မဲခေါင်၊ ဖေဖော်ဝါရီ ၁၈
မန္တလေးတိုင်း၊ မဟာအောင်မြေမြို့နယ်၊ ရွှေဘုန်းရှိန်ရပ်ကွက် အုပ်ချုပ်ရေးမှူး ဇော်ဝင်းထွန်း သေနတ်နဲ့ ပစ်သတ်ခံရပြီး နေရာမှာ ပွဲချင်းပြီး သေဆုံးကာ သူ့ထံက သေနတ်နဲ့ ကျည်ဆန်တွေ သိမ်းဆည်းရမိတယ်လို့ ပြောက်ကျားတပ်ဖွဲ့က ထုတ်ပြန်ပါတယ်။
ဖေဖော်ဝါရီ ၁၇ ရက်နေ့ မနက် ၆ နာရီကျော်က ရပ်ကွက်အုပ်ကြီးဖြစ်သူ ဇော်ဝင်းထွန်း သီတာအေးရပ်ကွက်သို့ အသွား အမျိုးသား ၂ ဦးက ဆိုင်ကယ်နဲ့ လိုက်လာပြီး ပစ်သတ်သွားတာလို့ မျက်မြင်တွေ့သူ တစ်ဦးက ပြောပါတယ်။
“ သီတာအေးရပ်ကွက်က ပညာပျိုးခင်း လမ်းအတိုင်း သွားနေတုန်း အပစ်ခံရတာ။ နားထင် ဖောက်ထွက်ပြီး ကျည်ဝင်သွားတာ။ ခေါင်းကိုထိတော့ နေရာမှာပဲ ပွဲချင်းပြီး သေတယ်။ ပြီးတော့ လုံခြုံရေးတွေ ရောက်လာပြီး စစ်ကြတာ။ မနက် အစောပိုင်း ဆိုတော့ လူလည်းရှင်းတယ်” လို့ သူကပြောပါတယ်။
အဆိုပါ ပစ်သတ်မှုကို AST-MDY အဖွဲ့မှ ပြုလုပ်ခဲ့တာ ဖြစ်တယ်လို့ သတင်းထုတ်ပြန်ထားပြီး သေဆုံးခဲ့သူ ရပ်ကွက်အုပ်ကြီး ဇော်ဝင်းထွန်းထံမှ ပွိုင့် ၂၂ သေနတ်နဲ့ ကျည်ဆံများ၊ ငွေကျပ် ၃၂၈,၀၀၀နဲ့ လက်ကိုင်ဖုန်း တစ်လုံး သိမ်းဆည်း ရမိခဲ့တယ်လို့ ထုတ်ပြန်ထားပါတယ်။
ပစ်သတ်ခံရသူ ဇော်ဝင်းထွန်း ဟာ အသက် ၅၆ နှစ် အရွယ်ရှိပြီး စစ်ကောင်စီက လက်နက်ပေးထားတဲ့ အုပ်ကြီး ဖြစ်တယ်လို့ ဒေသခံတွေကပြောပါတယ်။
MK-005
#MeKongNews
