မဲခေါင်၊ ဩဂုတ် ၂၉
ကရင်နီပြည်နယ် အတွင်း တိုက်ပွဲမှာ ကျရှုံးနေတဲ့ စစ်ကောင်စီတပ်ဟာ တိုက်ပွဲနဲ့ မဆိုင်တဲ့ ကျေးရွာတွေကို မီးရှို့နေတယ်လို့ ကရင်နီ အမျိုးသားများ ကာကွယ်ရေးတပ်-KNDF စစ်ရေးချုပ် ခူးရီးဒူက ပြောပါတယ်။
ဒါ့အပြင် စစ်ကောင်စီဟာ တိုက်ပွဲအတွင်းနဲ့ တိုက်ပွဲမဖြစ်တဲ့ အချိန်မှာပါ တိုက်ပွဲနဲ့မဆိုင်တဲ့ နေရာတွေ၊ ရွာတွေကို လေယာဉ်နဲ့ ဗုံးကြဲတာတွေ ပြုလုပ်နေတယ်လို့ သူကပြောပါတယ်။
“သူတို့တွေက ကြွက်မနိုင် စပါးကျီမီးရှို့ ဆိုသလိုပေါ့။ အထိအနာများတဲ့ အချိန်၊ အကျအဆုံး များတဲ့ အချိန်မှာ ကျတော့ ရွာတွေကို မီးရှို့လေ့ရှိတယ်။ ဒါက တစ်ဖက်ကနေ ကြည့်လို့ရှိရင်တော့ သူတို့(စကစ) ဘက်ကနေ ကြည့်လို့ရှိရင် စိတ်ဓာတ်စစ်ဆင်ရေးလို့ သူတို့လုပ်တာပေါ့။ သူများအိမ်တွေကို ဖောက်ထွင်းတာရှိတယ်။ ပြီးတော့မှ ပစ္စည်းဥစ္စာတွေကို သူတို့တွေက အကုန်လုံး မသွားတာပေါ့” လို့ KNDF စစ်ရေးချုပ်က ပြောပါတယ်။
အဲ့ဒီ အခြေအနေမှာ တော်လှန်ရေးတပ် အနေနဲ့ ပိတ်မိနေတဲ့ ပြည်သူတွေကို ကယ်ထုတ်နိုင်တာရှိသလို စစ်ကောင်စီ စစ်ကြောင်းနဲ့ ဘေးကင်းရာကို ရွှေ့ပြောင်းပေးခဲ့တာတွေ ရှိတယ်လို့ ဆိုပါတယ်။
“မတ်လတုန်းက ဒီဘောလခဲ ကနေ စစ်ကြောင်းထိုးလာတဲ့ ခလရ (၁၂) ရယ်၊ ခမရ (၅၁၅) ရယ်၊ (၅၁၆) ရယ် ကျွန်တော်တို့ ၃ ရက် ဆက်တိုက် တိုက်ပွဲကြီး ဖြစ်ပြီးတဲ့နောက်မှာ သူတို့တွေက သေကြေများတယ်။ သူတို့ လက်နက်ကို ရပြီးတော့ ဆုတ်တော့ စစ်ကောင်စီတပ်သားတွေက ဒေါတမကြီးရွာကို မီးလာရှို့တာ ဖြစ်တယ်ပေါ့။ တိုက်ပွဲဖြစ်ပြီး ကျွန်တော်တို့ ပြန်ဆုတ်ပြီး ညအချိန်နဲ့ တမနက်မှာ သူတို့လာရှို့တာ ဖြစ်တယ်။ ရွာထဲမှာ အိမ်မီးပြာကျတာ ၃ နေရာရှိတာပေါ့” လို့ ခူးရီးဒူ ကပြောပါတယ်။
