ဇန်နဝါရီ ၃ ရက်နေ့က ညောင်ရွှေမြို့နယ် အနောက်ဘက်၊ ညောင်ရွှေ-ခေါင်တိုင် လမ်းပေါ်မှာရှိတဲ့ သန်းထောင်ရွာနဲ့ ဘုရားနီရွာကြားမှာ ရှမ်းတောင် PDF နဲ့ စစ်ကောင်စီတပ်တို့ အပြန်အလှန် ဖြစ်ပွားခဲ့တဲ့ တိုက်ပွဲကြောင့် ညတွင်းချင်း ခေါင်တိုင်လမ်း သွားလာခွင့် ပိတ်လိုက်တယ်လို့ ဒေသခံတွေဆီက သိရပါတယ်။
တောင်ကြီးဈေး အဖိတ်နေ့၊ အင်းလေး ခေါင်တိုင်ရွာက ဈေးသည် ကားသမား အားလုံးကို မနက် ပေါင်းပိန်းဂိတ်က စစ်ခွေးတွေ မပေးဖြတ်ဘူး။ နောက်လှည့်ပြန်ရတယ်
လို့ ဈေးသည် တစ်ဦးက မနေ့က ကြုံတွေ့ခဲ့ရတဲ့ အခြေအနေကို ပြောပြပါတယ်။
လက်ရှိ စစ်ကောင်စီတပ်ဟာ ဟဲဟိုး – တောင်လေးလုံး (ခေါင်တိုင်) လမ်းခွဲကနေ သန်းထောင်ရွာအကျော် တောင်ဖက် ပေါင်းပိန်းရွာအထိ လမ်းပိတ် ထားပြီး ကျေးရွာ ဒေသခံတွေလည်း ဖြတ်သန်းခွင့် မရတာကြောင့် သွားလာရေး အခက်ကြုံနေရတယ်လို့ သိရပါတယ်။
အခုလို လမ်းပိတ်ဆို့မှုကြောင့် မနေ့က သန်းထောင်ရွာ ဈေးနေ့မှာ ဈေးမဖွင့်ခဲ့ရဘူးလို့ သိရပါတယ်။
ညောင်ရွှမြို့နယ် ကျေးရွာတွေက ဈေးသည်တွေဟာ တောင်ကြီး၊ အောင်ပန်း၊ ဟဲဟိုး၊ ရွှေညောင်၊ ညောင်ရွှေ ဈေးနေ့တွေမှာ ဈေးပတ်လိုက်ရောင်းပြီး လုပ်ကိုင်စားသောက် နေသူတွေ ဖြစ်တာကြောင့် ရေရှည် လမ်းပိတ်ဆို့ပါက စားဝတ်နေရေး ထိခိုက်လာမှာကို စိုးရိမ်နေကြပါတယ်။
