မဲခေါင်၊ ဩဂုတ် ၁၄
ရှမ်းပြည်နယ် တောင်ပိုင်းရှိ ဌာနဆိုင်ရာ ဝန်ထမ်းတွေကို ပြည်သူ့စစ်ဖွဲ့ဖို့ စစ်ကောင်စီရဲ့ တောင်ကြီးမြို့ အခြေစိုက် အရှေ့ပိုင်းတိုင်း စစ်ဌာနချုပ်-ရပခ က အမိန့်ထုတ်လိုက်ပြီး အင်အား စာရင်းကို တောင်းခံနေတယ်လို့ သတင်းရရှိပါတယ်။
အဲ့ဒီ ဝန်ထမ်း အင်အား စာရင်းတွေကို ဩဂုတ်လ ၁၇ ရက် နောက်ဆုံးထား အပြီးကောက် ပေးပို့ရမယ်လို့ စစ်ကောင်စီရဲ့ ရှမ်းပြည်နယ် လုံခြုံရေးနဲ့ နယ်စပ်ရေးရာဝန်ကြီး ဗိုလ်မှူးကြီးစိန်ဝင်း က စစ်ကောင်စီ ကိုယ်စား အမိန့်ထုတ်ထားတာ ဖြစ်ပါတယ်။
ရပခ နယ်မြေအတွင်း ပြည်သူ့စစ် မဟာဗျူဟာ ဖော်ဆောင်ဖို့ အတွက် ဝန်ထမ်းများကို ပြည်သူ့စစ် တပ်ရင်းအသွင် ဖွဲ့စည်းခြင်း၊ အင်အား အခြေအနေပေါ် မူတည်ပြီး တာဝန်ခွဲခြင်းနဲ့ အရေးကြုံလာရင် အရန်အင်အားများနဲ့ ဖွဲ့စည်း တာဝန်ပေးဖို့ အစီအစဉ် ရေးဆွဲမယ်လို့ အမိန့်စာမှာ ဖော်ပြထားပါတယ်။
ဒါကြောင့် ရပခ နယ်မြေအတွင်းမှာရှိတဲ့ ပြည်နယ်ရုံးတွေ၊ တောင်ကြီးခရိုင်၊ ကလောခရိုင်၊ ပအိုဝ်း ကိုယ်ပိုင်အုပ်ချုပ်ခွင့်ရဒေသ၊ ဓနု ကိုယ်ပိုင်အုပ်ချုပ်ခွင့်ရဒေသ မှာရှိတဲ့ ရဲတပ်ဖွဲ့မှလွဲပြီး ကျန်ဌာနဆိုင်ရာ အားလုံး ဝန်ထမ်းစာရင်းကို ရပခ ထံ ပေးပို့ရမယ်လို့ စစ်ကောင်စီရဲ့ အမိန့်စာမှာ ဖော်ပြထားပါတယ်။
ဝန်ထမ်း အင်အားစာရင်းမှာ ပညာရေးဌာနနဲ့ ကျန်းမာရေးဌာနပါ မကျန် ပေးပို့ရမှာဖြစ်ပြီး အဲ့ဒီလို ပေးပို့ရာမှာ အခြေပြုတဲ့ ကျေးရွာ ရပ်ကွက် စသဖြင့် အသေးစိတ် အချက်အလက်များကိုပါ ပေးပို့ရမှာ ဖြစ်ပါတယ်။
အဲ့ဒီအမိန့်စာတွေဟာ ပအိုဝ်း ကိုယ်ပိုင်အုပ်ချုပ်ခွင့်ရဒေသရုံးကို ရောက်လာခဲ့ပြီး လက်ရှိမှာတော့ စာရင်းတွေ စတင် ကောက်ခံနေတယ်လို့ စုံစမ်းသိရှိရပါတယ်။
