ဒီကနေ့ မနက်ပိုင်းမှာ စစ်ကောင်စီ လက်အောက်ခံ အိုးဘိုထောင်တွင်း တရားရုံးကနေ အကြမ်းဖက်မှုတွေ အတွက် ငွေကြေး ထောက်ပံ့မှုဆိုင်ရာပြစ်မှု ပုဒ်မ- ၅၀(ည) နဲ့ ထောင်ဒဏ် ၁၅ နှစ်ချမှတ်လိုက်တာလို့ သိရပါတယ်။
သူ့ကို ၂၀၂၂ ခုနှစ်၊ ဧပြီ ၂၇ ရက်မှာ ဒေါက်တာဇော်မြင့်မောင်ရဲ့ ရုံးချိန်းအပြီးမှာ စစ်တပ်က ဝင်ရောက် ဖမ်းဆီးသွားတာပါ။
တရားလွှတ်တော်ရှေ့နေ ဒေါ်ရွက်နုအောင်ဟာ ဒေါက်တာဇော်မြင့်မောင် အပေါ် ရွေးကောက်ပွဲဆိုင်ရာ ဥပဒေ ကျူးလွန်တယ်ဆိုတဲ့ အမှုနဲ့ အဂတိလိုက်စားမှုတွေ၊ NLD အစိုးရလက်ထက် မန္တလေးတိုင်းလျှပ်စစ်နဲ့ စွမ်းအင် ဝန်ကြီး ဦးဇာနည်အောင်ရဲ့ အမှုတွေအပြင် NLD ပါတီနာယက ဦးဝင်းထိန်ရဲ့ အမှုတွေအတွက်လည်း လိုက်ပါ ဆောင်ရွက်ပေးခဲ့ပါတယ်။
သူဟာ အမျိုးသား ဒီမိုကရေစီအဖွဲ့ချုပ်၊မန္တလေးတိုင်းရဲ့ အလုပ်မှူဆောင်အဖွဲ့ဝင်တစ်ဦးလည်း ဖြစ်ပြီး ဖမ်းဆီးခံထားရတဲ့ NLD လွှတ်တော်ကိုယ်စားလှယ်တွေရဲ့ အမှုတွေကို လိုက်ပါ ဆောင်ရွက်နေသူလည်း ဖြစ်ပါတယ်။
ဒေါ်ရွက်နုအောင်ဟာ မန္တလေးမြို့မှာ ဖမ်းဆီးခံခဲ့ရတဲ့ ပြည်သူ့ကာကွယ်ရေးတပ်-PDF အဖွဲ့ဝင်လို့ ဆိုတဲ့ တရားလွှတ်တော်ရှေ့နေ ဦးစည်သူ (ခ) ဆိတ်ကြီးကို ငွေကျပ် ၃ သိန်း ထောက်ပံ့မှု ပြုလုပ်ခဲ့တယ်ဆိုတဲ့ ထွက်ဆိုချက်အရ အကြမ်းဖက်မှု တိုက်ဖျက်ရေးဥပဒေပုဒ်မ ၅၀ (ည) နဲ့ စစ်ကောင်စီက အမှုဖွင့်ခဲ့တာပါ။
သူဟာ NLD အစိုးရလက်ထက်က နိုင်ငံကျော်အမှု တခုဖြစ်သော နေပြည်တော်မှ ဗစ်တိုး ရီးယားအမှုမှာ နစ်နာသူ ကလေးငယ်ဘက်မှ လိုက်ပါဆောင်ရွက်ပေးခဲ့သလို Myanmar Now သတင်းဌာန အယ်ဒီတာချုပ် ကိုဆွေဝင်းကို အမျိုး ဘာသာသာသနာစောင့်ရှောက်ရေးအဖွဲ့-မဘသ က စွဲဆိုတဲ့ အမှုမှာလည်း အကျိုးဆောင်အဖြစ် လိုက်ပါ ဆောင်ရွက်ပေးခဲ့သူ ဖြစ်ပါတယ်။
