စစ်ကောင်စီက တော်လှန်ရေးနဲ့ ပတ်သက်သူတွေကို လက်ခံထားတာ၊ အိမ်၊ အဆောင် ငှားရမ်းတာတွေ ပြုလုပ်ပါက ဖမ်းဆီးတာတွေနဲ့ အိမ်ချိတ်ပိတ်တာတွေ ဆက်တိုက်ပြုလုပ်လာတာကြောင့် အိမ်ပိုင်ရှင် အများစုက လူငယ်တွေကို မငှားဖို့ ပြောဆိုအပ်နှံတာတွေ ရှိတယ်လို့ အိမ်ခြံမြေ အကျိုးဆောင်တွေက ပြောပါတယ်။
ယောကျ်ားလေး သီးသန့်၊ မိန်းကလေး သီးသန့်ဆို အိမ်ရှင်တွေက လုံးဝ မငှားတော့ဘူး။ ကုမ္ပဏီကသူတွေ စုပြီး ငှားရမ်းတာတွေ ရှိတယ်။ ဘယ်လိုမှ မငှားတာ။ အခုက မိသားစု မဟုတ်ဘဲ လူငယ်တွေပဲဆို မငှားကြတော့ဘူး။ ရပ်ကွက်ရုံးကလည်း တရားဝင် ပြောတာမျိုး မဟုတ်ပေမယ့် သူတို့တွေက PDF ကို ငှားမိရင် ဖမ်းဆီမယ့်အပြင် အိမ်ပါ ချိတ်ပိတ်မယ် ဆိုတော့ မငှားရဲကြတော့ဘူး
လို့ အရှေ့ဒဂုံ (၁၃) ရပ်ကွက်နေ အိမ်ခြံမြေ အကျိုးဆောင်က ဆိုပါတယ်။
လက်ရှိ ဒဂုံမြို့သစ် အရှေ့ပိုင်း (၁၁) ရပ်ကွက်နဲ့ (၁၃) ရပ်ကွက်မှာ အိမ်ငှားရမ်းသူ များပြားနေလို့ ပုံမှန် ငှားရမ်းခထက် ဈေးမြင့်တက်ကာ ၃ လချုပ်နဲ့ ၆ လချုပ် ငှားရမ်းမှု များပြားနေတယ်လို့ သူကပြောပါတယ်။
အခုက လူကြည့် ငှားနေရတာ။ မိသားစု မဟုတ်ရင် မငှားဘူး။ ကောင်မလေးတွေ ကောင်လေးတွေချည်းပဲ လာငှားရင် မငှားရဲဘူး။ အိမ်ပါ ချိတ်ပိတ်မယ်ဆိုတော့ ဘယ်သူမှ မလုပ်ရဲဘူး။ သူတို့က ဥပဒအရ သေချာ ဖြေရှင်းခွင့်ပေးတာလည်း မဟုတ်ဘူး။ ဥပဒေက သူတို့ ပါးစပ်ထဲမှာလို ဖြစ်နေတဲ့ခေတ် ဖြစ်နေတော့ မငှားနဲ့ဆို မငှားဘဲ သူတို့နဲ့ လွတ်အောင်နေတာ အကောင်းဆုံးပဲ
လို့ အိမ်ငှားရမ်းတဲ့ အိမ်ပိုင်ရှင်တစ်ဦးက ဆိုပါတယ်။
လက်ရှိ ဒဂုံမြို့သစ် အရှေ့ပိုင်း မြို့နယ်မှာ အိမ်ငှားရမ်းခ တလ အနည်းဆုံး ကျပ် ၆ သောင်း ဝန်းကျင်မှ ကျပ် ၃ သိန်းကြား အိမ်နဲ့ အခန်းတွေကို ငှားရမ်း နေထိုင်မှု များပြားနေတယ်လို့ သိရပါတယ်။
