မဲခေါင်၊ မတ် ၁၈

စစ်ကိုင်းတိုင်း၊ မုံရွာခရိုင်၊ အရာတော်မြို့ နေအိမ်အတွင်း ဖွင့်လှစ်ထားတဲ့ ဆေးခန်းမှာ ဒီကနေ့ မနက်ပိုင်းက သားဖွားဆရာမ တစ်ဦး သေနတ်နဲ့ ပစ်ခံရလို့ သေဆုံးသွားတယ်လို့ ဒေသခံ တစ်ဦးက မဲခေါင်သတင်းကို ပြောပါတယ်။

ဒီကနေ့ မနက် ၈ နာရီဝန်းကျင်က အရာတော်မြို့၊ အမှတ် (၁) ရပ်ကွက်ရှိ နေအိမ် ဆေးခန်းသို့ ဆေးခန်းပြဖို့ ဆိုပြီး ရောက်လာတဲ့ အမျိုးသားနဲ့ အမျိုးသမီးက ရင်ဘတ်နဲ့ ဦိးခါင်းကို ပစ်ခဲ့လို့ နေရာမှာ သေဆုံးသွားတယ်လို့ သူကပြောပါတယ်။

“ မြို့ပေါ်မှာ တာဝန်ကျလို့ အလုပ်လုပ်နေတာ။ အိမ်မှာလည်း ဆေးခန်းလေး ဖွင့်ပြီး ကုတယ်။ သူ့အမျိုးသားက ဓာတ်ပုံရိုက်တယ်။ သားလေး တစ်ယောက် ကျန်ခဲ့တယ်၊ ၁၀ နှစ်လောက်ရှိတယ်။ သူ့ကို ပစ်တဲ့အချိန်မှာ အိမ်မှာ မိသားစုတွေ အကုန်ရှိတယ်။ ကျန်တဲ့သူတွေကို ဘာမှ လုပ်မသွားဘူး။ လာသတ်တဲ့ သူတွေကိုတောင် ဆေးတကယ် လာကုတယ်ထင်လို့ လက်ဖက်ရည်နဲ့မုန့် ချကျွေးလိုက်သေးတယ်” လို့ သူကပြောပါတယ်။

သေဆုံးသူ သားဖွား ဆရာမမှာ အသက် ၄၃ နှစ်အရွယ် ဒေါ်အေးအေးမော် ဖြစ်ပြီး သူမနေအိမ်နဲ့ စစ်တပ်ဂိတ် ပေ ၁၀၀ ကျော်သာ ကွာဝေးပေမယ့် ပစ်ခတ်ခဲ့တဲ့ အမျိုးသားနဲ့ အမျိုးသမီးကို ဖမ်းဆီးနိုင်တာ မရှိဘူးလို့ ဒေသခံတစ်ဦးက ပြောပါတယ်။

သားဖွားဆရာမကို ဘယ်သူတွေက ဘာကြောင့် ပစ်သတ်ခဲ့တယ် ဆိုတာကို မသိရသေးဘဲ မဲခေါင်သတင်း အနေနဲ့ စုံစမ်း မေးမြန်းနေဆဲ ဖြစ်ပါတယ်။

ပစ်သတ်ခံရသူ သားဖွားဆရာမ ဒေါ်အေးအေးမော် ဟာ အရာတော် ပြည်သူ့ဆေးရုံမှာ တာဝန် ထမ်းဆောင်နေသူဖြစ်ပြီး အဆိုပါ အမှတ် (၁) ရပ်ကွက်မှာ သေနတ်နဲ့ ပစ်သတ်ခံရသူ ၄ ဦးထက်မနည်း သေဆုံးခဲ့ဘူးတယ်လို့ ဒေသခံက ပြောပါတယ်။

MK-005

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)