မဲခေါင်၊ ဇန်နဝါရီ ၂၀
အကြမ်းမဖက် အာဏာဖီဆန်ရေး လှုပ်ရှားမှု-CDM နိုင်ငံ့ဝန်ထမ်း ဆိုင်ရာ မူဝါဒ စာတမ်းကို JCC-CDM က ရေးသားပြုစုခဲ့ရာ အမျိုးသား ညီညွတ်ရေး အတိုင်ပင်ခံ ကောင်စီ-NUCC က ဒီနေ့မှာ ထုတ်ပြန်လိုက်ပါတယ်။
JCC-CDM မှာ အတည်ပြုပြီး ပေးပို့တင်ပြတဲ့ CDM နိုင်ငံ့ဝန်ထမ်း ဆိုင်ရာ မူဝါဒ စာတမ်းကို အခြေပြုပြီး အမျိုးသား ညီညွတ်ရေး အတိုင်ပင်ခံ ကောင်စီက မူဝါဒ ၄ ရပ် ချမှတ်ထားပါတယ်။
နိုင်ငံ့ဝန်ထမ်း CDM တွေဟာ တိုင်းပြည် ပြောင်းလဲရေး အတွက် တော်လှန်ရေးရဲ့ အရေးပါတဲ့ အင်အားစု တစ်ရပ် ဖြစ်တာကို NUCC အနေနဲ့ မှတ်တမ်းတင် ဂုဏ်ပြုထားပါတယ်။
CDM နိုင်ငံ့ဝန်ထမ်းတွေနဲ့ ပတ်သက်ပြီး အသွင်ကူးပြောင်းရေး ဆိုင်ရာ တရားမျှတမှု ပြန်လည် ရှာဖွေ ဖော်ထုတ်ရာမှာ အသိအမှတ်ပြု မှတ်တမ်းတင်တာ၊ ဂုဏ်ပြုချီးမြှင့်တာ၊ အမှန်တရားနဲ့ တရားမျှတမှု ရှာဖွေတာ၊ နစ်နာမှု တွေကို ပြန်လည်ကုစား ပေးတာတွေ ပါဝင်ပါတယ်။
ဒီနိုင်ငံ့ဝန်ထမ်း CDM မူဝါဒကို အခြေပြုပြီး လိုအပ်တဲ့ ဥပဒေ၊ နည်းဥပဒေနဲ့ လုပ်ထုံးလုပ်နည်းတွေကို ဆက်လက် ရေးဆွဲသွားမှာ ဖြစ်တယ်လို့ သိရပါတယ်။
နိုင်ငံ့ဝန်ထမ်း CDM တွေ အပါအဝင် ပြည်သူလူထု တရပ်လုံး အပေါ် အာဏာရှင် ထောက်တိုင်တွေ ဖြစ်ကြတဲ့ Non-CDM တွေက လူ့အခွင့်အရေး ချိုးဖောက်မှု၊ အကြမ်းဖက်မှု၊ ရာဇဝတ်မှုတွေကို ကျူးလွန် နေတာကို သက်သေ အထောက်အထားတွေ တွေ့ရှိပါက သက်ဆိုင်ရာ ဒေသ အသီးသီးမှ တရားဝင် အတည်ပြုထားတဲ့ ဒေသ ဥပဒေတွေနဲ့ အရေးယူ ဆောင်ရွက်သွားမယ်လို့ ထုတ်ပြန်ထားပါတယ်။
အမျိုးသား ညီညွတ်ရေး အတိုင်ပင်ခံ ကောင်စီက JCC-CDM က ရေးသား ပြုစုထားတဲ့ နိုင်ငံ့ဝန်ထမ်း CDM မူဝါဒ စာတမ်း အပြည့်အစုံကို အများပြည်သူ လေ့လာနိုင်ဖို့ ဒီကနေ့ ထုတ်ပြန်ထားတယ်လို့ သိရပါတယ်။
MK-003