ကရင်နီပြည်နယ်မှာ စစ်ကောင်စီတပ်တွေဟာ တော်လှန်ရေးတပ်ဖွဲ့တွေရဲ့ ပိတ်ဆို့မှုကို ခံရတဲ့အတွက် ရိက္ခာ ပြတ်တောက်လာချိန် ကျေးရွာတွေကို စစ်ကြောင်းထိုး ရိက္ခာရှာတာ၊ ရွာတွေကို မီးရှို့တာတွေ ပြုလုပ်နေတယ်လို့ ဆိုပါတယ်။
“ပထအချက်က သူတို့ ရိက္ခာမရှိတော့ဘူးပေါ့။ အဲ့ဒါ သူတို့လိုတဲ့ဟာ ရွာသားတွေဆီက ရမလားဆို ပြီးတော့ စစ်ကြောင်းထိုးပြီး ရှင်းတာပေါ့။ ကျွန်တော်တော့ အဲ့လိုမြင်တယ်” ခူးရီးဒူ ကပြောပါတယ်။
ကရင်နီပြည်နယ်မှာ ကရင်နီ ပူးပေါင်းတပ်ဖွဲ့နဲ့ စစ်ကောင်စီ တိုက်ပွဲပြင်းထန်နေပြီး တစ်ချို့ တိုက်ပွဲတွေက ၃ ရက်ဆက်တိုက် မရပ်မနား တိုက်ခဲ့ရတယ်လို့ သူကရှင်းပြပါတယ်။
“လက်ရှိမှာ ကျွန်တော်တို့ သူတိုနဲ့ ယှဉ်ပြိုင်ပြီး တိုက်နေတဲ့ ပွဲမှာ ခမရ (၅၁၅) တော့ ဖွဲ့စည်းပုံ ပျက်သွားပြီပေါ့လေ။ သူတို့က သေကြေအများဆုံးတပ် ဖြစ်တယ်။ ပြီးတော့ ခလရ (၁၂) သော်လည်းကောင်း ခမရ (၁၆) သော်လည်းကောင်း သူတို့လည်း သေကြေ ပျက်စီးမှုတွေရှိတယ်”လို့ ခူးရီးဒူ ကပြောပါတယ်။
အခုလို စစ်ကောင်စီကို အပြင်းအထန် ခုခံတိုက်ခိုက်နေတဲ့ တပ်ဖွဲ့တွေ အနေနဲ့ လက်နက်ခဲယမ်း မပြည့်စုံမှုနဲ့ ဘတ်ဂျက် မပြည့်စုံမှုက အဓိက အခက်အခဲ ဖြစ်တယ်လို့လည်း KNDF စစ်ရေးချုပ် ကပြောပါတယ်။
လက်ရှိမှာ KNDF စစ်ရေးချုပ်နဲ့ ဗျူဟာ (၆) ဗျူဟာမှူး ခူးရီးဒူ တို့ ဦးဆောင်ပြီး လိုအပ်တဲ့ လက်နက်ခဲယမ်းတွေ ဖြည့်ဆည်းဖို့ “ကရင်နီပြည်ရောက် မအလ ‘တပ်မ’ ပျောက်” ဆိုတဲ့ ကမ်ပိန်း ပြုလုပ်နေပါတယ်။
“ကရင်နီပြည်ရောက် မအလ ‘တပ်မ’ ပျောက်” ကမ်ပိန်းကို ဩဂုတ်လ ၂၃ ရက်မှ စက်တင်ဘာ ၂၃ ရက်နေ့အထိ ပြုလုပ်နေပြီး ကမ်ပိန်းကာလ အတွင်း လိုအပ်တဲ့ ကျည်ဆံ ဖြည့်တင်းဖို့ ကျပ်သိန်းတစ်သောင်း ရှာဖွေမှာ ဖြစ်တာကြောင့် “ကရင်နီပြည်ရောက် မအလ ‘တပ်မ’ ပျောက်” လူမှုကွန်ရက် စာမျက်နဲ့ သက်ဆိုင်ရာ ရံပုံငွေ ရှာဖွေရေးအဖွဲ့ကို ဆက်သွယ်ပြီး ကူညီဖို့ တိုက်တွန်းထားပါတယ်။
CJ-002
#MeKongNews
#KNDF
#စစ်ရေးချုပ်_ခူးရီးဒူ
#ခလရ
