မဲခေါင်၊ ဇန်နဝါရီ ၂၃
ရန်ကုန်တိုင်း၊ တာမွေမြို့နယ် မလွှကုန်း ဌေးကြွယ် (က) ရပ်ကွက် အသောကလမ်း Putu ဆိုင်တိုက် အပေါ်ထပ် တိုက်ခန်းမှာ နေထိုင်တဲ့ ကလေး ၂ ဦးပါ မိသားစုကို စစ်ကောင်စီက လာရောက် ဖမ်းဆီးသွားတယ်လို့ဒေသခံတွေက ပြောပါတယ်။
အဆိုပါ တိုက်ပေါ်သို့ ဇန်နဝါရီ ၂၂ ရက် ည ၁၁ နာရီကျော်က စစ်ကား တစ်စီး၊ အိမ်စီးကား တစ်စီး ရောက်လာပြီးနောက် တတိယထပ်မှာ နေထိုင်သူတွေကို ဝင်ရောက်စစ်ဆေး ဖမ်းဆီးခဲ့တာ ဖြစ်တယ်လို့ မျက်မြင်တွေ့သူ တစ်ဦးက ပြောပါတယ်။
“ အိမ်ကို အမှောင်ချထားပြီးမှ ဝင်ဖမ်းသွားတာ။ အိမ်ရှင် ကောင်မလေးနဲ့ တစ်အိမ်လုံးကို ဖမ်းသွားတာ။ ကလေး ၂ ယောက်ကိုတော့ မျက်နှာအုပ်ပြီး ခေါ်သွားတယ်။ အားလုံး ၅ ယောက် ဖမ်းသွားတာ တွေ့တယ်။ ဘာလို့ ဖမ်းတာလဲ ဆိုတာတော့ မသိဘူး” လို့ သူကပြောပါတယ်။
ဖမ်းဆီးခံရတဲ့ မိသားစုဟာ ဘယ်သူတွေ ဆိုတာနဲ့ ဖမ်းဆီးခံရတဲ့ အကြောင်းရင်း အသေးစိတ်ကိုတော့ မသိရသေးပါဘူး။
ဇန်နဝါရီ ၂၂ ရက် ည ၁၀ နာရီ ဝန်းကျင်ကလည်း တာမွေမြို့သစ် (၂) လမ်းနဲ့ ကျောက်မြောင်း လမ်းထောင့်ရှိ ကျားကွက်သစ် ကြေးအိုးဆီချက် ဆိုင်ပိုင်ရှင် အဖိုးကိုလည်း စစ်တပ်က ရိုက်နှက် ဖမ်းဆီးသွားတယ်လို့ ရပ်ကွက်နေ ပြည်သူတွေက ပြောပါတယ်။
MK-005
ဓာတ်ပုံ – ပုံဟောင်းဖြစ်ပါတယ်။
