မဲခေါင်၊ ဇွန် ၁၆
ရှမ်းပြည်နယ် တောင်ပိုင်း၊ ဖယ်ခုံမြို့နယ်၊ မိုးဗြဲမြို့ကို စစ်ကောင်စီတပ်က အထူးစစ်ဆင်ရေး လုပ်နေတာကြောင့် ဒီနေ့ ဇွန်လ ၁၆ ရက်နေ့မှာ ပြည်သူ ၃ သောင်းဝန်းကျင် မြို့ကိုစွန့်ခွာ ထွက်ပြေးတိမ်းရှောင် နေရတယ်လို့ စစ်ဘေးရှောင်တွေကို ကူညီပေးသူ တစ်ဦးက ပြောပါတယ်။
စစ်ဘေးရှောင် ပြည်သူတွေဟာ ရှမ်းပြည်နယ်နဲ့ ကရင်နီပြည်နယ်မှာရှိတဲ့ နီးစပ်ရာ မြို့နဲ့ ကျေးရွာတွေမှာ စစ်ဘေးရှောင်နေရပြီလို့ ဆိုပါတယ်။
“ စစ်ရှောင် ပြည်သူတွေက ၂ သောင်းကျော် ၃သောင်း နီးပါး ရှိမယ်လို့ အုပ်ချုပ်ရေးပိုင်းထဲက ပြောပါတယ်။ အခက်ခဲတွေ အများကြီးပေါ့။ တစ်ချို့လည်း ကားတွေ ဆိုင်ကယ်တွေနဲ့ ရှောင်ကြသလို တစ်ချို့လည်း ဒီတိုင်းပဲ ရှောင်ကြရတာပေါ့။ ကူညီတဲ့ သူတွေလည်း တတ်နိုင်သလောက် ကူကြတာပေါ့” လို့ စစ်ဘေးရှောင်တွေကို ကူညီပေးသူက ပြောပါတယ်။
လက်ရှိ စစ်ကောင်စီတပ်က မိုးဗြဲမြို့ထဲကို အထူးစစ်ဆင်ရေးအဖြစ် စစ်အင်အား အလုံးအရင်းနဲ့ ထိုးစစ်ဆင်နေတဲ့ အပြင် တင့်ကားတွေ၊ လက်နက်ကြီးတွေ၊ လေကြောင်းကနေ တိုက်ခိုက်မှုတွေ ပြုလုပ်ဖို့ ပြင်ဆင်နေတယ်လို့ သိရပါတယ်။
ဒီကနေ့ မနက်ပိုင်းက စတင်ပြီး မိုးဗြဲမြို့ပေါ်မှာ တိုက်ပွဲတွေ ပြန်လည် ဖြစ်ပွားနေရာ စစ်ကောင်စီတပ်က အတွဲလိုက် ဒုံးလက်နက်ကြီးတွေနဲ့ ပစ်ခတ်နေတယ်လို့ မြို့ခံတွေက ပြောပါတယ်။
ပြီးခဲ့တဲ့ မတ်လ ၂၇ ရက်ကနေ လက်ရှိအချိန်ထိ မိုးဗြဲမြို့ပေါ် လူနေရပ်ကွက်တွေကို စစ်ကောင်စီက လက်နက်ကြီးတွေ ပစ်ခတ်တာ၊ စစ်ကြောင်းထိုး ဖမ်းဆီး သတ်ဖြတ်တာတွေ ပြုလုပ်လို့ အမျိုးသား ၉ ဦးနဲ့ အမျိုးသမီး ၅ ဦး သေဆုံးခဲ့ရပါတယ်။
သေဆုံးသူတွေထဲမှာ အသက်မပြည့်သေးတဲ့ ကလေးငယ် ၃ ဦးပါဝင်ကာ အမျိုးသမီး ၂ ဦးကိုတော့ စစ်ကောင်စီတပ်သားတွေ အဓမ္မပြုကျင့်ပြီး ပစ်သတ်ခဲ့တာ ဖြစ်တယ်လို့ မိုးဗြဲ ဒေသခံတွေက ပြောပါတယ်။
CJ-004
#MeKongNews
#မိုးဗြဲမြို့
#စစ်ဘေးရှောင်