မဲခေါင်၊ ဩဂုတ် ၂၈
ရှမ်းပြည်နယ် တောင်ပိုင်း၊ ဖယ်ခုံမြို့နယ်၊ ခေါင်းအိကျေးရွာနဲ့ စက်တော်ရာကျေးရွာမှာ ဒေသခံ ပြည်သူတွေ မရှိတော့ဘဲ စစ်ကောင်စီတပ်နဲ့ PDF တွေသာရှိပြီး စစ်တလင်းဖြစ်နေပြီလို့ ဖယ်ခုံ (၁၀၀၂) တပ်ရင်း တာ၀န်ခံက မဲခေါင်သတင်းဌာကို ပြောပါတယ်။
ပြီးခဲ့တဲ့ ဇွန်လအစပိုင်းက ခလရ (၂၄၈) တပ်ရင်းနဲ့ ပျူစောထီးပူးပေါင်း အင်အား ၁၀၀ ၀န်းကျင် ခေါင်းအိနဲ့ စက်တော်ရာကျေးရွာဘက် စစ်ကြောင်းထိုးလာရာက လက်ရှိအချိန်ထိ တိုက်ပွဲတွေ ဆက်ဖြစ်နေတယ်လို့ ဆိုပါတယ်။
ဇွန်လအစောပိုင်းကနေ လက်ရှိအချိန်ထိ တိုက်ပွဲတွေ ဆက်တိုက်ဖြစ်နေပြီး စစ်ရေး တင်းမာနေတာကြောင့် အဆိုပါ ကျေးရွာ ၂ ရွာက ပြည်သူ သောင်းဂဏန်းခန့်ဟာ မနေထိုင်ရဲတော့ဘဲ ဘေးလွတ်ရာ ထွက်ပြေးတိမ်းရှောင် နေကြရပါတယ်။
လက်ရှိ စက်တော်ရာကျေးရွာမှာ စစ်ကောင်စီက အင်အား ၁၀၀ ခန့် တပ်စွဲနေထိုင်နေပြီး ခေါင်းအိကျေးရွာကိုတော့ တော်လှန်ရေး အင်အားစုတွေက ထိန်းချုပ်ထားတယ်လို့ ဆိုပါတယ်။
“သူ့စည်း ကိုယ့်စည်းကတော့ ရှိသေးတာပေါ့။ ရွာထဲမှာတော့ ရွာသားတွေ မရှိတော့ပါဘူး။ စစ်ရေး ကတော့ တင်းမာနေဆဲပါပဲ” လို့ တပ်ရင်းမှူးက ရှင်းပြပါတယ်။
စစ်ကောင်စီဘက်က လက်နက်ကြီးနဲ့ မကြာခဏ ပစ်ခတ်ပေမဲ့ လေကြောင်း လာရောက်ပစ်ခတ်တာ မရှိသေးဘူးလို့ ဆိုပါတယ်။
လက်ရှိ စစ်ရေး အတင်းမာဆုံး အနေအထားရှိနေပြီး စစ်ကောင်စီဘက်က စစ်ရေးလှုပ်ရှားမှုတွေကြောင့် တိုက်ပွဲတွေ ပြန်ဖြစ်လာနိုင်တယ်လို့ ဆိုပါတယ်။
စစ်ကောင်စီဘက်က ဖယ်ခုံ-ပင်လောင်းဘက်မှာ အင်အား ဆက်တိုက်ဖြည့်နေပြီး တပ်အပြောင်းအရွှေ့တွေ ဆက်တိုက် ပြုလုပ်နေတာတွေကြောင့် အခြေအနေတွေ အပြောင်းအလဲ ဖြစ်လာနိုင်တယ်လို့ ဖယ်ခုံ PDF က ပြောပါတယ်။
“ရှိတယ်။ အခြေအနေပေါ် မူတည်ပြီးမှပဲ ပြောလို့ရမှာ။ အခုတော့ ပြောလို့မရသေးဘူး။ တင်းမာနေတာပဲ ပေါ့နော်” လို့ သူကရှင်းပြပါတယ်။
ပြီးခဲ့တဲ့ ဇူလိုင်လကစပြီး ရှမ်း-ကရင်နီ နယ်စပ်၊ ပင်လောင်း-ဖယ်ခုံ ဘက်ကနေ ကရင်နီပြည်နယ်ထဲကို ရှမ်းအခြေစိုက် တပ်ရင်းတွေ၊ စစ်ကိုင်းနဲ့ ရခိုင်ဘက်က တပ်မတွေပါ အသုံးပြုကာ အင်အား ဖြည့်တင်း နေတာကြောင့် တိုက်ပွဲတွေ ဆက်တိုက် ဖြစ်နေတယ်လို့ ကရင်နီ စစ်ရေးသတင်းရင်းမြစ်က ပြောပါတယ်။
MK-007
#MeKongNews
#ခေါင်းအိ_စက်တော်ရာ
#ဖယ်ခုံ(၁၀၀၂)တပ်ရင်း
#စစ်တလင်း
