ရေစကြိုမြို့နယ်မှာ နိုဝင်ဘာနဲ့ ဒီဇင်ဘာ ၂၆ရက်အတွင်း စစ်ကောင်စီတပ်ရဲ့ စစ်ကြောင်းထိုးဖျက်ဆီးမှုကြောင့် ကျေးရွာ ၁၂ ရွာရှိ နေအိမ်တွေနဲ့ ပခုက္ကူ- မန္တလေးကားလမ်းမပေါ်ရှိ အောင်မိုးလမ်းဆုံက စားသောက်ဆိုင်ကြီး ၂ ဆိုင်အပါအဝင် နေအိမ်ပေါင်း ၁၆၂ လုံး မီးလောင်ပြာကျခဲ့တယ်လို့ ရေစကြို(ပအဖ)က အသိပေးထားပါတယ်။
ဒါ့အပြင် စစ်ကောင်စီတပ်က စစ်ကြောင်းထိုးရာ ကျေးရွာတွေရှိ ပြည်သူပိုင် ပစ္စည်းဥစ္စာတွေကို ခိုးယူ လုယက်ယူဆောင်တာ၊ အိမ်မွေးတိရစ္ဆာန်တွေကို သတ်ဖြတ်ချက်ပြုတ်စားသောက်တာ၊ အပြစ်မဲ့ ပြည်သူတွေကို လူသားဒိုင်းအဖြစ် ဖမ်းဆီးခေါ်ဆောင်တာ စတဲ့ စစ်ရာဇဝတ်မှုတွေ ကျူးလွန်လုပ်ဆောင်ခဲ့ကြတယ်လို့လည်း ရေစကြို(ပအဖ)အဖွဲ့က ဆိုပါတယ်။
မီးရှို့ခံရတဲ့ ကျေးရွာ ၁၂ ရွာမှာ ဆင်ခြေယာ၊ မြေစွန်းတော်၊ မာလကာခြံ၊ ရွာထောင်၊ ဆပ်သွား၊ ကုန်းရင်း၊ ငါးမြာကြီး၊ ဗြဘ(အနောက်)၊ ပိတ်သင်းကပ်၊ သစ်ခေါက်ဆိပ်၊ ထန်းပင်ချောင်း၊ ရွာသာအေးရွာ တို့ ဖြစ်ပါတယ်။
စစ်ကောင်စီတပ်ဖွဲ့ဝင်တွေဟာ ဒီဇင်ဘာ ၉ရက် မွန်းလွဲပိုင်းကလည်း ရေစကြိုမြို့နယ်၊ ပခန်းငယ်ရွာကို ပျူစောထီးအဖွဲ့တွေနဲ့ ဝင်ရောက်ပစ်ခတ်ကာ နေအိမ် ငါးလုံးကိုဖျက်ဆီးခဲ့ပြီး နေအိမ်တွေထဲက ပြည်သူပိုင်ပစ္စည်းဥစ္စာတွေကို ခိုးယူလုယက် ယူဆောင်သွားခဲ့ကြတယ်လို့ ရေစကြို(ပအဖ)အဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။
မီးရှို့ဖျက်ဆီးခြင်းခံခဲ့ရတဲ့ မီးဘေးသင့် မိဘပြည်သူတွေကို ထောက်ပံ့ကူညီ လှူဒါန်းမှုတွေ ပြုလုပ်နိုင်ဖို့ ဆောင်ရွက်နေတယ်လို့လည်း သတင်းထုတ်ပြန်ထားပါတယ်။
