မဲခေါင်၊ မတ် ၂၂
ရန်ကုန်တိုင်း၊ လှိုင်သာယာမြို့နယ်၊ တံတားဖြူမှတ်တိုင်ရှိ မြို့နယ် ထွေအုပ်နဲ့ ဥပဒေရုံး လိုင်းခန်းတွေ ဒီကနေ့ မနက်ပိုင်းက လက်ပစ်ဗုံး၊ အဝေးထိန်းမိုင်းတွေနဲ့ တိုက်ခိုက်ခံခဲ့ရပြီးနောက် စစ်တပ်က ဆိုင်ကယ်တွေကို တစ်နေကုန် လိုက်လံ ဖမ်းဆီးနေတယ်လို့ ဒေသခံတွေက မဲခေါင်သတင်းကို ပြောပါတယ်။
ဒီကနေ့ မနက် ၅ နာရီ ဝန်းကျင်က လိုင်းခန်းတွေ ဗုံးခွဲ တိုက်ခိုက်ခံခဲ့ရတာဖြစ်ပြီး ထိခိုက် ပျက်စီးမှု ရှိမရှိကိုမူ မသိရသေးဘူးလို့ ဒေသခံ တစ်ဦးက ပြောပါတယ်။
“ ပေါက်တဲ့ အသံကတော့ အကျယ်ကြီး ကြားရတယ်။ မနက် အစောပိုင်း ဆိုတော့ သေချာ မသိရဘူး။ အသံပဲ ကြားရပြီး ဘယ်သူမှလည်း ထွက်မကြည့်ရဲတာ။ မနက်မိုးလင်းထဲက ဆိုင်ကယ်တွေ အကုန်လုံးတော့ လိုက်ပြီး ဖမ်းနေတာ။ ခုညနေပိုင်း အထိ လိုက်ဖမ်းနေတုန်းဘဲ။ ရပ်ကွက်လမ်းတွေထဲ အထိ လိုက်ပြီး ဖမ်းနေတာ” လို့ သူကပြောပါတယ်။
အဲဒီနောက် ပေါက်ကွဲမှုဖြစ်တဲ့ နေရာမှာ စစ်ကား ၂ စီးနဲ့ မနက် ၇ နာရီကျော်က စတင်က ဆိုင်းကယ်တွေ ဖမ်းဆီး နေပြီး မနက် ၉ နာရီကျော်က အဖွဲ့စုံနဲ့ ရန်ကုန်-ပုသိမ်လမ်း စက်မှုဇုန်မီးပွိုင့် အကျော်၊ နေ့လယ်ပိုင်းမှာ BOC ထိပ်၊ ညနေ ၄ နာရီမှာတော့ ပင်လုံဈေးအနီး ဖမ်းဆီးနေပြီး ထန်းတပင်မြို့နယ် မှာတော့ ရပ်ကွက်ထဲ အထိ လိုက်လံ ဖမ်းဆီးမှုတွေ လုပ်နေတယ်လို့ ဒေသခံတွေက ပြောပါတယ်။
အဆိုပါ ဖောက်ခွဲ တိုက်ခိုက်မှုကို KMD 18၊ Black Shadow Squad နဲ့ Underground Revolution Knights Force တို့ ပူးပေါင်းပြီး စစ်ကိုင်းနဲ့ ကရင်နီဒေသမှာ စစ်တပ်က လက်နက်အားကိုးနဲ့ ထိုးစစ်ဆင်နေမှုကို လက်တုံ့ပြန်တာ ဖြစ်တယ်လို့ ထုတ်ပြန်ထားပါတယ်။
MK-005
