မဲခေါင်၊ မတ် ၄
စစ်ကိုင်းတိုင်း၊ အင်းတော်မြို့ မီးပွိုင့်မှာ မနေ့က PDF ရဲဘော် ၂ ဦး မိုင်းမတော်တဆ ပေါက်ကွဲလို့ သေဆုံးခဲ့ပြီး စစ်ကောင်စီက ပြည်သူ ၇ ဦးကို ဖမ်းဆီးသွားတယ်လို့ Indaw Revolution-IR က မဲခေါင်သတင်းကို ပြောပါတယ်။
အင်းတော်မြို့မှာ ကင်းလှည့်နေတဲ့ ရဲကားကို ဖောက်ခွဲဖို့ PDF ၂ ဦး မိုင်းထောင်နေစဉ် မတော်တဆဖြစ်ပြီး အနီးကပ် ပေါက်ကွဲခဲ့တာကြောင့် ခန္ဓာကိုယ်တွေ တစ်စစီ ဖြစ်သွားတယ်လို့ IR တာဝန်ရှိသူက ပြောပါတယ်။
“အဲဒီ ရဲဘော် ၂ ဦးက အင်းတော်မြို့ပြပြောက်ကျားတပ်ဖွဲ့ကပါ။ အင်းတော်မြို့ထဲမှာ ကင်းလှည့်နေတဲ့ ရဲကားကို ဖောက်ခွဲဖို့ လုပ်ရင်း ဖြစ်သွားတာ။ အနီးကပ် ပေါက်ကွဲသွားတာ ဆိုတော့ ခန္ဓကိုယ်တွေ တစ်စစီဖြစ်ပြီး အလောင်း ပြန်ကောက်လို့ မရခဲ့ဘူး။ စစ်တပ်လာတော့ ရဲဘော်တွေရဲ့ ခန္ဓာကိုယ် အပိုင်းအစတွေကို လာကောက်ပြီး အင်းတော်သုဿန်မှာ သင်္ဂြိုဟ်သွားတယ်လို့တော့ ကြားတယ်’’ လို့ သူကဆိုပါတယ်။
ပေါက်ကွဲမှုဖြစ်ပြီးနောက် စစ်ကောင်စီက အနီးအနားက ပြည်သူ ၇ ဦးကို ဖမ်းဆီး ခေါ်ဆောင်သွားတယ်လို့ သူက ဆက်ပြောပါတယ်။
“မိုင်းပေါက်ပြီးတော့ စစ်ကောင်စီက စစ်ဆေးတာတွေ ရှိတယ်။ အမျိုးသား ၂ ဦးကို PDF တွေဆိုပြီး ဖမ်းသွားတယ်။ ပြီးတော့ နောက်ထပ် ပြည်သူ ၅ ဦးကိုလည်း PDF တွေနဲ့ ပတ်သက်နေတယ်ဆိုပြီး ထပ်လာဖမ်းသွားတယ်” လို့ ထပ်မံ ပြောဆိုပါတယ်။
စစ်ကောင်စီ ဖမ်းဆီးသွားတဲ့ ပြည်သူတွေရဲ့ အခြေအနေကို စုံစမ်းနေပြီး လက်ရှိအချိန်ထိတော့ သတင်း အတိအကျ မရသေးဘူးလို့ IR ကဆိုပါတယ်။
အင်းတော်မြို့နယ်ဟာ ဖေဖော်ဝါရီ ၂ ရက်က စစ်ကောင်စီ မာရှယ်လော ထုတ်ပြန်လိုက်တဲ့ မြို့နယ်ထဲမှာပါပြီး ပြီးခဲ့တဲ့ ရက်ပိုင်းက ည ၁၀ အပြင်ထွက်မိတဲ့ ပြည်သူ တစ်ဦးကို စစ်တပ်က ပစ်သတ်ခဲ့ပါသေးတယ်။
MK-007
#MeKongNews
#အင်းတော်
#PDF
#Indaw Revolution-IR
