မဲခေါင်၊ မေ ၂၄
ရှမ်းပြည်နယ် တောင်ပိုင်း၊ မိုးဗြဲမြို့နယ်မှာ စစ်ရေး အခြေအနေတွေ တင်းမာနေပြီး စစ်ကောင်စီက အကြမ်းဖက် သတ်ဖြတ်မှုတွေ လုပ်နေတာကြောင့် ပြည်သူတွေ ခရီးသွားလာတာ ဂရုစိုက်ကြဖို့ မိုးဗြဲ PDF က ဒီကနေ့ မေလ ၂၄ ရက်မှာ သတိပေး ထုတ်ပြန်လိုက်ပါတယ်။
မေလ ၂၂ ရက် ညနေပိုင်းက မိုးဗြဲ စက်တော်ရာတောင်ပေါ်မှာ တပ်စွဲထားတဲ့ စစ်ကောင်စီတပ်တွေ လက်နက်ငယ်နဲ့ ပစ်ခတ်ခဲ့မှုကြောင့် ဖားဆောင်းကို ပြန်လာတဲ့ ကားတစ်စီး ထိမှန်ခဲ့ပြီး ကားပေါ်ပါ ပရဟိတ သမား ဖြစ်သူ ဦးအုန်းမြင့် ကျည်ထိမှန် သေဆုံးခဲ့ရပါတယ်။
မနေ့က မေလ ၂၃ ရက်၊ ည ၉ နာရီခွဲခန့်မှာလည်း မိုးဗြဲမြို့ အနီးက စစ်ရှောင်ကျေးရွာတွေကို စစ်ကောင်စီက လေကြောင်းကနေ ၂ ကြိမ် ဗုံးကြဲပြီး လက်နက်ကြီး ၅ ကြိမ်ထက်မနည်း ပစ်ခတ်တိုက်ခိုက်ခဲ့လို့ နေအိမ် ၂ လုံး ပျက်စီးခဲ့ရပါတယ်။
မိုးဗြဲမြို့နယ်ထဲမှာ စစ်ကေင်စီရဲ့ ရှမ်းအခြေစိုက် တပ်ရင်း တပ်မတွေ အပြင် တိုက်ခိုက်ရေး တပ်မဖြစ်တဲ့ တပ်မ (၆၆) တို့ လှုပ်ရှားနေပြီး အကြမ်းဖက် သတ်ဖြတ်နေလို့ ပြည်သူတွေ သွားလာတာ ဂရုစိုက်ကြဖို့ လိုတယ်လို့ မိုးဗြဲ PDF ဗဟိုပြန်ကြားရေး တာဝန်ရှိသူက မဲခေါင်သတင်းဌာနကို ပြောပါတယ်။
“လမ်းပိုင်း ပိတ်တာတော့ မဟုတ်ပါဘူး။ မြို့ထဲမှာလည်း တိုက်ပွဲတော့ မရှိပါဘူး။ ဒါပေမဲ့ စစ်ရေး အခြေအနေတွေက အစိုးမရလို့ သွားလာတာ ဂရုစိုက်ကြဖို့ပါပဲရှင့်။ ပြည်သူတွေ ဂရုစိုက်သွားလာကြဖို့ပဲ ပြောချင်ပါတယ်” လို့ သူကပြောပါတယ်။
ရှမ်းပြည်နယ် တောင်ပိုင်းနဲ့ ကရင်နီ နယ်စပ်ဒေသတွေဖြစ်တဲ့ ပင်လောင်း-ဖယ်ခုံ-မိုးဗြဲမြို့နယ်တွေမှာ စစ်ကောင်စီ၊ PNO ပြည်သူ့စစ်ပူးပေါင်းတပ်တွေနဲ့ ကရင်နီ တော်လှန်ရေး အင်အားစုတွေ တိုက်ပွဲ ပြင်းထန်နေတာ ၃ လကျော် ရှိနေပြီဖြစ်ပြီး တိုက်ပွဲအတွင်း စစ်သား ၃၅၀ နီးပါး သေဆုံးခဲ့တယ်လို့ ကရင်နီ အမျိုးသားများ ကာကွယ်ရေးတပ်-KNDF နဲ့ မိုးဗြဲ PDF တို့က ထုတ်ပြန်ထားပါတယ်။
MK-007
#MeKongNews
#မိုးဗြဲမြို့နယ်
#တပ်မ(၆၆)
