မဲခေါင်၊ ဖေဖော်ဝါရီ ၁

၂၀၀၈ ဖွဲ့စည်းပုံ အခြေခံ ဥပဒေ ပုဒ်မ ၄၁၉ အရ နိုင်ငံတော်ရဲ့ တာဝန်အရပ်ရပ်ကို အာဏာသိမ်း စစ်ကောင်စီ အဖွဲ့ ဥက္ကဋ္ဌ မင်းအောင်လှိုင်ထံ နောက်ထပ် ၆ လ ထပ်မံ အပ်နှံထားတယ်လို့ စစ်ကောင်စီရဲ့ ကာ/လုံလို့ သတ်မှတ်ထားတဲ့ မနေ့က အစည်းအဝေး ဆုံးဖြတ်ချက်ကို ဒီ‌ကနေ့မှာ ထုတ်ပြန်လိုက်ပါတယ်။

မြို့နယ် ၃၃၀ အနက် ၁၃၂ မြို့နယ်ကို မထိန်းသိမ်းနိုင်ဘဲ တိုင်းပြည် တည်ငြိမ်အေးချမ်းရေးဟာ သာမန် အခြေအနေ မဟုတ်တာကြောင့် မင်းအောင်လှိုင် ဦးဆောင်တဲ့ နိုင်ငံတော် စီမံအုပ်ချုပ်ရေး ကောင်စီကို ဖေဖော်ဝါရီ ၁ ရက်က စတင်ပြီး နောက်ထပ် ၆ လ သက်တမ်း တိုးပေးလိုက်တယ်လို့ နိုင်ငံတော် ကာကွယ်ရေးနဲ့ လုံခြုံရေးကောင်စီက ထုတ်ပြန်ခဲ့တာ ဖြစ်ပါတယ်။

စစ်တပ်က ရေးဆွဲခဲ့တဲ့ ၂၀၀၈ အခြေခံဥပဒေ ပုဒ်မ ၄၂၅ အရ မင်းအောင်လှိုင် အနေနဲ့ တိုင်းပြည် အခြေအနေဟာ သာမန်မဟုတ်တဲ့ အတွက် တာဝန်များ ပြီးမြောက်အောင် လုပ်ဆောင်နိုင်ခြင်းမရှိကြောင်း ကာလုံ အစည်းအဝေးမှာ တင်ပြလာပါက ကာလုံ အနေနဲ့ သက်တမ်း ၆ လ ၂ ကြိမ် ထပ်တိုးပေးနိုင်တယ်လို့ ဖော်ပြထားပါတယ်။

လက်ရှိ နိုင်ငံရဲ့ အခြေအနေဟာ သာမန်အခြေအနေ မဟုတ်တာကြောင့် မင်းအောင်လှိုင်ရဲ့ အာဏာ သက်တမ်းကို ၆ လထပ်မံ တိုးမြှင့်ပေးလိုက်တယ်လို့ ကာလုံက ကြေညာလိုက်တာပါ။

မြန်မာနိုင်ငံမှာ မြို့နယ် ၃၃၀ ခု ရှိတဲ့အနက် ၁၉၈ မြို့နယ်မှာသာ လုံခြုံရေး ထိန်းနိုင်ပြီး ၁၃၂ မြို့နယ်မှာ မထိန်းနိုင်တော့ဘူးလို့ မင်းအောင်လှိုင်က ဝန်ခံထားပြီး လုံခြုံရေး အလေးထား ဆောင်ရွက်ရမယ့် မြို့နယ် ၆၇ မြို့နယ်နဲ့ လုံခြုံရေး ထိထိရောက်ရောက် ဆောင်ရွက်ပေးဖို့ လိုအပ်တဲ့ မြို့နယ် ၆၅ မြို့နယ်ရှိတယ်လို့ စစ်ကောင်စီက ထုတ်ပြန်ထားပါတယ်။

MK-003

#MekongNews

#စစ်ကောင်စီ

#ကာလုံ

#အခြေခံဥပဒေ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)