မဲခေါင်၊ မတ် ၁၆
တရုတ်-မြန်မာ နယ်စပ်တည်ငြိမ်ရေး အတွက် တရုတ်နိုင်ငံနဲ့ လက်တွဲဆောင်ရွက်သွားမှာဖြစ်ပြီး မြန်မာနိုင်ငံတွင်း ဖြစ်ပွားနေတဲ့ ပဋိပက္ခတွေမှာ တရုတ်ရဲ့ ကြားဝင်ဆောင်ရွက်မှုတွေကို ထောက်ခံ ကျေးဇူးတင်တယ်လို့ မြောက်ပိုင်း မဟာမိတ် တိုင်းရင်းသားလက်နက်ကိုင်တွေက ဒီကနေ့ ပူးတွဲ ထုတ်ပြန်လိုက်ပါတယ်။
ပြည်ထောင်စု နိုင်ငံရေး ဆွေးနွေး ညှိနှိုင်းရေး ကော်မတီ-FPNCC လို့ အမည်တပ်ထားတဲ့ မြောက်ပိုင်း မဟာမိတ် တိုင်းရင်းသား လက်နက်ကိုင် အဖွဲ့တွေ ‘ဝ’ လက်နက်ကိုင်အဖွဲ့ ထိန်းချုပ်နယ်မြေ ပန်ဆန်းမှာ မတ်လ ၁၅ နဲ့ ၁၆ ရက်နေ့မှာ အစည်းအဝေး ကျင်းပပြီးနောက် ဒီကနေ့ ညပိုင်းမှာ အခုလို ထုတ်ပြန်လိုက်တာ ဖြစ်ပါတယ်။
တရုတ်နယ်စပ်က တိုင်းရင်းသား လက်နက်ကိုင် အများစု ပါဝင်တဲ့ FPNCC ဟာ မြန်မာနိုင်ငံဆိုင်ရာ တရုတ် အထူး ကိုယ်စားလှယ် မစ္စတာDeng Xijin နဲ့ တရုတ်နိုင်ငံ အတွင်း တွေ့ဆုံမှုတွေလည်း ရှိခဲ့တာပါ။
ပြီးခဲ့တဲ့ ၂၀၂၂ ခုနှစ် ဒီဇင်ဘာနဲ့ ၂၀၂၃ ခုနှစ် ဖေဖော်ဝါရီလတွေမှာ တရုတ် အထူး ကိုယ်စားလှယ် မစ္စတာ Deng Xijin ဟာ FPNCC အဖွဲ့ဝင်တွေနဲ့ တွေ့ဆုံထားပါတယ်။
FPNCC မှာ “ဝ”ပြည် သွေးစည်းညီညွတ်ရေး တပ်မတော် (UWSA)၊ ရှမ်းပြည်တိုးတက်ရေးပါတီ (SSPP)၊ ကချင်ပြည်လွတ်မြောက်ရေးအဖွဲ့ (KIO)၊ အမျိုးသားဒီမိုကရက်တစ်မဟာမိတ် တပ်မတော် (NDAA) ခေါ် မိုင်းလား၊ တအာင်း အမျိုးသားလွတ်မြောက်ရေး တပ်မတော် (TNLA) ၊ မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA)- ကိုးကန့်အဖွဲ့၊ ရက္ခိုင့်တပ်တော် (AA) အပြင် မြန်မာနိုင်ငံ အမှန်တရားနှင့်တရားမျှတသောပါတီ ဆိုတဲ့ အဖွဲ့သစ်လည်း ပါဝင်တယ်လို့ ထုတ်ပြန်ချက်မှာ ဖော်ပြထားပါတယ်။
#MeKongNews
#ပန်ဆန်း
#FPNCC
