရင်နေ့က အတိုင်း ရိုက်နှက်ခဲ့တယ်လို့ သိရပါတယ်။
ပြဿနာ ဖြစ်ပွားခဲ့တဲ့ အဆောင် နှစ်ခုက နိုင်ငံရေး အကျဉ်းသား အမျိုးသမီးတွေကို အခန်းတွင်း ပိတ်လှောင်ပြီး လက်နက်အပြည့်အစုံနဲ့ ထောင်ဝန်ထမ်း အမျိုးသား ၁၅၀ ထက်မနည်းက အခန်းထဲထိ ဝင်ရောက်ကာ အကြမ်းဖက် ရိုက်နှက်ခဲ့တယ်လို့ သတင်းပေးချက်အရ သိရပါတယ်။
အဲဒီလို ရိုက်နှက်ရာမှာ သံတုတ်၊ ဝါးဆစ်ပိတ်၊ လောက်လေးခွနဲ့ အင်္ဂတေ လောက်စာလုံး၊ ကျင်စက်တွေ အသုံးပြုကာ ရေနွေးပူတွေပက်ပြီး အကြမ်းဖက် ရိုက်နှက်ခဲ့တယ်လို့ သိရပါတယ်။
ဒါ့အပြင် အိပ်ဆောင် အခန်းအပြင်မှာ ရှိနေတဲ့ သက်ကြီးရွယ်အို အမျိုးသမီးတွေကိုလည်း ရိုက်နှက်ပြီး အခန်းတွင်း ပိတ်လှောင်ကာ အကြိမကြိမ် ရိုက်နှက်နှိပ်စက်ခဲ့တယ်လို့ ဆိုပါတယ်။
အဲဒီ အကြမ်းဖက်မှုတွေကြောင့် အကျဉ်းသူတွေ ဒဏ်ရာ ရရှိခဲ့ရာမှာ ဦးခေါင်းကွဲသူ ၆ ဦး၊ နားရွက်ပြတ်ရှ ဒဏ်ရာ ရသူ ၂ ဦး၊ မျက်လုံးအနီး လေးခွမှန်သူ ၃ ဦး၊ လက်ကျိုးသူ တစ်ဦး၊ မျက်မှန်ကွဲပြီး မျက်လုံးထဲ မှန်စဝင်သူ တစ်ဦးနဲ့ လောက်လေးခွ ထိမှန် ဒဏ်ရရသူ ၇၀ ဦးထက်မနည်း ရှိခဲ့တယ်လို့ သိရပါတယ်။
အခုဖြစ်စဉ်မှာ ဦးခေါင်းကွဲသူတွေနဲ့ နားရွက်ပြတ်ရှ ဒဏ်ရာရသူတွေ ၅ ချက်စီ ချုပ်ရကာ ဆေးဝါး ကုသခွင့် လုံလောက်စွာ မရရှိဘဲ ထောင်အာဏာပိုင်တွေက အပေါ်ယံသာ ကုသပေးခဲ့တယ်လို့ ဆိုပါတယ်။
လက်ရှိ ဒဏ်ရာရသူ နိုင်ငံရေး အကျဉ်းသူ အမျိုးသမီးတွေကို ရုံးချိန်းရက်မှာ ရုံးမထုတ်ဘဲ Video call နဲ့သာ ရုံးချိန်းပေးတယ်လို့ သိရပြီး ရုံးချိန်းထွက်ရသူတွေကိုလည်း အပြင်သို့ သတင်းပေါက်ကြားပါက နောက်ထပ် ပုဒ်မ ထပ်တပ်ခံရမယ်လို့ ခြိမ်းခြောက်ထားတယ်လို့ သိရပါတယ်။
MK-003
#MeKongNews