“ကျွန်တော့် အသိတွေထဲမှာလည်း ကျောင်းဆရာ ဆရာမ လုပ်နေတဲ့သူတွေရှိတယ်။ သူတို့လည်း စာရင်း ပေးရတယ်တဲ့၊ သူများကို စာသင်ပေးချင်လို့ ဆရာအလုပ် ဝင်လျှောက်တာ အခုက တစ်ဖက်လှည့်နဲ့ စစ်သား စုဆောင်းခံရပြီလား ဆိုပြီး ပြောနေကြတယ်ဗျ” လို့ ပင်လောင်းမြို့နယ် ဒေသခံ တစ်ဦးက ပြောပါတယ်။
စစ်ကောင်စီက အခုလို လုပ်လာတာဟာ အာဏာကို ကာကွယ်ဖို့ လိုအပ်ရင် ဝန်ထမ်းတွေ အားလုံးကို လက်ကိုင်တုတ် ပြည်သူ့စစ် လုပ်ခိုင်းပြီး စစ်တိုက်ခိုင်းဖို့ ဖြစ်တယ်လို့ ရှမ်းပြည်နယ်မှ တက်ကြွလှုပ်ရှားသူ လူငယ်တစ်ဦးက သုံးသပ်ပါတယ်။
“ဒါတွေက သူ့အာဏာကို စည်းအထပ်ထပ် ကာကွယ်ထားဖို့ လုပ်တာပါပဲ၊ ဘယ်သူသေသေ သူ့အာဏာခိုင်မာဖို့ လုပ်တဲ့ လုပ်ရပ်ပါပဲ။ ဝန်ထမ်းတွေလည်း စစ်ကောင်စီအတွက် စစ်တိုက်ကြ၊ စစ်ကောင်စီအတွက် သေကြ အဲ့လို ပြောတာနဲ့ တူတူပဲ” လို့ သူကပြောပါတယ်။
စစ်ကောင်စီ အခုလို ပြုလုပ်တာဟာ ရှမ်းပြည်နယ်မှာရှိတဲ့ တိုက်ခိုက်ရေး အင်အားတွေ ကရင်နီပြည် ပို့ထားရတာကြောင့် လစ်လပ်သွားတဲ့ နေရာတွေကို ဝန်ထမ်းတွေနဲ့ အစားထိုး ကာကွယ်ထားဖို့ ကြိုးစားတဲ့ လုပ်ရပ် ဖြစ်တယ်လို့လည်း သူကပြောပါတယ်။
“အခုဆို ကလော အခြေစိုက် တပ်မတွေကအစ ကရင်နီကို စစ်ချီရတော့ ရှမ်းပြည်ထဲမှာ သူအင်အား နည်းနေတာပေါ့လေ။ အဲ့ဒါတွေကို ပြန်ဖာထေးဖို့လည်း ဖြစ်မှာပေါ့။ အခုဆိုရင် ရှမ်းပြည်နယ်ထဲက စစ်ကောင်စီရဲ့ စစ်ဆေးရေးဂိတ်တွေ တစ်ချို့ တောထဲက ရှေ့တန်းစခန်းတွေမှာလည်း ရဲတွေ ရောထိုင်နေရတာကို ကြည့်ရင် အသိသာကြီးပဲ” လို့ သူကပြောပါတယ်။
စစ်ကောင်စီရဲ့ အရှေ့ပိုင်းတိုင်း စစ်ဌာနချုပ် လက်အောက်ခံတပ်တွေနဲ့ လက်အောက်ခံ ပြည်သူ့စစ်တွေဟာ ကရင်နီပြည်နယ်မှာ စစ်ဆင်ရေး ဝင်နေရပြီး ကရင်နီ ပူးပေါင်းတပ်များရဲ့ ပြင်းပြင်းထန်ထန် ခုခံတော်လှန်မှုကြောင့် ထိခိုက်သေဆုံးမှု များနေပါတယ်။
CJ-002
#MeKongNews
#အရှေ့ပိုင်းတိုင်းစစ်ဌာနချုပ်
#ပြည်သူ့စစ်
#၀န်ထမ်း
#ရှင်းလင်းခံရ
