မဲခေါင် ၊ နိုဝင်ဘာ ၁၉

နမ့်ခမ်းမြို့ စခန်းသစ် လုံခြုံရေးကုန်းကို တအာင်းအမျိုးသားလွတ်မြောက်ရေးတပ်မတော် (TNLA) မှတိုက်ခိုက်သိမ်းပိုက်ရမိပြီးနောက် စစ်ကောင်စီက နိုဝင်ဘာ ၁၈ ရက်နေ့မှာ အဆိပ်ငွေ့ဗုံးသုံးပြီး TNLAကို တိုက်ခိုက်မှုပြုခဲ့တယ်လို့ တအာင်းအမျိုးသားလွတ်မြောက်ရေးတပ်မတော် TNLA က သတင်းထုတ်ပြန်ပါတယ်။

စစ်ကောင်စီက အဆိပ်ငွေ့ဗုံးသုံးပြီး တိုက်ခိုက်တာကြောင့် TNLA ရဲဘော်အချို့ အဆိပ်ငွေ့သင့်ပြီး ဆေးကုသမှု ခံယူခဲ့ရတယ်လို့လည်း TNLA ကဆိုပါတယ်။

နမ့်ခမ်းမြို့မှာရှိတဲ့ စစ်ကောင်စီရဲ့ စခန်းသစ်တပ်စခန်းကို နိုဝင်ဘာလ ၁၇ ရက်နေ့ မနက် ၆ နာရီမှ ညနက်သန်းခေါင်ယံအထိ TNLA ကဝင်ရောက်တိုက်ခိုက်ရာမှာ စခန်းသစ်တပ်ရဲ့ လုံခြုံရေးကုန်းကို တိုက်ခိုက်သိမ်းပိုက်နိုင်ခဲ့ပါတယ်။

တိုက်ခိုက်သိမ်းပိုက်မှုအတွင်း ရန်သူအလောင်းနဲ့ လက်နက်ကြီး လက်နက်ငယ်မျိုးစုံ ၁၃ လက်ကိုလည်း သိမ်းဆည်းရမိခဲ့တယ်လို့ TNLAက ဆိုပါတယ်။

အဲ့ဒီလုံခြုံရေးကုန်းကို သိမ်းပိုက်ရမိပြီးတဲ့နောက် နိုဝင်ဘာ ၁၈ ရက် မနက်မှ စတင်ပြီး စစ်ကောင်စီတပ်က အဆိပ်ငွေ့ဗုံးကို အသုံးပြုပြီး တိုက်ခိုက်လာတာဖြစ်တယ်လို့ TNLA က သတင်းထုတ်ပြန်ပါတယ်။

ဒါ့အပြင် ပြီးခဲ့တဲ့ နိုဝင်ဘာလ ၄ ရက်နေ့လည်း လားရှိုးမြို့နယ်ရှိ စစ်ကောင်စီရဲ့ မိုင်းကျက်တပ်စခန်းကို တိုက်ခိုက်တဲ့အချိန်မှာလည်း စစ်ကောင်စီတပ်က အဆိပ်ငွေ့ဗုံးကို အသုံးပြုပြီး တိုက်ခိုက်ခဲ့တယ်လို့ TNLA ကဆိုပါတယ်။

CJ-002

#MeKongNews

#TNLA

#အဆိပ်ငွေ့

#စစ်ကောင်စီ

#နမ့်ခမ်း

#စခန်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)