မဲခေါင်၊ ဖေဖော်ဝါရီ ၁၇
ရှမ်းပြည်နယ် တောင်ပိုင်း၊ လွိုင်လင်မြို့နယ်၊ ကွတ်ချိုကျေးရွာ အနီးမှာ ဘိန်းညိုမှုန့်နဲ့ လက်နက်တွေ သယ်ဆောင်လာတဲ့ ကားတစ်စီး ဖမ်းမိခဲ့တယ်လို့ မူးယစ်အရာရှိ တစ်ဦးက မဲခေါင်သတင်းကို ပြောပါတယ်။
သတင်းရရှိတဲ့ အတွက် ဖေဖော်ဝါရီ ၁၆ ရက်နေ့က စစ်ဆေးရာမှာ စိုင်းဆွမ် မောင်းနှင်လာတဲ့ လိုင်စင်မဲ့ယာဉ် အတွင်းမှ ဘိန်းညိုမှုန့်တွေနဲ့ လက်နက်အချို့ ဖမ်းဆီး ရမိခဲ့တာ ဖြစ်တယ်လို့ သူကပြောပါတယ်။
ကားကို စစ်ဆေးရာမှာ ကြမ်းခင်းအောက်မှာ ထည့်သွင်း သယ်ဆောင်လာတဲ့ ကာလတန်ဖိုး ကျပ်သိန်း ၁၅,၀၀၀ နီးပါး တန်ဖိုးရှိတဲ့ ဘိန်းညိုမှုန့်နဲ့ ပစ္စတို ၃ လက်၊ ကျည်အိမ် ၃ ခုနဲ့ ကျည်တောင့် ၁၅၀ ကို ဖမ်းဆီးရမိခဲ့တယ်လို့ သိရပါတယ်။
အဲလို တွေ့ရှိတာကြောင့် သယ်ဆောင်လာတဲ့ စိုင်းဆွမ်ကို မူးယစ်ဆေးဝါးနဲ့ စိတ်ကို ပြောင်းလဲစေသော ဆေးဝါးဆိုင်ရာ ဥပဒေ၊ တရားမဝင် လက်နက်ကိုင်ဆောင်တဲ့ ဥပဒေတွေနဲ့ အမှုဖွင့် စစ်ဆေးနေပြီး နောက်ဆက်တွဲ တရားခံတွေကို ရှာဖွေနေတယ်လို့ ရဲအရာရှိ တစ်ဦးက ပြောပါတယ်။
MK-005
#MeKongNews
#လွိုင်လင်
#ဘိန်းညို
#လက်နက်
