ညောင်ရွှေမြို့နယ်၊ အင်းလေးဒေသ၊ ဘုရားနီကျေးရွာ အနီးမှာ ဒေသခံ ပြည်သူ့ကာကွယ်ရေးတပ်ဖွဲ့တွေနဲ့ စစ်ကောင်စီတပ်တို့ တိုက်ပွဲဖြစ်ပွားခဲ့ပြီး နှစ်ဘက် အထိအခိုက် အကျအဆုံးတွေ ရှိခဲ့သလို့ စစ်တပ်ဖက်က PNO နဲ့ ပျူစောထီးတွေ ဦးဆောင်လမ်းပြ ပေးနေတယ်လို့ ထုတ်ပြန်ထားပါတယ်။
ဆီဆိုင်မြို့နယ်အနီးမှာလည်း ဒီကနေ့၊ နေ့လယ် ၁ နာရီ ဝန်းကျင်ခန့်က ရှမ်းတောင် ပြည်သူ့ကာကွယ်ရေး တပ်ပေါင်းစုတွေ စခန်းသိမ်း တိုက်ပွဲ ဆင်နွှဲခဲ့ပြီး စစ်ကောင်စီတပ် သေဆုံးမှုတွေ ရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် ဒီကနေ့ နေ့လယ် ၁ နာရီ ဝန်းကျင်က အောင်ပန်း-တောင်ကြီးကြားရှိ စစ်ကောင်စီ စစ်ဆေးရေး ဂိတ်တွေကို ရှမ်းတောင် ပြည်သူ့ကာကွယ်ရေးတပ်ပေါင်းစုတွေ ဝင်ရောက်ပစ်ခတ်ခဲ့တယ်လို့ ထုတ်ပြန် အသိပေးထားပါတယ်။
ဒါကြောင့် တောင်ကြီး၊ ရွှေညောင်၊ ကလောဝန်းကျင်မှာ ပစ်ခတ်မှုတွေ ဆက်ဖြစ်နိုင်တာကြောင့် ပြည်သူတွေ ဂရုစိုက်သွားလာဖို့ ပြည်သူ့ကာကွယ်ရေးတပ်ဖွဲ့တွေက သတိပေးထားတယ်လို့ Ride Behind Kalaw က ရေးသားဖော်ပြထားပါတယ်။
တောင်ကြီးနဲ့ ကလောမြို့နယ်မှာလည်း စစ်ကောင်စီ စစ်ဆေးရေးဂိတ်တွေ အနေနဲ့ စစ်ဆေးမှုတွေ ကြမ်းတမ်း တင်းကြပ်စွာ လုပ်ဆောင်တော့မှာ ဖြစ်တဲ့ အတွက် ပြည်သူတွေ ဂရုစိုက်သွားလာကြဖို့ အထူး သတိပေးလိုတယ်လို့ ထုတ်ပြန်ချက်မှာ ပါရှိပါတယ်။
အခုဖြစ်စဉ်တွေနဲ့ ပတ်သက်ပြီး သီးခြား အတည်ပြုချက် ရယူနိုင်ဖို့ မဲခေါင်သတင်း အနေနဲ့ ကြိုးစားနေဆဲ ဖြစ်ပါတယ်။
