မဲခေါင်၊ ဖေဖော်ဝါရီ ၂

CDM ဝန်ထမ်း အားလုံးကို တော်လှန်ရေး အလွန်ကာလမှာ ရာထူးတစ်ဆင့် တိုးပေးမှာဖြစ်ပြီး နိုင်ငံတော်အဆင့် ဂုဏ်ထူးဆောင် ဘွဲ့တံဆိပ်တွေ ချီးမြှင့်ရုံမက နေ့စားဝန်ထမ်းတွေကိုလည်း အာဏာသိမ်း ၂ နှစ်ပြည့်မှ စတင်ကာ အမြဲတမ်းဝန်ထမ်းတွေအဖြစ် အတည်ပြု ခန့်အပ်လိုက်တယ်လို့ အမျိုးသားညီညွတ်ရေးအစိုးရ-NUG က မနေ့ကထုတ်ပြန်လိုက်ပါတယ်။

CDM တွေအားလုံးကို တော်လှန်ရေး အလွန်ကာလမှာ နိုင်ငံတော်အဆင့် ဂုဏ်ထူးဆောင် ဘွဲ့တံဆိပ်တွေ ချီးမြှင့်ပေးအပ်မှာဖြစ်ပြီး စစ်အုပ်စု အာဏာသိမ်းတဲ့နေ့ မတိုင်ခင်အချိန်ထိ ထမ်းဆောင်ခဲ့တဲ့ ရာထူးတာဝန်‌ထက် ရာထူးတစ်ဆင့် တိုးမြှင့်ခန့်အပ်သွားမှာဖြစ်ကာ ရာထူးတိုးမြှင့်တဲ့ အမိန့်ဟာ ၂ဝ၂၃ ခုနှစ်၊ ဖေဖော်ဝါရီ ၁ ရက်မှစတင် အကျိုးသက်ရောက်မှာဖြစ်တယ်လို့ ဖော်ပြထားပါတယ်။

နိုင်ငံ့ဝန်ထမ်း CD4 သူရဲကောင်းတွေဖြစ်တဲ့ နေ့စားဝန်ထမ်းတွေ (အချိန်ပိုင်းနည်းပြ သရုပ်ပြတွေ အပါအဝင်) ကိုလည်း ဖေဖော်ဝါရီလ ၁ ရက်နေ့ ၂၀၂၃ မှ စတင်ကာ အမြဲတမ်းဝန်ထမ်းတွေအဖြစ် အတည်ပြု ခန့်ထားလိုက်တယ်လို့ ဆက်လက်ဖော်ပြထားပါတယ်။

စစ်အုပ်စု အာဏာသိမ်းတဲ့အချိန်ကစပြီး ထုတ်ယူထားတာမရှိခဲ့တဲ့ နိုင်ငံ့ဝန်ထမ်း CDM သူရဲကောင်းတွေရဲ့ လုပ်ခလစာငွေတွေနဲ့ ချီးမြှင့်ငွေတွေအားလုံးကို တော်လှန်ရေးအလွန်ကာလမှာ တစ်လုံးတစ်ခဲတည်း ပြန်လည်ပေးအပ်မယ်လို့လည်း အမျိုးသားညီညွတ်ရေးအစိုးရက ထုတ်ပြန်ထားပါတယ်။

MK-003

#MekongNews

#CDM

#NUG

#ဝန်ထမ်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)