စစ်ကောင်စီက PDF နဲ့ UG တွေလို့ စွပ်စွဲဖမ်းဆီးထားသူ ၁၅ ဦးကျော်ကို တောင်လေးလုံးထောင်တွင်းတရားရုံးကနေ အကြမ်းဖက်မှုတိုက်ဖျက်ရေးဥပဒေတွေနဲ့ အနည်းဆုံးထောင်ဒဏ်နှစ် ၂၀ ကျော် ကနေ ၃၀ ကျော်အထိ ချမှတ်လိုက်တယ်လို့ ရှမ်းတောင် တော်လှန်ရေးအင်အားစု ဦးဆောင်သူတစ်ဦးက ဆိုပါတယ်။
တောင်ကြီးနဲ့ ရှမ်းတောင်က ဒီနှစ်ထဲမှာ ပါသွားတဲ့ PDF နဲ့ UG တွေကို ဖက်ဆစ်စစ်တပ်ရဲ့အလိုကျ မတရားရုံးတွေက အနည်းဆုံး နှစ်နှစ်ဆယ်လောက်ချလိုက်တယ်။ ကြားထဲမှာ မဆိုင်တဲ့ ပြည်သူတွေလည်း အနည်းဆုံး ၅ နှစ်ချခံရတယ်လို့ သိရပါတယ်။ အသေးစိတ်ကို စုံစမ်းနေတုန်းပါ
လို့ သူကပြောပါတယ်။
ရှမ်းပြည်နယ် တောင်ပိုင်းဒေသက ဖယ်ခုံ၊ မိုးဗြဲ၊ တောင်ကြီး၊ ရွာငံ၊ ပင်းတယ၊ ညောင်ရွှေ၊ အောင်ပန်း စတဲ့ ဒေသတွေမှာ ပြီးခဲ့တဲ့နှစ်၊ နိုဝင်ဘာလစတင်ပြီး တော်လှန်ရေးလှုပ်ရှားမှုတွေအားကောင်းခဲ့ပေမယ့် အခုနှစ်၊ ဇူလိုင်လကစတင်ပြီး ဖယ်ခုံ၊ မိုးဗြဲ ဒေသကလွဲလို့ ကျန်ဒေသတွေမှာ တော်လှန်ရေးလှုပ်ရှားမှု မရှိသလောက် နည်းပါးခဲ့ပါတယ်။
အဲဒီလို တော်လှန်ရေးလှုပ်ရှားမှု အားကောင်းခဲ့တဲ့ ကာလအတွင်း စစ်ကောင်စီတပ်သား၊ ရဲတပ်ဖွဲ့နဲ့ သတင်းပေး ဒလန်တွေ သုတ်သင်ရှင်းလင်းတာ၊ ပစ်ခတ်တိုက်ခိုက်တာ၊ ဗုံးခွဲတိုက်ခိုက်တာတွေရှိခဲ့သလို PDF နဲ့ UG တပ်ဖွဲ့ဝင် အများအပြားလည်း ဖမ်းဆီးခံခဲ့ရတယ်လို့ သိရပါတယ်။
အခု ဒီဇင်ဘာလ ၁၃ ရက်ကလည်း အောင်ပန်းမြို့၊ ရိုးမဘဏ်လမ်းဆုံမှာ ရွာငံမြို့ပြပျောက်ကြားတပ်ဖွဲ့ရဲ့ တပ်ဖွဲ့ဝင် ၁၁ ဦး ဖမ်းဆီးခံခဲ့ရပြီး လက်ရှိအချိန်ထိ အဆက်အသွယ်မရသေးသလို ဘယ်စစ်ကြောရေးစခန်းကို ရောက်ရှိနေသလဲဆိုတာ မသိရသေးဘူးလို့ တော်လှန်ရေးအင်အားစုတွေထံကနေ သိရပါတယ်။
