စစ်ကိုင်းတိုင်း ဝက်လက်မြို့နယ်ရှိ ရှိမ်းမကားရွာကို စစ်ကောင်စီတပ်က နိုဝင်ဘာ ၁၁ ရက် ညပိုင်းမှာ မီးတင်ရှို့ခဲ့လို့ ဒေသခံတွေ ထွက်ပြေးနေရတယ်လို့ ဒေသခံ တစ်ဦးက ပြောပါတယ်။
“ ရှိမ်းမကားရွာအပြင် တခြားရွာတွေပါ ပြေးနေရတာပါ။ စစ်တပ်က အကြောင်းမဲ့ ရမ်းသန်းပစ်နေတာ။ အခုလည်း အရှေ့တောင်ခြမ်း ပေါက်ကန်ရွာမ ထဲမှာ ရောက်နေပြီး လက်နက်ကြီးတွေနဲ့ ရမ်းပစ်နေတာ” လို့ ပြေးနေရတဲ့ ဒေသခံတစ်ဦး က ပြောပါတယ်။
နိုဝင်ဘာ ၁၁ ရက် ညနေပိုင်းမှာ ရှိမ်းမကား ရဲစခန်းကို ဗိုလ်ကျားကြီး အဖွဲ့က လက်နက်ကြီးတွေနဲ့ ပစ်ခတ်တိုက်ခိုက်ခဲ့ပြီးနောက် ထိုနေ့ ည ၁၁ နာရီ ၁၅ မိနစ်ခန့်မှာ ရှိမ်းမကားရွာလယ် ဓမ္မာရုံ အနောက်ဘက်မှာ မီးရှို့ခဲ့တာလို့ Wetlet Information Network ကထုတ်ပြန်ထားပါတယ်။
အဲဒီလို မီးရှို့ ပစ်ခတ်မှုကြောင့် ဝက်လက်မြို့နယ် အရှေ့တောင်ခြမ်းနဲ့ မတ္တရာမြို့နယ် ရေလယ်ခေါင်ရွာ တချို့က ဒေသခံတွေပါ ပြေးနေရတယ်လို့ သိရပါတယ်။
ရှိမ်းမကားရဲစခန်းမှာ စစ်ကောင်စီတပ် အထိုင်အင်အား ၆၀ ခန့်ရှိပြီး နိုဝင်ဘာ ၁၁ ရက် ညနေပိုင်းက ပစ်ခတ်တိုက် ခိုက်မှုကြောင့် ထိခိုက်မှု အခြေအနေကိုတော့ မသိရသေးပါဘူး။
ရွှေဘိုခရိုင်၊ ဝက်လက်မြို့နယ်ရှိ ရှိမ်းမကားရွာဟာ ဧရာဝတီမြစ်ကမ်းဘေးမှာ တည်ရှိပြီး အိမ်ခြေ တစ်ထောင်ခန့်ရှိတဲ့ ရွာကြီးဖြစ်ကာ သာယာလှပတဲ့ ရှုခင်းတွေ ရှေး ဟောင်း အဆောက်အဦ တွေကြောင့် ထင်ရှားတဲ့ ခရီးသွားဒေသ ဖြစ်ပါတယ်။
ဒါပေမယ့် စစ်တပ်အာဏာသိမ်းပြီးနောက် လေကြောင်း ၊ ရေကြောင်း ကုန်းကြောင်းတွေနဲ့ ရွာကို စစ်ကြောင်းထိုး မီးရှို့မှုတွေကြောင့် ဒေသခံတွေ နေအိမ် စွန့်ခွာ ထွက်ပြေးနေကြရပါတယ်။
နိုဝင်ဘာ ၇ ရက်က ရှိမ်းမကားရဲစခန်းမှ လက်နက်ကြီးနဲ့ ပစ်ခတ်မှုကြောင့် ရွာခံ အမျိုးသမီးတစ်ဦး သေဆုံးခဲ့ကာ သုံးနှစ်အရွယ် ကလေး အပါအဝင် ဒေသခံ သုံးဦး ဒဏ်ရာရခဲ့တယ်လို့ သိရပါတယ်။
