မဲခေါင်၊ ဖေဖော်ဝါရီ ၉

စစ်အုပ်ချုပ်ရေး ကြေညာခံထားရတဲ့ ချင်းပြည်နယ်၊ ထန်တလန်မြို့မရဲစခန်းကို မနေ့ ည ၉ နာရီဝန်းကျင်မှာ တော်လှန်ရေးအဖွဲ့က ဝင်ရောက်စီးနင်း သိမ်းပိုက်နိုင်ခဲ့ပြီး သေနတ် အလက် ၄၀ ကျော် သိမ်းဆည်း ရမိခဲ့တယ်လို့ CNF တာဝန်ရှိသူက အတည်ပြုပါတယ်။

စစ်သားနဲ့ရဲ ၄၀ နီးပါး အခြေချ တပ်စွဲထားတဲ့ ရဲစခန်းကို ချင်းအမျိုးသား တပ်မတော် (CNA/ CNF) က မနေ့က ည ၉ နာရီမှာ စတင်တိုက်ခိုက်ခဲ့ပြီး ၂ နာရီကျော်ကြာ တိုက်ခိုက်ခဲ့ရတယ်လို့ သိရပါတယ်။

ဒီနေ့ မနက် ၂ နာရီမှာတော့ လက်နက်တွေ သိမ်းယူနိုင်ခဲ့ပြီး စခန်းမှ အောင်မြင်စွာ ဆုတ်ခွာနိုင်ခဲ့တယ်လို့ CNF ရဲ့ ပြောရေးဆိုခွင့်ရှိသူ ဆလိုင်းထက်နီက မဲခေါင်သတင်းကို ပြောပါတယ်။

“သူတို့ဘက်က အကျအဆုံး ၄ ယောက် အလောင်းတွေ့တယ်။ ကျန်တဲ့ ဟာတွေကတော့ တိမ်းရှောင်ကြတယ်လို့ သိရတယ်။ ကျွန်တော်တို့ဘက်က တစ်ယောက်ကျတယ်။ တစ်ယောက် ဒဏ်ရာရတယ်” လို့ သူက ဆိုပါတယ်။

သိမ်းဆည်းရမိတဲ့ သေနတ်တွေထဲမှာ ဒရုန်းကို ပစ်ချတဲ့ အမျိုးအစားလည်း ပါဝင်တယ်လို့ သိရပါတယ်။

ထန်တလန် မြို့မရဲစခန်းကို ဒေသခံ တော်လှန်ရေးတပ်ဖွဲ့တွေက သိမ်းပိုက်ရာမှာ လက်နက်ခဲယမ်း အများအပြား ရရှိခဲ့ရာ ပြည်တွင်းထုတ် Ainoviq Drone jammer တစ်လက်၊ BA-100 ၆၀ မမ ကွန်မန်ဒို စိန်ပြောင်း တစ်လက် အပါအဝင် လက်နက်ကြီး၊ လက်နက်ငယ် အလက် ၄၀ ကျော် သိမ်းယူနိုင်ခဲ့တယ်လို့ သိရပါတယ်။

ဒါ့အပြင် ကာကွယ်ရေးတပ်တွေက ထန်တလန်မြို့နယ် ထွေအုပ်ရုံးက တပ်စိတ်တစ်စိတ်စာ ပမာဏရှိတဲ့ စစ်ကောင်စီတပ်ကို တိုက်ခိုက်ဖို့ သွားခဲ့ပေမယ့် စစ်တပ်ဘက်မှ တပ်ဆုတ်သွားတာကြောင့် တိုက်ပွဲ မဖြစ်ခဲ့ဘူးလို့လည်း ဆလိုင်းထက်နီက ပြောပါတယ်။

ဒီနေ့ မနက်မှာ  ထန်တလန်မြို့မ ရဲစခန်းနဲ့ မြို့အနီးတစ်ဝိုက်ကို စစ်ကောင်စီက ဂျက်ဖိုက်တာ ၅ စီးနဲ့ လေကြောင်းက‌နေ ဗုံးကြဲ တိုက်ခိုက်မှုတွေ ပြုလုပ်နေတယ်လို့ ဆလိုင်းထက်နီက ပြောပါတယ်။

ဒါ့အပြင် ဟားခါးမြို့နယ်ဘက်မှ စစ်ကူကား ၃ စီး တက်လာတာကိုလည်း တွေ့ရတယ်လို့ သူက ထပ်မံပြောပါတယ်။

“ ထန်တလန်မြို့နယ်မှာတော့ မြို့ပေါ်လောက်ပဲ စစ်တပ်က ခြေကုပ်ယူထားတဲ့ စခန်း နည်းနည်းပဲ ရှိတော့တာ။ ကျန်တဲ့နေရာတွေ ဒေသခံ ကာကွယ်ရေးတပ်တွေ သိမ်းထားနိုင်တာများတယ်” လို့ ဆလိုင်းထက်နီက ပြောပါတယ်။

အခု ရဲစခန်းသိမ်း တိုက်ပွဲမှာ စစ်ကောင်စီဘက်က အကျအဆုံးများနိုင်ပြီး ချင်းပြည်သူ့ကာကွယ်ရေးတပ်တွေ ဘက်ကတော့ CNA ရဲဘော်ဆလိုင်းအသန်း ကျဆုံးခဲ့တယ်လို့ သိရပါတယ်။

လက်နက်ကိုင်ခုခံမှု အားကောင်းရာ မြို့နယ် ၃၇ မြို့နယ်ကို အာဏာသိမ်းမှု ၂ နှစ်ပြည့် ဖေဖော်ဝါရီ ၂ ရက်မှာ စစ်ကောင်စီက စစ်အုပ်ချုပ်ရေး ကြေညာခဲ့ရာ ချင်းပြည်နယ်မှ ထန်တလန် အပါအဝင် ၇ မြို့နယ် ပါဝင်ပါတယ်။

MK-003

#MeKongNews 

#ထန်တလန်မြို့

#CNF

#ဂျက်ဖိုက်တာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)