ရှမ်းပြည်နယ် ဝန်ကြီးချုပ် ဒေါက်တာလင်းထွဋ်ကို တောင်လေးလုံး(ညောင်ရွှေ) အကျဉ်းထောင်ကနေ သာယာဝတီထောင်၊ ရှမ်းပြည်နယ်စီမံကိန်းနှင့် ဘဏ္ဍာရေးဝန်ကြီး ဦးစိုးညွန့်လွင်ကို တောင်လေးလုံး ထောင်ကနေ တောင်ငူကို ပြောင်းရွှေ့လိုက်တယ်လို့ ဆိုပါတယ်။
ဒီဇင်ဘာလ နောက်ဆုံးပတ်ထဲက တောင်လေးလုံးကနေ ပို့လိုက်တာ။ ဘာလို့ ထောင်ပြောင်းလိုက်လဲ ဆိုတာတော့ မသိရသေးဘူး။ အဆက်အသွယ် လုံးဝ ပေးမလုပ်ဘူး။ ကျန်းမာရေး အရမ်းကြီးတော့ မဟုတ်ပေမယ့် ကောင်းနေတယ်လို့ ကြားရတယ်
လို့ ဒေါက်တာလင်းထွဋ်နဲ့ နီးစပ်သူ တစ်ဦးက ပြောပါတယ်။
စစ်ကောင်စီရဲ့ စွပ်စွဲပုဒ်မ အမျိုးမျိုးနဲ့ ထောင်ဒဏ် ၁၆ နှစ် ချမှတ်ခံရပြီးတဲ့ ဒေါက်တာလင်းထွဋ် ဟာ ပြီးခဲ့တဲ့နှစ်၊ ဇူလိုင်လ ၂၆ ရက်က ရာဇသတ်ကြီး ဥပဒေ ပုဒ်မ-၁၃၀(က) နဲ့ ထပ်မံ တရားစွဲဆို ခံထားရပါတယ်။
ဒါ့အပြင် ဦးစိုးညွှန့်လွင် ကိုလည်း စွပ်စွဲပုဒ်မ အမျိုးမျိုးနဲ့ ထောင်ဒဏ် ၅၄ နှစ်နဲ့ ဒဏ်ငွေ ၂ သိန်း ချမှတ်ထားသလို စွပ်စွဲ အမှုဖွင့်ထားတဲ့ ပုဒ်မတွေ ကျန်ရှိနေသေးတယ်လို့ သိရပါတယ်။
အာဏာသိမ်းစစ်ကောင်စီဟာ နိုင်ငံတဝန်း စစ်အာဏာရှင် ဆန့်ကျင်ရင်း မတရားဖမ်းဆီး ခံရသူတွေကို မတရား ပြစ်ဒဏ်တွေ ချမှတ်နေရာ နိုင်ငံရေး သမားတွေ၊ အနုပညာရှင်တွေ၊ ရဟန်းသံဃာတွေနဲ့ ကျောင်းသား ကျောင်းသူတွေ ရာနဲ့ချီ ပါဝင်နေပါတယ်။
